ଇସଲାମାବାଦ: ଇରାନ ଯୁଦ୍ଧ କାରଣରୁ ସମଗ୍ର ବିଶ୍ଵରେ ଶକ୍ତି ସଙ୍କଟ ଗମ୍ଭୀର ହେବାରେ ଲାଗିଛି। ଏହା ମଧ୍ୟରେ ରବିବାର ଅପରାହ୍ନରେ ଖବର ଆସିଥିଲା ଯେ, ପାକିସ୍ତାନ ସରକାର ସ୍ଥିତିର ମୁକାବିଲା ପାଇଁ ଲକଡାଉନ ଘୋଷଣା କରିଛନ୍ତି। ଦେଖୁ ଦେଖୁ ଏହି ଖବର ସୋସିଆଲ ମିଡିଆରେ ଛାଇଗଲା। ଏବେ ଏହା ଉପରେ ସଫେଇ ଦେଇଛନ୍ତି ପାକିସ୍ତାନର ସୂଚନା ମନ୍ତ୍ରୀ ଆତାଉଲ୍ଲାହ ତାର। ସେ କହିଛନ୍ତି ଯେ ସୋସିଆଲ ମିଡିଆରେ ଘୂରି ବୁଲୁଥିବା ସ୍ମାର୍ଟ ଲକଡାଉନ୍ ରିପୋର୍ଟ ମିଥ୍ୟା। ଭାଇରାଲ୍ ହେଉଥିବା ବିଜ୍ଞପ୍ତି ନକଲି। ସେ ଏପରି ଗୁଜବରେ ବିଶ୍ୱାସ ନ କରିବାକୁ ଲୋକଙ୍କୁ ଅନୁରୋଧ କରିଛନ୍ତି। 

ସରକାର ସ୍ପଷ୍ଟ କରିଛନ୍ତି ଯେ ସ୍ମାର୍ଟ ଲକଡାଉନ୍ ଏପର୍ଯ୍ୟନ୍ତ କାର୍ଯ୍ୟକାରୀ ହୋଇନାହିଁ। ସରକାର ରାଜ୍ୟ ଏବଂ ଅଧିକାରୀଙ୍କ ସହିତ ଏ ବିଷୟରେ ଆଲୋଚନା କରୁଛନ୍ତି। ସମସ୍ତଙ୍କ ମତାମତ ପାଇବା ପରେ ହିଁ ସ୍ମାର୍ଟ ଲକଡାଉନ୍ ଉପରେ ଚୂଡ଼ାନ୍ତ ନିଷ୍ପତ୍ତି ନିଆଯିବ। 

କଣ ଆସିଥିଲା ଖବର ? 

ସୋସିଆଲ ମିଡିଆରେ ଲକଡାଉନ ସମ୍ପର୍କରେ ଏକ ପ୍ରସ୍ତାବ ଘୂରି ବୁଲୁଛି। ଏହା ଅନୁଯାୟୀ, ସାରା ଦେଶ ଶନିବାର ଏବଂ ରବିବାର ଦିନ ସମ୍ପୂର୍ଣ୍ଣ ଲକଡାଉନରେ ରହିବ। ଏହି ନିୟମ ୪ ଏବଂ ୫ ଏପ୍ରିଲ, ୨୦୨୬ ରେ କାର୍ଯ୍ୟକାରୀ ହେବ। ଲକଡାଉନ ପ୍ରତି ଶନିବାର ଦିନ ୧୨ ଟା୦୧ ରୁ ଆରମ୍ଭ ହେବ ଏବଂ ରବିବାର ରାତି ୧୧ଟା ୫୯ ପର୍ଯ୍ୟନ୍ତ ଜାରି ରହିବ। ଏହି ସମୟରେ ସମସ୍ତ ଦୋକାନ, ବଜାର, କାରଖାନା ଏବଂ ଅନ୍ୟାନ୍ୟ ବ୍ୟବସାୟ ସମ୍ପୂର୍ଣ୍ଣ ବନ୍ଦ ରହିବ। ସେବା କ୍ଷେତ୍ର ମଧ୍ୟ ବନ୍ଦ ରହିବ। ଏହି ଦିନଗୁଡ଼ିକରେ ସାର୍ବଜନୀନ କିମ୍ବା ବାଣିଜ୍ୟିକ ସ୍ଥାନରେ ବିବାହ ଏବଂ ଅନ୍ୟାନ୍ୟ କାର୍ଯ୍ୟକ୍ରମକୁ ଅନୁମତି ଦିଆଯିବ ନାହିଁ। 

ଅତ୍ୟାବଶ୍ୟକ ସେବା ଚାଲୁ ରଖିବା ପାଇଁ ନିର୍ଦ୍ଦେଶ

ପାକିସ୍ତାନରେ ହସ୍ପିଟାଲ, ଔଷଧ ଦୋକାନ ଏବଂ ଅନ୍ୟାନ୍ୟ ଅତ୍ୟାବଶ୍ୟକ ସରକାରୀ ସେବା ଖୋଲା ରହିବ। ଅତ୍ୟାବଶ୍ୟକ ଯାତ୍ରା ଏବଂ ସେବା ପ୍ରଭାବିତ ଯେମିତି ନ ହୁଏ ତାକୁ ଦୃଷ୍ଟିରେ ରଖି ବିମାନ ବନ୍ଦର, ପୋର୍ଟ ଏବଂ ରେଳ ଷ୍ଟେସନଗୁଡ଼ିକ କାର୍ଯ୍ୟ କରିବ। ସରକାର ଏହା ମଧ୍ୟ ନିଷ୍ପତ୍ତି ନେଇଛନ୍ତି ଯେ ଲକଡାଉନ ସମୟରେ ଆନ୍ତଃନଗର ରାସ୍ତା, ରାଜପଥ ଏବଂ ମୋଟରୱେ ବନ୍ଦ ରହିବ, ଯଦ୍ଵାରା ସାଧାରଣ ପରିବହନ ବାଧାପ୍ରାପ୍ତ ହେବ। ତଥାପି, ଅତ୍ୟାବଶ୍ୟକ ଯାତ୍ରା ଜାରି ରଖିବା ପାଇଁ ସରକାରୀ ବସ୍ ଗୁଡ଼ିକୁ ଏଥିରୁ ରିହାତି ଦିଆଯାଇଛି।

ଦୁଇ ଚକିଆ ଏବଂ ତିନି ଚକିଆ ଯାନର ପଞ୍ଜୀକରଣ ତ୍ୱରାନ୍ୱିତ କରିବାକୁ ମଧ୍ୟ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦିଆଯାଇଛି। ଆବଶ୍ୟକ ଲୋକଙ୍କୁ ସିଧାସଳଖ ସବସିଡି ପ୍ରଦାନ କରିପାରିବେ। ସରକାର କହିଛନ୍ତି ଯେ ଦେଶରେ ତୈଳ ଅଭାବକୁ ଦୂର କରିବା ଏବଂ ଅତ୍ୟାବଶ୍ୟକ ସମ୍ପଦ ସଂରକ୍ଷଣ କରିବା ପାଇଁ ଏହି ପଦକ୍ଷେପ ନିଆଯାଉଛି। ତଥାପି, ପ୍ରସ୍ତାବ ପାଇଁ କୌଣସି ତାରିଖ ନିର୍ଦ୍ଦିଷ୍ଟ କରାଯାଇ ନାହିଁ।