ନୂଆଦିଲ୍ଲୀ: ତିବ୍ଦତରେ ବ୍ରହ୍ମପୁତ୍ର ନଦୀ ଉପରେ ଚୀନ୍ର ବିଶାଳକାୟ ଡ୍ୟାମ୍ ବା ବନ୍ଧ ନିର୍ମାଣକୁ ନେଇ ଭାରତରେ ଚିନ୍ତା ବଢିବାରେ ଲାଗିଛି। ଏହି ପ୍ରସଙ୍ଗରେ ସରକାର ଲୋକସଭାରେ ଏକ ଗୁରୁତ୍ୱପୂର୍ଣ୍ଣ ସୂଚନା ଦେଇଛନ୍ତି। ଚୀନ୍ ଯଦି ବ୍ରହ୍ମପୁତ୍ରର ପାଣିକୁ ରୋକିଦିଏ କିମ୍ବା ହଠାତ୍ ଛାଡ଼ିଦିଏ, ତେବେ ଏହାର ମୁକାବିଲା ପାଇଁ ଭାରତର ରଣନୀତି କଣ, ସେ ନେଇ ମନ୍ତ୍ରୀ ସ୍ପଷ୍ଟ କରିଛନ୍ତି।

ଚୀନ୍‌ର ଚକ୍ରବ୍ୟୁହ: କଣ ହୋଇପାରେ ବିପଦ?

ବୈଦେଶିକ ବ୍ୟାପାର ମନ୍ତ୍ରଣାଳୟ ଅନୁଯାୟୀ, ଚୀନ୍ ତିବ୍ଦତର ମେଡୋଗ  ଅଞ୍ଚଳରେ ବିଶ୍ୱର ସବୁଠାରୁ ବଡ଼ ଜଳବିଦ୍ୟୁତ୍ ପ୍ରକଳ୍ପ ନିର୍ମାଣ କରୁଛି। ଏହାର କ୍ଷମତା ପ୍ରାୟ ୬୦,୦୦୦ ମେଗାୱାଟ୍। ଏହାଦ୍ୱାରା ଭାରତ ପାଇଁ ଦୁଇ ପ୍ରକାର ବିପଦ ରହିଛି:

୧. ଜଳ ଅଭାବ: ମରୁଡ଼ି ସମୟରେ ଚୀନ୍ ପାଣି ରୋକିଦେଲେ ଉତ୍ତର-ପୂର୍ବ ଭାରତରେ ଜଳ ସଙ୍କଟ ଦେଖାଦେବ।

୨. ଜଳ ବୋମା : ବର୍ଷା ଦିନେ ଯଦି ଚୀନ୍ ହଠାତ୍ ବହୁ ପରିମାଣର ପାଣି ଛାଡ଼ିଦିଏ, ତେବେ ଅରୁଣାଚଳ ପ୍ରଦେଶ ଏବଂ ଆସାମରେ ଭୟଙ୍କର ବନ୍ୟା ପରିସ୍ଥିତି ସୃଷ୍ଟି ହେବ।

ଭାରତର ପ୍ଲାନ୍: କିପରି ମିଳିବ ସୁରକ୍ଷା?

ସଂସଦରେ ସରକାର କହିଛନ୍ତି ଯେ, ଚୀନ୍ର ଏହି 'ଜଳ ଯୁଦ୍ଧ' ରଣନୀତିର ଜବାବ ଦେବା ପାଇଁ ଭାରତ ନିଜର 'ମେଗା ଡ୍ୟାମ୍' ଯୋଜନା ଉପରେ କାମ କରୁଛି:

ଅରୁଣାଚଳ ପ୍ରଦେଶର ସିଆଙ୍ଗ ନଦୀରେ ଭାରତ ଏକ ବିଶାଳକାୟ ବନ୍ଧ ନିର୍ମାଣ କରିବାର ଯୋଜନା ରଖିଛି। ଏହାର ଜଳ ସଂରକ୍ଷଣ କ୍ଷମତା ଏତେ ଅଧିକ ହେବ ଯେ, ଚୀନ୍ ଯଦି ହଠାତ୍ ପାଣି ଛାଡ଼େ, ତେବେ ଏହି ବନ୍ଧ ସେହି ପାଣିକୁ ଶୋଷି ନେଇ ବନ୍ୟା ରୋକିପାରିବ।

ଜଳ ନିୟନ୍ତ୍ରଣ: ସେହିପରି ଚୀନ୍ ପାଣି ରୋକିଦେଲେ, ଏହି ବନ୍ଧରେ ସଞ୍ଚିତ ଥିବା ପାଣିର ବ୍ୟବହାର କରି ଜଳ ସଙ୍କଟ ଦୂର କରାଯାଇପାରିବ।

ମନ୍ତ୍ରୀ କହିଛନ୍ତି ଯେ, ଭାରତ ସରକାର ପ୍ରତିଟି ମୁହୂର୍ତ୍ତରେ ଚୀନ୍ର ଗତିବିଧି ଉପରେ ନଜର ରଖିଛନ୍ତି। ଏସସିଓ (SCO) ବୈଠକ ଏବଂ ଅନ୍ୟାନ୍ୟ ଆନ୍ତର୍ଜାତୀୟ ମଞ୍ଚରେ ମଧ୍ୟ ଭାରତ ଏହି ପ୍ରସଙ୍ଗରେ ଚୀନ୍ ଠାରୁ ସ୍ୱଚ୍ଛତା ଏବଂ ହାଇଡ୍ରୋଲୋଜିକାଲ୍ ଡାଟା (ଜଳ ସମ୍ପର୍କିତ ତଥ୍ୟ) ସେୟାର କରିବାକୁ ଦାବି କରିଆସୁଛି।

 ଭାରତ ଚୀନ୍ର କୌଣସି ବି ପରିସ୍ଥିତିର ସାମ୍ନା କରିବାକୁ ପ୍ରସ୍ତୁତ ଅଛି। ସୀମାରେ ଭିତ୍ତିଭୂମି ବିକାଶ ଏବଂ ବ୍ରହ୍ମପୁତ୍ରର ଉପନଦୀଗୁଡ଼ିକରେ ବନ୍ଧ ନିର୍ମାଣ ମାଧ୍ୟମରେ ଭାରତ ନିଜର ଜଳ ସୁରକ୍ଷା ନିଶ୍ଚିତ କରୁଛି।