ଇରାନରେ ଭୟଙ୍କର ମରୁଡ଼ି ଯୋଗୁଁ ଗମ୍ଭୀର ଜଳ ସଙ୍କଟ ଦେଖାଦେଇଛି। ଜଳସଙ୍କଟ ଭିତରେ ଏବେ ସରକାର ପ୍ରତି ବ୍ୟକ୍ତି ପାଇଁ ପ୍ରତିଦିନ ୧୩୦ ଲିଟର ପାଣି ସୀମା  ଧାର୍ଯ୍ୟ କରିଛନ୍ତି । ଯଦି ବ୍ୟକ୍ତି ଏହାଠାରୁ ଅଧିକ ପାଣି ବ୍ୟବହାର କରନ୍ତି, ତେବେ ତାଙ୍କୁ ଜରିମାନା ଦେବାକୁ ପଡିବ। ଜଳଭଣ୍ଡାର ଗରମ ଏବଂ ଶୁଖିଯିବା ଯୋଗୁଁ ଇରାନ ସରକାର ଏହି ନିଷ୍ପତ୍ତି ନେଇଛନ୍ତି।

ଇରାନ ସରକାର ଜଳ ସଙ୍କଟକୁ ଉଲ୍ଲେଖ କରି ସମସ୍ତଙ୍କୁ ପାଣି ସଞ୍ଚୟ କରିବାକୁ ଅନୁରୋଧ କରିଛନ୍ତି। ଇରାନର ଶକ୍ତି ମନ୍ତ୍ରୀ ଆବାସ ଆଲିଆବାଦି କହିଛନ୍ତି ଯେ ବେଆଇନ ଭାବରେ ପାଣି ବ୍ୟବହାର କରୁଥିବା ଲୋକଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ନିଆଯିବ। ସରକାର କହିଛନ୍ତି ଯେ ୯୦% ଡ୍ୟାମ୍ ଶୁଖିଗଲାଣି। ଏପରି ପରିସ୍ଥିତିରେ ଗ୍ରୀଷ୍ମ ଋତୁରେ ସତର୍କତା ଅବଲମ୍ବନ କରିବାର ଆବଶ୍ୟକତା ରହିଛି। ଅନ୍ୟପଟେ ବିଶେଷଜ୍ଞମାନେ ସରକାରଙ୍କ ଉପରେ ପ୍ରଶ୍ନ ଉଠାଇଛନ୍ତି।

କାହିଁକି ଇରାନରେ ଦେଖାଦେଇଛି ଜଳ ସଙ୍କଟ?

ଇରାନର ଶକ୍ତି ମନ୍ତ୍ରଣାଳୟ ଅନୁଯାୟୀ, ଦେଶର ୯୦ ପ୍ରତିଶତ ବନ୍ଧ ଶୁଖିଗଲାଣି। ଗତ ୫ ବର୍ଷ ଧରି ଇରାନରେ ମରୁଡ଼ିର ପ୍ରଭାବ ଦେଖାଯାଉଛି। ମନ୍ତ୍ରଣାଳୟ କହିଛି ଯେ ତେହେରାନ, ଇସଫାହାନ, ରଜାଭି ଖୋରାସନ ଏବଂ ୟାଜଦ ଭଳି ପ୍ରମୁଖ ପ୍ରଦେଶରେ ଜଳ ସଙ୍କଟ ଗମ୍ଭୀର ଶ୍ରେଣୀର ରହିଛି । ରାଜଧାନୀ ତେହେରାନକୁ ପାଣି ଯୋଗାଣ କରୁଥିବା କାରାଜ ବନ୍ଧ ଏବେ କେବଳ ୬% କ୍ଷମତାରେ କାମ କରୁଛି।

ଜଳ ସଙ୍କଟର ଏକ ପ୍ରମୁଖ କାରଣ ହେଉଛି ଇରାନର ଆତ୍ମନିର୍ଭରଶୀଳ କୃଷି ବ୍ୟବସ୍ଥା। ଏହି କାରଣରୁ ଚାଷ କାର୍ଯ୍ୟରେ ପ୍ରଚୁର ପାଣି ଖର୍ଚ୍ଚ ହୁଏ। ଅନ୍ୟପକ୍ଷରେ, ଇରାନର ଜନସଂଖ୍ୟା ନିରନ୍ତର ବୃଦ୍ଧି ପାଉଛି। ସମୟାନୁସାରେ ବର୍ଷା ଅଭାବରୁ ଇରାନରେ ଜଳ ସଙ୍କଟ ଗଭୀର ହୋଇଛି। ଇରାନ ସରକାରଙ୍କ ଅନୁଯାୟୀ, ଜଳ ସଙ୍କଟ ଯୋଗୁଁ ଉର୍ମିଆ ହ୍ରଦର ଆୟତନ ୧୦୦୦ ବର୍ଗ କିଲୋମିଟରରୁ କମ୍ ହୋଇଯାଇଛି। ଗୋଟିଏ ସମୟରେ, ଏହି ହ୍ରଦକୁ ମଧ୍ୟପ୍ରାଚ୍ୟର ସବୁଠାରୁ ବଡ଼ ଲୁଣିଆ ହ୍ରଦ ଭାବରେ ବିବେଚନା କରାଯାଉଥିଲା।

ବିଶେଷଜ୍ଞମାନେ ନିଷ୍ପତ୍ତି ଉପରେ ପ୍ରଶ୍ନ ଉଠାଇଛନ୍ତି

ଇରାନ ସରକାର କହିଛନ୍ତି ଯେ ପୂର୍ବରୁ ତେହେରାନର ଡ୍ୟାମରୁ ୬୦ ପ୍ରତିଶତ ଜଳ ଯୋଗାଣ କରାଯାଉଥିଲା। ଏବେ ଏହା ୪୦ କୁ ହ୍ରାସ ପାଇଛି, ଯାହା ଯୋଗୁଁ ପାଣି ଉପରେ ପ୍ରତିବନ୍ଧକ ଲଗାଯାଇଛି। ଅନ୍ୟପଟେ ବିଶେଷଜ୍ଞମାନେ ସରକାରଙ୍କ ଏହି ନିଷ୍ପତ୍ତିକୁ ବିରୋଧ କରୁଛନ୍ତି। ତେହେରାନ ବିଶ୍ୱବିଦ୍ୟାଳୟର ଜଳସମ୍ପଦ ବିଭାଗର ପ୍ରଫେସର ବାନାଫସେ ଜାହରାଇଙ୍କ ଅନୁସାରେ, ଇରାନର ରାଜଧାନୀରେ ଜଣେ ବ୍ୟକ୍ତିଙ୍କୁ ଅତି କମରେ ୧୯୦ ଲିଟର ପାଣି ଆବଶ୍ୟକ। ସରକାର ୧୩୦ ଲିଟର ପାଣିର ମାନଦଣ୍ଡ ସ୍ଥିର କରିଛନ୍ତି। ଏହା କିପରି ସମ୍ଭବ ହେବ କଷ୍ଟକର ବୋଲି ମତପ୍ରକାଶ ପାଇଛି ।