ଟୋକିଓ: ଜାପାନରେ ସୋମବାର ଭୂକମ୍ପର ଜୋରଦାର ଝଟକା ଅନୁଭୂତ ହୋଇଛି । ରିକ୍ଟର ସ୍କେଲରେ ଏହାର ତୀବ୍ରତା ୭.୪ ରେକର୍ଡ କରାଯାଇଛି । ଭୂକମ୍ପର କେନ୍ଦ୍ରସ୍ଥଳ ସାନରିକୁର ସମୁଦ୍ରତଟରୁ ପ୍ରାୟ ୧୦୦ କିମି ଦୂର ପାଣି ଭିତରେ ରହିଛି । ଭୂକମ୍ପର ଗଭୀରତା ଜଳସ୍ଥରରୁ ୧୦ କିଲୋମିଟର ଭିତରେ ମପା ଯାଇଛି । ଏହି ଝଟକା ପରେ ଜାପାନରେ ଆଲର୍ଟ ଜାରି କରାଯାଇଛି । ଜାପାନର ପାଣିପାଗ ବିଭାଗର କହିବା କଥା ଭୂକମ୍ପ ପରେ ଜାପାନରେ ସୁନାମୀ ଆଲର୍ଟ ଜାରି କରାଯାଇଛି । 

ପ୍ରଧାନମନ୍ତ୍ରୀ କାର୍ଯ୍ୟାଳୟ ପକ୍ଷରୁ ଏହି ପ୍ରାକୃତିକ ବିପର୍ଯ୍ୟୟକୁ ନେଇ ଏକ ସ୍ୱତନ୍ତ୍ର ଟିମ୍ ଗଠନ କରାଯାଇଛି । ଏହା ପୂର୍ବରୁ ଜାପାନରେ ୨୦୧୧ରେ ୯.୦ ତୀବ୍ରତାର ଭୂକମ୍ପ ଝଟକା ଅନୁଭୂତ ହୋଇଥିଲା । ଭୂକମ୍ପ ଏବଂ ସୁନାମୀ ଯୋଗୁଁ ୧୮ ହଜାରରୁ ଅଧିକ ଲୋକଙ୍କ ମୃତ୍ୟୁ ଘଟିଥିଲା । ପାଣିପାଗ ବିଭାଗ ଅନୁଯାୟୀ, ସୋମବାର ଅନୁଭୂତ ଭୂକମ୍ପର ପ୍ରଭାବରେ ସୁନାମୀ ଆସିପାରେ । ଲହଡି ଉଚ୍ଚତା ପ୍ରାୟ ୧୦ ଫୁଟ୍ ରହିପାରେ ।

ଭୂମିକମ୍ପ ସ୍ଥାନୀୟ ସମୟ ସନ୍ଧ୍ୟା ୪ଟା ୫୩ ମିନିଟରେ ଅନୁଭୂତ ହୋଇଥିଲା । ଉତ୍ତତ ଇଭାତେ ପ୍ରାନ୍ତର ପ୍ରଶାନ୍ତ ମହାସାଗର କ୍ଷେତ୍ରରେ ହୋଇଥିବା ଏହି ଭୂକମ୍ପର ପ୍ରଭାବ ବହୁ ଦୂର ପର୍ଯ୍ୟନ୍ତ ଅନୁଭୂତ ହୋଇଛି । ଏହାର ଝଟକା ଏତେ ତୀବ୍ର ଥିଲା ଯେ, ଶହ ଶହ କିଲୋମିଟର ଦୂର ଟୋକିଓର ବଡ ବଡ କୋଠା ଦୋହଲିବାରେ ଲାଗିଥିଲା । 

ସୁନାମୀ ଚେତାବନୀ

ବିଭାଗ କହିଛି ଯେ, ସୁନାମୀର ଲହର କିଛି ସମୟରେ ଉତ୍ତର ତଟ ପର୍ଯ୍ୟନ୍ତ ପହଞ୍ଚିପାରେ । ସମୁଦ୍ର ଉପକୂଳବର୍ତ୍ତୀ ଲୋକଙ୍କୁ ସୁରକ୍ଷିତ ଏବଂ ନିରାପଦ ସ୍ଥାନକୁ ଚାଲି ଯିବାକୁ ପରାମର୍ଶ ଦିଆଯାଇଛି । ସୁନାମୀର ବଡ ଲହଡି କାରଣରୁ ବ୍ୟାପକ କ୍ଷୟକ୍ଷତି ଘଟିପାରେ । ଏପରିକି ସୁନାମୀ ଲହଡି ବାରମ୍ବାର ସମୁଦ୍ରକୂଳରେ ମାଡ ହୋଇପାରେ ବୋଲି ବିଭାଗ ପକ୍ଷରୁ ସତର୍କ କରାଯାଇଛି ।