ନୂଆଦିଲ୍ଲୀ: ପାକିସ୍ତାନରେ ଏବେ ବନ୍ୟା ବିଭୀଷିକା ଦେଖାଦେଇଛି । ରାବି, ଚେନାବ ଏବଂ ଝେଲମ୍ ନଦୀର ଜଳସ୍ତର ଉପର ମୁହାଁ ହୋଇଛି । ପାକିସ୍ତାନର ପଞ୍ଜାବ ପ୍ରାନ୍ତରେ ଜଳ ପ୍ରଳୟ ଦେଖିବାକୁ ମିଳିଛି । ଲକ୍ଷ ଲକ୍ଷ ଲୋକେ ଏବେ ଜଳବନ୍ଦୀ ଜୀବନ ବିତାଉଛନ୍ତି । ଏହାରି ମଧ୍ୟରେ ପାକିସ୍ତାନ ପ୍ରତିରକ୍ଷା ମନ୍ତ୍ରୀ ଖ୍ୱାଜା ଆସିଫଙ୍କ ପିଲାଳିଆମୀ ବୟାନ ସାମ୍ନାକୁ ଆସିଛି । ଯାହାକୁ ଶୁଣିବା ପରେ କେହି ବି ହସ ରୋକି ରହି ପାରିବ ନାହିଁ । ବନ୍ୟା ଆଲ୍ଲାଙ୍କ ଆଶୀର୍ବାଦ ବୋଲି ଏକ ଗଣମାଧ୍ୟମକୁ ଦେଇଥିବା ସାକ୍ଷାତକାରରେ କହିଛନ୍ତି । 

ଏକ ନ୍ୟୁଜ୍ ଚ୍ୟାନେଲରେ ଖ୍ୱାଜା ଆସିଫଙ୍କୁ ବନ୍ୟା ସହାୟତା ବିଷୟରେ ପଚାରାଯାଇଥିଲା। ଏହାର ଉତ୍ତରରେ ସେ କହିଥିଲେ ଯେ ଲୋକମାନେ ଏହାକୁ ଆଲ୍ଲାହଙ୍କ ଆଶୀର୍ବାଦ ବୋଲି ଭାବି ନିଜ ଘରେ ପାଣି ସଂରକ୍ଷଣ କରିବା ଉଚିତ । ସାରା ବିଶ୍ୱରେ ପାଣି ଅଭାବ ଯୋଗୁଁ ହଇରାଣ ହେଉଛି। ଏପରି ପରିସ୍ଥିତିରେ ପାକିସ୍ତାନରେ ବନ୍ୟା ଏକ ଖୁସିର ସଂଯୋଗ । ତେଣୁ ବନ୍ୟାକୁ ବିପର୍ଯ୍ୟୟ ନୁହେଁ, ବରଂ ଆଲ୍ଲାହଙ୍କ ଆଶୀର୍ବାଦ ବୋଲି ବିବେଚନା କରାଯିବା ଉଚିତ ।

ଖ୍ୱାଜା ଆସିଫ୍ ଆହୁରି କହିଛନ୍ତି, ବନ୍ୟା ଓ ବର୍ଷା ଦ୍ୱାରା ପ୍ରଭାବିତ ଲୋକମାନେ ରାସ୍ତାରେ ଯାଇ ସରକାର ଏବଂ ପ୍ରଶାସନ ବିରୋଧରେ ବିକ୍ଷୋଭ ପ୍ରଦର୍ଶନ କରୁଛନ୍ତି । ସେମାନେ ରାସ୍ତା ଅବରୋଧ କରୁଛନ୍ତି ଏବଂ ସରକାର ବିରୋଧୀ ସ୍ଲୋଗାନ ଦେଉଛନ୍ତି । ଲୋକମାନେ ପ୍ରଥମେ ଜଳ ସଂରକ୍ଷଣ ଉପରେ ଧ୍ୟାନ ଦେବା ଉଚିତ୍ । ନିଜ ଘରକୁ ପାଣି ନିଅ, ଏହା ସମସ୍ତ ସମସ୍ୟା ଦୂର କରିବ । ସେ ଆହୁରି ମଧ୍ୟ କହିଛନ୍ତି ଯେ ଜଳ ସଂରକ୍ଷଣ ପାଇଁ ବଡ ଡ୍ୟାମ ଆବଶ୍ୟକ, ଯାହା ବର୍ତ୍ତମାନ ସମ୍ଭବ ନୁହେଁ। ତେଣୁ ଲୋକମାନେ କେବଳ ନିଜ ଘରେ ଜଳ ସଂରକ୍ଷଣ କରିବା ଉଚିତ୍ |

