ନୂଆଦିଲ୍ଲୀ: ପାକିସ୍ତାନ ସରକାର ଏବେ ବହୁତ ବଡ଼ ମାନସିକ ଦୁଶ୍ଚିନ୍ତାରେ ଦିନ କାଟୁଛନ୍ତି । ଭାରତ ସରକାର କେମିତି ପ୍ରତିଶୋଧ ନେବେ ସେ ନେଇ ପାକିସ୍ତାନର ନିଦ ହଜିଯାଇଛି । ପାକିସ୍ତାନର ବର୍ତ୍ତମାନର ପରିସ୍ଥିତି ରାଜନୈତିକ ସମୀକରଣରେ ଏକ ନାଟକୀୟ ପରିବର୍ତ୍ତନ ଆଡ଼କୁ ଇଙ୍ଗିତ କରୁଛି। ଏବେ ନିଜ ଦେଶର ଲୋକେ ପ୍ରଧାନମନ୍ତ୍ରୀ ଶେହବାଜ ସରିଫଙ୍କ ପାଇଁ ମଣ୍ଡ ବିନ୍ଧାର କାରଣ ପାଲଟିଛନ୍ତି । ଭ୍ରଷ୍ଟାଚାର ମାମଲାରେ ଜେଲରେ ବନ୍ଦୀ ଥିବା ପୂର୍ବତନ ପ୍ରଧାନମନ୍ତ୍ରୀ ଇମରାନ ଖାନଙ୍କୁ ମୁକୁଳାଇବାକୁ ସାଧାରଣରେ ଦାବି ହୋଇଛି । ସୋସିଆଲ ମିଡ଼ିଆରେ ଏ ନେଇ ଜୋରଦାର ଦାବି କରାଯାଉଛି ।    

ଏକ୍ସର ଡାଟା ଅନୁସାରେ ହ୍ୟାଚଟ୍ୟାଗ୍ ରିଲିଜ୍ ଖାନ୍ ଫର୍ ପାକିସ୍ତାନ (#ReleaseKhanForPakistan) ଅର୍ଥାତ୍ ପାକିସ୍ତାନ ପାଇଁ ଇମରାନ ଖାନକୁ ମୁକ୍ତ କରିବାକୁ ଦାବି ହେଉଛି । ଏହି ହ୍ୟାଚଟ୍ୟାଗ୍ 3 ଲକ୍ଷରୁ ଅଧିକଥର ବ୍ୟବହାର କରାଯାଇଛି । ଇମରାନ ଖାନଙ୍କ ଦଳ ପାକିସ୍ତାନ-ତହରୀଫ୍-ଇନସାଫ୍ (ପିଟିଆଇ)ର ଆକାଉଣ୍ଟରେ ଏହି ହ୍ୟାସଟ୍ୟାଗ୍ 35 ହଜାରରୁ ଅଧିକଥର ପୋଷ୍ଟ କରାଯାଇଛି । ଏପରି ଇମରାନଙ୍କ ସପକ୍ଷରେ ଆହୁରି ହ୍ୟାସଟ୍ୟାଗ୍ ଟ୍ରେଣ୍ଡ୍ କରୁଛି । ଯଦି ଭାରତ ପାକିସ୍ତାନ ଉପରେ ଆକ୍ରମଣ କରିବାକୁ ଯାଉଛି, ତେବେ ଇମ୍ରାନ ଖାନଙ୍କୁ ତୁରନ୍ତ ମୁକ୍ତ କରି ତାଙ୍କ ବାସଭବନକୁ ନିଆଯିବା ଉଚିତ ବୋଲି କୁହାଯାଇଛି । 

ଗତ ସୋମବାର ଦିନ, ପିଟିଆଇ ସିନେଟର ଶିବଲି ଫରାଜ ପାକିସ୍ତାନୀ ସିନେଟରେ ଇମ୍ରାନ ଖାନଙ୍କ ମୁକ୍ତି ପାଇଁ ଦାବି କରିଥିଲେ। ସେ କହିଥିଲେ ଯେ ଦେଶ ଯେକୌଣସି ନିଷ୍ପତ୍ତି ନେବ ସେଥିରେ ଇମ୍ରାନ ଖାନଙ୍କ ମତାମତକୁ ମଧ୍ୟ ସ୍ଥାନ ଦିଆଯିବା ଉଚିତ । ଏପ୍ରିଲ 25 ତାରିଖରେ, ପିଟିଆଇର 29 ତମ ପ୍ରତିଷ୍ଠା ଦିବସରେ, ଇମ୍ରାନ ଖାନଙ୍କୁ ମୁକ୍ତ କରିବା ପାଇଁ ଅନଲାଇନ୍ ଅଭିଯାନ ବୃଦ୍ଧି ପାଇଥିଲା। ଏହି ସମୟ ମଧ୍ୟରେ ପିଟିଆଇ ସମର୍ଥକମାନେ ଖାନଙ୍କ "ଅବୈଧ" ଅଟକକୁ ସମାପ୍ତ କରିବାକୁ ଆବେଦନ କରିଥିଲେ ।

