ଇସଲାମାବାଦ୍‌: ଭାରତ-ବାଂଲାଦେଶ ମଧ୍ୟରେ ଉତ୍ତେଜନା ବଢ଼ୁଥିବା ବେଳେ ପାକିସ୍ତାନର ଉପପ୍ରଧାନମନ୍ତ୍ରୀ ତଥା ବୈଦେଶିକ ମନ୍ତ୍ରୀ ଇସହାକ୍ ଡାର୍ ଫେବ୍ରୁଆରିରେ ବାଂଲାଦେଶ ଗସ୍ତ କରିବେ ବୋଲି ଘୋଷଣା କରିଛନ୍ତି। ୨୦୧୨ ପରେ ଏହା ହେଉଛି କୌଣସି ପାକିସ୍ତାନୀ ମନ୍ତ୍ରୀଙ୍କ ପ୍ରଥମ ବାଂଲାଦେଶ ଗସ୍ତ। ଗତ ମାସରେ କାଇରୋରେ ଡି-୮ ଶିଖର ସମ୍ମିଳନୀ ଅବସରରେ ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ସରିଫ ଏବଂ ବାଂଲାଦେଶର ଅନ୍ତରୀଣ ସରକାରଙ୍କ ମୁଖ୍ୟ ପରାମର୍ଶଦାତା ମହମ୍ମଦ ୟୁନୁସଙ୍କ ମଧ୍ୟରେ ହୋଇଥିବା ବୈଠକର କିଛି ସପ୍ତାହ ପରେ ଡାର୍ ଏହି ଘୋଷଣା କରିଛନ୍ତି।

ଏକ ଦଶନ୍ଧି ମଧ୍ୟରେ ଡାର ପାକିସ୍ତାନର ପ୍ରଥମ ବୈଦେଶିକ ମନ୍ତ୍ରୀ ଭାବେ ଢାକା ଗସ୍ତ କରିବେ ବୋଲି ଗଣମାଧ୍ୟମ ରିପୋର୍ଟରେ କୁହାଯାଇଛି। ଏହା ପୂର୍ବରୁ ହିନା ରବ୍ବାନୀ ଖାର ପାକିସ୍ତାନର ଶେଷ ବୈଦେଶିକ ମନ୍ତ୍ରୀ ଭାବେ ୨୦୧୨ରେ ଢାକା ଗସ୍ତ କରିଥିଲେ। ଡାର୍ ଗୁରୁବାର ଇସଲାମାବାଦରେ କହିଛନ୍ତି ଯେ ସେ ଫେବ୍ରୁଆରି ୫ କିମ୍ବା ତା'ପରେ ଢାକା ଅଭିମୁଖେ ଯାତ୍ରା କରିବେ।

ବାଂଲାଦେଶରେ ୟୁନୁସଙ୍କ ସରକାର କ୍ଷମତାକୁ ଆସିବା ପରଠାରୁ ଭାରତ ବିରୋଧରେ ଲଗାତାର ବୟାନବାଜି ଚାଲିଛି। ନିକଟରେ ଅନ୍ତରୀଣ ସରକାର ଭାରତ ସରକାରଙ୍କୁ ଏକ କୂଟନୈତିକ ନୋଟ୍ ପଠାଇ ଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ୍ ହସିନାଙ୍କୁ ପ୍ରତ୍ୟର୍ପଣ କରିବାକୁ ଦାବି କରିଥିଲେ। ବାଂଲାଦେଶର ପ୍ରତିଷ୍ଠାତା ଶେଖ୍ ମୁଜିବୁର ରେହମାନ୍ଙ୍କ ଝିଅ ହସିନାଙ୍କୁ ଅଗଷ୍ଟ ୫ ତାରିଖରେ ନିଜ ଦେଶ ଛାଡ଼ି ଭାରତରେ ଆଶ୍ରୟ ନେବାକୁ ପଡ଼ିଥିଲା।

