ନୂଆଦିଲ୍ଲୀ, ଜୁଲାଇ ୨୪ (ଖବର ଓଡ଼ିଶା): ବିଶ୍ୱ ସ୍ୱାସ୍ଥ୍ୟ ସଂଗଠନ (ହୁ) ମଙ୍କିପକ୍ସକୁ ନେଇ ଗ୍ଲୋବାଲ ହେଲ୍ଥ ଇମାରଜେନ୍ସି ଜାରି କରିଦେଇଛି । ବିଶ୍ୱ ସ୍ୱାସ୍ଥ୍ୟ ସଂଗଠନରେ ମହାନିର୍ଦ୍ଦେଶକ ଡ. ଟେଡ୍ରୋସ ଆଦନମ ଘେବ୍ରେୟସସ କହିଛନ୍ତି ଯେ, ମଙ୍କିପକ୍ସର ପ୍ରକୋପ ଅନ୍ତର୍ଜାତୀୟ ସ୍ତରରେ ଚିନ୍ତା କରିବାର ବିଷୟ । ସର୍ବସାଧାରଣଙ୍କ ସ୍ୱାସ୍ଥ୍ୟକୁ ଦୃଷ୍ଟିରେ ରଖି ଜରୁରୀକାଳୀନ ଲାଗୁ କରାଯାଇଛି । ମଙ୍କିପକ୍ସ ଏବେ ୬୮ଟି ଦେଶରେ ସକ୍ରିୟ ଥିବା ଜଣାପଡ଼ିଛି ।
ଗୋଟିଏ ମାସରେ ୪୭ଟି ଦେଶରେ ମଙ୍କିପକ୍ସ ୩୦୪୦ ଜଣଙ୍କର ଠାରେ ଚିହ୍ନଟ ହୋଇଛି । ଏହା ୫ଟି ଦେଶରେ ସର୍ବାଧିକ ବ୍ୟାପିଛି । ସ୍ପେନରେ ସର୍ବାଧିକ ୩୧୨୫ ଲୋକ ମଙ୍କିପକ୍ସ ଚିହ୍ନଟ ହୋଇଛନ୍ତି । ଏହା ପରେ ଆମେରିକାରେ ୨୮୯୦, ଜର୍ମାନୀରେ ୨୨୬୮, ବ୍ରିଟେନରେ ୨୨୦୮ ଓ ଫ୍ରାନ୍ସରେ ୧୫୬୭ ଜଣ ଏହି ସଂକ୍ରମଣର ଶିକାର ହୋଇଛନ୍ତି । ଆମେରିକୀୟ ସ୍ୱାସ୍ଥ୍ୟ ସଂସ୍ଥା ସିସିଜ କଣ୍ଟ୍ରୋଲ ଆଣ୍ଡ ପ୍ରିଭେନସନ (ସିଡିସି)ର ୱେବସାଇଟ ଅନୁସାରେ ଏପର୍ଯ୍ୟନ୍ତ ମଙ୍କିପକ୍ସ ୭୪ଟି ଦେଶରେ ବ୍ୟାପିଛି । ମୋଟ ସଂକ୍ରମିତଙ୍କ ସଂଖ୍ୟା ୧୬ ହଜାର ୮୩୬ । ଏହି ସଂକ୍ରମଣ ଯୋଗୁଁ ୫ ଜଣଙ୍କର ମୃତ୍ୟୁ ମଧ୍ୟ ହୋଇଛି ।
ସିଡିସି ରିପୋର୍ଟ ଅନୁସାରେ ନେଦରଲାଣ୍ଡରେ ୭୧୨, କାନାଡାରେ ୬୮୧, ବ୍ରାଜିଲରେ ୫୯୨, ଇଟାଲିରେ ୪୦୭, ବେଲଜିୟମରେ ୩୧୧, ସୁଇଜରଲାଣ୍ଡରେ ୨୧୬, ପେରୁରେ ୧୪୩, ଡେନମାର୍କରେ ୧୦୭, ଇସ୍ରାଏଲରେ ୧୦୫ ଓ ନାଇଜେରିଆରେ ୧୦୧ ମଙ୍କିପକ୍ସ ଆକ୍ରାନ୍ତ ଚିହ୍ନଟ ହୋଇଛନ୍ତି ।