ଏହା ସହିତ ସେନା ମୁଖ୍ୟ ଆସିମ ମୁନୀରଙ୍କୁ ନେଇ ମଧ୍ୟ ପୋଷ୍ଟ କରାଯାଇଛି । ଆସିମ ମୁନୀରଙ୍କ ଇସ୍ତଫା ଦାବି ହୋଇଛି । ଦଶନ୍ଧି ଧରି, ପାକିସ୍ତାନୀ ସେନା ଭାରତ ସହିତ ଶାନ୍ତି ପ୍ରତିଷ୍ଠା ପାଇଁ ପ୍ରୟାସକୁ ଭଣ୍ଡୁର କରୁଥିବା ଅଭିଯୋଗ ହୋଇଆସୁଛି। ପାକିସ୍ତାନୀ ସେନା ଦେଶର କ୍ଷମତା ଉପରେ ଦୃଢ଼ ଅଧିକାର ରଖିଛି ଏବଂ ସୀମା ଅତିକ୍ରମ କରି ଆତଙ୍କବାଦୀ ଆକ୍ରମଣ କରିଆସୁଛି ।

ଅପରପକ୍ଷରେ ପାକ୍ ସେନା ମୁଖ୍ୟ ଅସୀମ ମୁନିର ଏବଂ ପ୍ରଧାନମନ୍ତ୍ରୀ ଶାହବାଜ ସରିଫ ଜେଲରେ ଥିବା ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କଠାରୁ ସାହାଯ୍ୟ ଲୋଡ଼ିଥିବା ଖବର ମଧ୍ୟ ସାମ୍ନାକୁ ଆସିଛି । ପିଟିଆଇକୁ ଅସୀମ ମୁନିରଙ୍କ ବିରୋଧରେ ପ୍ରତିବାଦ ବନ୍ଦ କରିବା ଏବଂ ସିନ୍ଧରେ ପ୍ରଦର୍ଶନ ବନ୍ଦ କରିବା ପାଇଁ ରାଜି କରାଇବା ପାଇଁ ଚାରି ଜଣ ପୂର୍ବତନ ସାମରିକ ଅଧିକାରୀଙ୍କୁ ଇମ୍ରାନ ଖାନଙ୍କ ପାଖକୁ ପଠାଯାଇଛି। 2019 ରେ ପୁଲୱାମା ଆକ୍ରମଣ ପରେ, ତତ୍କାଳୀନ ପ୍ରଧାନମନ୍ତ୍ରୀ ଇମ୍ରାନ ଖାନ ତାଙ୍କ କାର୍ଯ୍ୟକାଳ ଶେଷ ହେବା ପୂର୍ବରୁ ଆଇଏସ୍ଆଇ ମୁଖ୍ୟ ଅସୀମ ମୁନିରଙ୍କୁ ହଟାଇ ଦେଇଥିଲେ । ଏହା ଆଇଏସ୍ଆଇ ଇତିହାସରେ ପ୍ରଥମ ଥର ଥିଲା। ସେବେଠାରୁ, ଅସୀମ ମୁନିର ଏବଂ ଇମ୍ରାନ ଖାନଙ୍କ ମଧ୍ୟରେ ସମ୍ପର୍କ ବହୁତ ତିକ୍ତ ହୋଇଯାଇଥିଲା । ଏହି ଶତ୍ରୁତା ଯୋଗୁଁ ଅସୀମ ମୁନିର ଇମ୍ରାନଙ୍କୁ ଜେଲ ପଠାଇବା ପାଇଁ ରଣନୀତି ପ୍ରସ୍ତୁତ କରିଥିଲେ। ଏବେ ସେହି ଅସୀମ ମୁନିର ଇମ୍ରାନ ଖାନଙ୍କଠାରୁ ସାହାଯ୍ୟ ନେବାକୁ ବାଧ୍ୟ ହୋଇଛନ୍ତି ବୋଲି କୁହାଯାଉଛି ।