ପାକିସ୍ତାନର ସିନ୍ଧ ପ୍ରଦେଶରେ ସରକାରଙ୍କ ଗହମ କିଣା ଯୋଜନା ସମ୍ପୂର୍ଣ୍ଣ ଭାବେ ଫେଲ୍ ମାରିଛି। ଏହାର ସିଧାସଳଖ ପ୍ରଭାବ ଏବେ ସାଧାରଣ ଲୋକଙ୍କ ଉପରେ ପଡ଼ୁଛି। ଗହମ ଏବଂ ଅଟା ଦର ହୁ ହୁ ହୋଇ ବଢ଼ୁଥିବାରୁ ଲୋକେ ମହଙ୍ଗା ଦାମ୍ରେ ଅଟା କିଣିବାକୁ ବାଧ୍ୟ ହେଉଛନ୍ତି।

ପାକିସ୍ତାନୀ ଖବରକାଗଜ ‘ଡନ୍’ (Dawn) ଅନୁଯାୟୀ, ସିନ୍ଧର ମୁଖ୍ୟମନ୍ତ୍ରୀ ସ୘ୟଦ ମୁରାଦ ଅଲ୍ଲୀ ଶାହ ବଢ଼ୁଥିବା ଦରଦାମକୁ ନେଇ ଚିନ୍ତା ପ୍ରକଟ କରିଛନ୍ତି। ସେ ମୁଖ୍ୟମନ୍ତ୍ରୀଙ୍କ ବାସଭବନରେ ଏକ ସମୀକ୍ଷା ବୈଠକ ଡକାଇଥିଲେ, ଯେଉଁଠାରେ ଅଧିକାରୀମାନେ ଜଣାଇଥିଲେ ଯେ ୪ ଜୁନ୍ ସୁଦ୍ଧା ଖାଦ୍ୟ ବିଭାଗ ମାତ୍ର ୭୯,୮୩୫.୬୬ ମେଟ୍ରିକ ଟନ୍ ଗହମ ହିଁ ସଂଗ୍ରହ କରିପାରିଛି। ସେପଟେ ସରକାର ୧୦ ଲକ୍ଷ ମେଟ୍ରିକ ଟନ୍ ଗହମ କିଣିବାକୁ ଲକ୍ଷ୍ୟ ରଖିଥିଲେ। ଅର୍ଥାତ୍ ଧାର୍ଯ୍ୟ ଲକ୍ଷ୍ୟର ୮ ପ୍ରତିଶତ ମଧ୍ୟ ପୂରଣ ହୋଇପାରି ନାହିଁ।

ଗହମ କିଣା କାହିଁକି ହୋଇପାରୁନି?

ଅଧିକାରୀମାନେ କହିଛନ୍ତି ଯେ ସରକାର ଚାଷୀଙ୍କ ପାଇଁ ଯେଉଁ ସର୍ବନିମ୍ନ ସହାୟକ ମୂଲ୍ୟ (MSP) ଧାର୍ଯ୍ୟ କରିଥିଲେ, ଖୋଲା ବଜାରରେ ତା’ଠାରୁ ଅଧିକ ଦାମ୍ ମିଳୁଛି। ତେଣୁ ଚାଷୀମାନେ ସରକାରୀ କେନ୍ଦ୍ର ବଦଳରେ ଘରୋଇ ବ୍ୟବସାୟୀଙ୍କୁ ଗହମ ବିକୁଛନ୍ତି। ଏହି କାରଣରୁ ସରକାରଙ୍କ ଗହମ ସଂଗ୍ରହ ଅଭିଯାନ ପ୍ରାୟତଃ ଫ୍ଲପ୍ ହୋଇଯାଇଛି।

ସରକାରୀ କ୍ରୟ କମ୍ ହେବା ଏବଂ କଳାବଜାରୀ (ମହଜୁଦ ରଖିବା) ବଢ଼ିବା ଯୋଗୁଁ ଖୋଲା ବଜାରରେ ଗହମର ଦାମ୍ ପ୍ରାୟ ୨୫% ପର୍ଯ୍ୟନ୍ତ ବଢ଼ିଯାଇଛି। କରାଚିରେ ୧୦୦ କିଲୋ ଗହମର ଦାମ୍ ୧୧,୧୦୦ ପାକିସ୍ତାନୀ ଟଙ୍କା ପର୍ଯ୍ୟନ୍ତ ପହଞ୍ଚିଛି। ସେହିପରି ହାଇଦ୍ରାବାଦରେ ଏହା ପ୍ରତି ୧୦୦ କିଲୋ ପିଛା ୧୦,୯00 ଟଙ୍କାରେ ବିକ୍ରି ହେଉଛି।

ଦରଦାମ ନିୟନ୍ତ୍ରଣ କରିପାରୁନାହାନ୍ତି ସରକାର

ଖୁଚୁରା ବଜାରରେ ଅଟା କିଲୋ ପ୍ରତି ୧୩୫ ରୁ ୧୪୦ ପାକିସ୍ତାନୀ ଟଙ୍କାରେ ବିକ୍ରି ହେଉଛି। ଯେଉଁଠି ସରକାର ଏହାର ସରକାରୀ ମୂଲ୍ୟ କିଲୋ ପ୍ରତି ୧୦୭ ଟଙ୍କା ଧାର୍ଯ୍ୟ କରିଥିଲେ। ବୈଠକରେ ମୁଖ୍ୟମନ୍ତ୍ରୀ କହିଛନ୍ତି ଯେ କିଛି ବ୍ୟବସାୟୀ ଗହମ ମହଜୁଦ ରଖି କୃତ୍ରିମ ଅଭାବ ସୃଷ୍ଟି କରୁଛନ୍ତି ଏବଂ ଦାମ୍ ବଢ଼ାଉଛନ୍ତି। ସେ ଅଧିକାରୀମାନଙ୍କୁ ଏଭଳି ଲୋକଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଏବଂ ବଜାର ଉପରେ ତୀକ୍ଷ୍ଣ ନଜର ରଖିବାକୁ ନିର୍ଦ୍ଦେଶ ଦେଇଛନ୍ତି।

ସରକାର ୨୦୨୫-୨୬ ଫସଲ ପାଇଁ ୧ ଅପ୍ରେଲରୁ କ୍ରୟ ଅଭିଯାନ ଆରମ୍ଭ କରିଥିଲେ। ଚାଷୀଙ୍କୁ ପ୍ରତି ୪୦ କିଲୋ ଗହମ ପିଛା ୩,୫୦୦ ପାକିସ୍ତାନୀ ଟଙ୍କାର ସହାୟକ ମୂଲ୍ୟ ଦେବାକୁ ଘୋଷଣା କରାଯାଇଥିଲା। ଏହା ବ୍ୟତୀତ ବାରଦାନା (ବସ୍ତା) ପାଇଁ ମଧ୍ୟ ଅଲଗା ପେମେଣ୍ଟର ବ୍ୟବସ୍ଥା ଥିଲା। ଏହି ଯୋଜନା ୩.୩୨ ଲକ୍ଷ ଚାଷୀଙ୍କୁ ଲାଭ ପହଞ୍ଚାଇବା ପାଇଁ ପ୍ରସ୍ତୁତ କରାଯାଇଥିଲା।