ଶ୍ରୀନଗର: ଉତ୍ତର କଶ୍ମୀରର ଉରି ସେକ୍ଟରରେ ନିୟନ୍ତ୍ରଣ ରେଖା ନିକଟରେ ଭାରତୀୟ ସେନା ଏକ ବଡ଼ ଅନୁପ୍ରବେଶ ଉଦ୍ୟମକୁ ପଣ୍ଡ କରିଛି। ଜାତୀୟ ଗଣମାଧ୍ୟମର ର‌ିପୋର୍ଟ  ଅନୁଯାୟୀ ରାତିର ଅନ୍ଧାରରେ ପାକିସ୍ତାନୀ ଆତଙ୍କବାଦୀଙ୍କ ଏକ ଗୋଷ୍ଠୀ ଗୁପ୍ତ ଭାବରେ ଅନୁପ୍ରବେଶ କରିବାକୁ ଚେଷ୍ଟା କରୁଥିଲେ। କିନ୍ତୁ ସତର୍କ ଭାରତୀୟ ସୈନିକମାନେ ଏହି ପ୍ରୟାସକୁ ପଣ୍ଡ କରିଦେଇଛି। ଏହି ଏନକାଉଣ୍ଟର ସମୟରେ କିଛି ଆତଙ୍କବାଦୀ ନିହତ ହୋଇଛନ୍ତି। କିଛି ଖସିଯିବାରେ ସଫଳ ହୋଇଛନ୍ତି। ଆତଙ୍କବାଦୀଙ୍କ ସହ ଏନକାଉଣ୍ଟରରେ ଜଣେ ସୈନିକ ମଧ୍ୟ ଗୁଳିବିଦ୍ଧ ହୋଇଛନ୍ତି, ଯାହାଙ୍କ ଅବସ୍ଥା ଗୁରୁତର ବୋଲି କୁହାଯାଉଛି।

ଅଗଷ୍ଟ ୧୨ ରାତିରେ ଉରି ସେକ୍ଟରରେ ନିୟନ୍ତ୍ରଣ ରେଖା ନିକଟରେ ଭାରତୀୟ ସେନାର ସତର୍କତାର ଆଉ ଏକ ଉଦାହରଣ ଦେଖିବାକୁ ମିଳିଛି। ରାତିର ଅନ୍ଧାରରେ ସତର୍କତାର ସହିତ ନିୟୋଜିତ ସେନା କର୍ମଚାରୀମାନେ ନିୟନ୍ତ୍ରଣ ରେଖା ନିକଟରେ କିଛି ଗତିବିଧି ଅନୁଭବ କରିଥିଲେ। ଯେତେବେଳେ ସେମାନେ ତୁରନ୍ତ ଚାରିପାଖକୁ ଚାହିଁଲେ, କିଛି ସଶସ୍ତ୍ର ଆତଙ୍କବାଦୀ ଏଲଓସି ପାର କରିବାକୁ ଚେଷ୍ଟା କରୁଥିବା ଦେଖାଯାଇଥିଲା। ଆମର ସୈନିକମାନେ ସେମାନଙ୍କ ପ୍ରୟାସକୁ ବିଫଳ କରିଥିଲେ।

ଜଣେ ବରିଷ୍ଠ ସେନା ଅଧିକାରୀ କହିଛନ୍ତି, ଆମର ସୈନିକମାନେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ଆତଙ୍କବାଦୀମାନେ ଗୁଳି ଚଳାଇବା ଆରମ୍ଭ କରିଥିଲେ। କିନ୍ତୁ ଆମର ସୈନିକମାନେ ଉପଯୁକ୍ତ ଜବାବ ଦେଇଥିଲେ। ସେନା ସମଗ୍ର ଅଞ୍ଚଳକୁ ଘେରାବନ୍ଦୀ କରିଦେଇଛି ଏବଂ ସର୍ଚ୍ଚ ଅପରେସନ୍ ଜାରି ରହିଛି।

ପ୍ରତିରକ୍ଷା ବିଶେଷଜ୍ଞମାନେ ବିଶ୍ୱାସ କରନ୍ତି ଯେ ଉରି ସେକ୍ଟର ରଣନୈତିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ କାରଣ ଏହା ଶ୍ରୀନଗରରୁ ପ୍ରାୟ ୧୦୦ କିଲୋମିଟର ଦୂରରେ ଅବସ୍ଥିତ ଏବଂ ଏହାକୁ ଆତଙ୍କବାଦୀଙ୍କ ଅନୁପ୍ରବେଶର ମୁଖ୍ୟ ପଥ ଭାବରେ ବିବେଚନା କରାଯାଏ। ସେନାର ଏହି କାର୍ଯ୍ୟାନୁଷ୍ଠାନ ଏହି ଅଞ୍ଚଳରେ ସୁରକ୍ଷା ବ୍ୟବସ୍ଥାକୁ ଆହୁରି ମଜବୁତ କରିବ, କିନ୍ତୁ ବିପଦ ଏପର୍ଯ୍ୟନ୍ତ ଟଳି ନାହିଁ।

ଅଧିକ ପଢ଼ନ୍ତୁ: ଦୁଇ ନିଷ୍ପାପ ଝିଅଙ୍କୁ ଦୁଷ୍କର୍ମ ଅଭିଯୋଗ