ଖ୍ୱାଜା ଏହା ମଧ୍ୟ କହିଛନ୍ତି ଯେ ବନ୍ୟା ରୋକିବା ପାଇଁ ସରକାରଙ୍କ ପାଖରେ କୌଣସି ବ୍ୟବସ୍ଥା ନାହିଁ। ଲୋକମାନେ ଏଥିପାଇଁ ଅଯଥାରେ ସରକାରଙ୍କୁ ଦୋଷ ଦେଉଛନ୍ତି । ସେ ଦାବି କରିଛନ୍ତି ଯେ ସ୍ଥାନୀୟ ସରକାର ବନ୍ୟା ପାଇଁ ଦାୟୀ, ଯାହା ଶକ୍ତିହୀନ । ଲୋକମାନେ ଜବରଦଖଲ କରୁଛନ୍ତି ଏବଂ ପାଣିର ପଥ ପରିବର୍ତ୍ତନ କରୁଛନ୍ତି, ଯାହା ଯୋଗୁଁ ବନ୍ୟା ନିଶ୍ଚିତ।

ଜାତୀୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ (NDMA)ର ରିପୋର୍ଟ ଅନୁଯାୟୀ, ୨୬ ଜୁନ୍ ରୁ ୩୧ ଅଗଷ୍ଟ ପର୍ଯ୍ୟନ୍ତ ପାକିସ୍ତାନରେ ମୃତ୍ୟୁ ସଂଖ୍ୟା ୮୫୪ ରେ ପହଞ୍ଚିଛି ଏବଂ ୧୧୦୦ ରୁ ଅଧିକ ଲୋକ ଆହତ ହୋଇଛନ୍ତି । 

ପଞ୍ଜାବ ସୂଚନା ମନ୍ତ୍ରୀ ଆଜମା ବୁଖାରୀ କହିଛନ୍ତି ଯେ ବନ୍ୟା ଦ୍ୱାରା ୨୦ ଲକ୍ଷରୁ ଅଧିକ ଲୋକ ପ୍ରଭାବିତ ହୋଇଛନ୍ତି । ୭,୬୦,୦୦୦ ଲୋକଙ୍କୁ ଏବଂ ୫,୦୦,୦୦୦ରୁ ଅଧିକ ପଶୁଙ୍କୁ ଉଦ୍ଧାର କରିଛନ୍ତି । ପଞ୍ଜାବ ପ୍ରଥମ ଥର ପାଇଁ ଏପରି ବନ୍ୟା ଦେଖିଛି। ସରକାରୀ ତଥ୍ୟ ଅନୁଯାୟୀ ପଞ୍ଜାବରେ ଏଯାବତ ବନ୍ୟା ଯୋଗୁଁ ୪୧ ଜଣଙ୍କର ମୃତ୍ୟୁ ହୋଇଛି। ପଞ୍ଜାବ ପ୍ରଦେଶରେ ୧୦ ଲକ୍ଷରୁ ଅଧିକ ଲୋକଙ୍କୁ ସେମାନଙ୍କ ଘରୁ ସ୍ଥାନାନ୍ତର କରାଯାଇଛି । ଦେଶ ଚାରି ଦଶନ୍ଧି ମଧ୍ୟରେ ସବୁଠାରୁ ଖରାପ ବନ୍ୟାର ସମ୍ମୁଖୀନ ହେଉଛି, ଯାହା ଶହ ଶହ ଗାଁ ନଷ୍ଟ କରିଦେଇଛି ଏବଂ ଶସ୍ୟ ଫସଲ ବୁଡ଼ି ଯାଉଛି ।