ନୂଆଦିଲ୍ଲୀ: ଆମେରିକା ଏବଂ ଇରାନ ମଧ୍ୟରେ ଦ୍ଵିତୀୟ ପର୍ଯ୍ୟାୟ ଆଲୋଚନା ଅନିଶ୍ଚିତତା ଭିତରେ ରହିଛି। କିନ୍ତୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଶାନ୍ତି ବାର୍ତ୍ତା ପାଇଁ ସକାରାତ୍ମକ ସଙ୍କେତ ଦେଇଛନ୍ତି। ସେ କହିଛନ୍ତି ଯେ ଆଲୋଚନା ସମ୍ପର୍କରେ ଭଲ ଖବର ଶୀଘ୍ର ମିଳିବ ଏବଂ ଶୁକ୍ରବାର ଉଭୟ ଦେଶ ମଧ୍ୟରେ ଆଲୋଚନା ହେବାର ସମ୍ଭାବନା ଅଛି।

ତାଙ୍କର ଏହି ବୟାନ ଏପରି ସମୟରେ ଆସିଛି ଯେତେବେଳେ ପରିସ୍ଥିତି ଅତ୍ୟନ୍ତ ଉତ୍ତେଜନାପୂର୍ଣ୍ଣ। ଯୁଦ୍ଧବିରତି, ସାମୁଦ୍ରିକ ମୁକାବିଲା ଏବଂ କୂଟନୈତିକ ଅଚଳାବସ୍ଥା ନେଇ ଇରାନ ଓ ଆମେରିକା ମଧ୍ୟରେ ମତଭେଦ ଜାରି ରହିଛି। ଟ୍ରମ୍ପଙ୍କ ସଙ୍କେତକୁ ଏକ ସମ୍ଭାବ୍ୟ କୂଟନୈତିକ ସଫଳତା ଭାବରେ ଦେଖାଯାଉଛି, ଯଦିଓ ଏପର୍ଯ୍ୟନ୍ତ କୌଣସି ସରକାରୀ ଭାବେ କିଛି ସ୍ପଷ୍ଟ କରାଯାଇ ନାହିଁ କି ସୂଚନା ଦିଆଯାଇନି।  ଯଦି ଶୁକ୍ରବାର ଆଲୋଚନା ହୁଏ, ତେବେ ଏହା ଉତ୍ତେଜନା ହ୍ରାସ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ପ୍ରମାଣିତ ହୋଇପାରେ।

ଶାନ୍ତି ଆଲୋଚନା ଉପରେ ଟ୍ରମ୍ପଙ୍କ ନୂଆ ଦାବି

ନ୍ୟୁୟର୍କ ପୋଷ୍ଟ ରିପୋର୍ଟ ଅନୁଯାୟୀ, ଆଗାମୀ ୩୬ରୁ ୭୨ ଘଣ୍ଟା ମଧ୍ୟରେ ଶାନ୍ତି ଆଲୋଚନା ଆରମ୍ଭ ହୋଇପାରେ, ଯାହା କୂଟନୈତିକ ପ୍ରୟାସକୁ ଟ୍ରାକରେ ଫେରାଇ ଆଣିପାରିବ ବୋଲି ଆଶା ସୃଷ୍ଟି ହୋଇଛି। 

ଅନ୍ୟପକ୍ଷରେ, ଇରାନ ଏହି ଦାବିଗୁଡ଼ିକୁ ସମ୍ପୂର୍ଣ୍ଣ ପ୍ରତ୍ୟାଖ୍ୟାନ କରିଛି। ଇସଲାମିକ୍ ରିଭୋଲ୍ୟୁସନାରୀ ଗାର୍ଡ କର୍ପସ ସହିତ ଜଡିତ ଏକ ଏଜେନ୍ସି ତସନିମ୍ ନ୍ୟୁଜ୍ ସୋସିଆଲ ମିଡିଆ ପ୍ଲାଟଫର୍ମ X ରେ ପୋଷ୍ଟ କରି କହିଛି ଯେ ରାଷ୍ଟ୍ରପତି ଟ୍ରମ୍ପଙ୍କ ଅସ୍ତ୍ରବିରତି ବୃଦ୍ଧି କରିବାର ଦାବି ଏକ "ମିଥ୍ୟା" ଏବଂ ଶୁକ୍ରବାର ପର୍ଯ୍ୟନ୍ତ  ଆଲୋଚନାର କୌଣସି ଯୋଜନା ନାହିଁ। ଯେତେବେଳେ ଆମେରିକା ଆଲୋଚନା ବିଷୟରେ ଆଶାବାଦର ସଙ୍କେତ ଦେଉଛି, ଇରାନ ଖୋଲାଖୋଲି ମନା କରୁଛି। ଏହି ବିରୋଧାଭା ପୂରା ସଙ୍କଟକୁ ଆହୁରି ଜଟିଳ କରି ଦେଇଛି।