ଅନ୍ତରୀଣ ସରକାରଙ୍କ ବୈଦେଶିକ ବ୍ୟାପାର ପରାମର୍ଶଦାତା ତୌହିଦ ହୁସେନ କହିଛନ୍ତି, ଆମେ ଭାରତକୁ ଅବଗତ କରିଛୁ ଏବଂ ନ୍ୟାୟିକ ଉଦ୍ଦେଶ୍ୟରେ ଶେଖ ହସିନାଙ୍କୁ ପ୍ରତ୍ୟାବର୍ତ୍ତନ କରିବାକୁ ଅନୁରୋଧ କରିଛୁ। ଏହା ଏକ ନୋଟ୍ ଓ୍ଵାବଲ୍ (କୂଟନୈତିକ ନୋଟ୍) ମାଧ୍ୟମରେ ସୂଚନା ଦିଆଯାଇଛି।

ଏହା ପୂର୍ବରୁ ଦେଶର ଗୃହ ପରାମର୍ଶଦାତା ଲେଫ୍ଟନାଣ୍ଟ ଜେନେରାଲ (ଅବସରପ୍ରାପ୍ତ) ମହମ୍ମଦ ଜାହାଙ୍ଗୀର ଆଲାମ ଚୌଧୁରୀ କହିଛନ୍ତି ଯେ ତାଙ୍କ ମନ୍ତ୍ରଣାଳୟ ଭାରତରୁ ବହିଷ୍କୃତ ପ୍ରଧାନମନ୍ତ୍ରୀଙ୍କୁ ଫେରାଇ ଆଣିବା ପାଇଁ ହୁସେନଙ୍କ କାର୍ଯ୍ୟାଳୟକୁ ଚିଠି ଲେଖିଛି।

ଦେଶର ଅଗ୍ରଣୀ ବଙ୍ଗଳା ଦୈନିକ ପ୍ରଥମ ଆଲୋକୁ ଚୌଧୁରୀ କହିଛନ୍ତି, ତାଙ୍କ ପ୍ରତ୍ୟର୍ପଣ ସମ୍ପର୍କରେ ଆମେ ବୈଦେଶିକ ବ୍ୟାପାର ମନ୍ତ୍ରଣାଳୟକୁ ଏକ ଚିଠି ପଠାଇଛୁ। ଏହି ପ୍ରକ୍ରିୟା ଏବେ ବି ଜାରି ରହିଛି। ଆମ ସହ ସେମାନଙ୍କର ପ୍ରତ୍ୟର୍ପଣ ଚୁକ୍ତି ରହିଛି।

ଶେଖ୍ ହସିନାଙ୍କ ଶାସନର ପତନ ପରଠାରୁ ବାଂଲାଦେଶରେ ସଂଖ୍ୟାଲଘୁ, ବିଶେଷକରି ହିନ୍ଦୁ ସମ୍ପ୍ରଦାୟ ଏବଂ ସେମାନଙ୍କ ଧାର୍ମିକ ସ୍ଥଳଗୁଡ଼ିକୁ ଟାର୍ଗେଟ କରାଯାଇଛି। ମହମ୍ମଦ ୟୁନୁସଙ୍କ ନେତୃତ୍ବାଧୀନ ଅନ୍ତରୀଣ ସରକାର ସଂଖ୍ୟାଲଘୁଙ୍କୁ ସୁରକ୍ଷା ପ୍ରଦାନ କରିବାରେ ସକ୍ଷମ ହୋଇନଥିବା ଅଭିଯୋଗ ହୋଇଛି।

ହିନ୍ଦୁଙ୍କ ସମେତ ସଂଖ୍ୟାଲଘୁଙ୍କ ବିରୋଧରେ ଧମକ ଓ ଟାର୍ଗେଟ୍ ଆକ୍ରମଣ ପ୍ରସଙ୍ଗ ଭାରତ କ୍ରମାଗତ ଭାବେ ବାଂଲାଦେଶ ସରକାରଙ୍କ ନିକଟରେ ଉଠାଇ ଆସୁଛି।