ନୂଆଦିଲ୍ଲୀ: ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ଶୀର୍ଷସ୍ତରରେ ପହଞ୍ଚିଛି। ପାକିସ୍ତାନ ବିପକ୍ଷରେ କଡ଼ା ଟକ୍କର ଦେବା ଆରମ୍ଭ କରିଛି ଭାରତୀୟ ସେନା। ଜମ୍ମୁ କଶ୍ମୀର, ପଞ୍ଜାବ ଏବଂ ରାଜସ୍ଥାନର ସୀମାନ୍ତ ଅଞ୍ଚଳରେ ଡ୍ରୋନ ଆକ୍ରମଣ ଏବଂ ଗୁଳିଚାଳନା ହୋଇଥିଲା। ଶନିବାର ସକାଳେ ପାକିସ୍ତାନର ଅନେକ ବିମାନବନ୍ଦରରେ ଶକ୍ତିଶାଳୀ ବିସ୍ଫୋରଣ ଘଟିଥିବା ସୂଚନା ମିଳିଛି, ଯେଉଁଥିରେ ରାଜଧାନୀ ଇସଲାମାବାଦ ନିକଟରେ ଥିବା ଏକ ପ୍ରମୁଖ ପ୍ରତିଷ୍ଠାନ ମଧ୍ୟ ଅନ୍ତର୍ଭୁକ୍ତ।

ଏୟାରବେସରେ ବିସ୍ଫୋରଣ ପରେ, ପାକିସ୍ତାନ ସରକାର ଦେଶର ଆକାଶପଥକୁ ସମସ୍ତ ବେସାମରିକ ଏବଂ ବାଣିଜ୍ୟିକ ପରିବହନ ପାଇଁ ବନ୍ଦ କରିଦେଇଥିଲେ।

ପାକିସ୍ତାନୀ ସେନା ଦାବି କରିଛି ଯେ ବିସ୍ଫୋରଣଗୁଡ଼ିକ ତିନୋଟି ବାୟୁସେନା ପ୍ରତିଷ୍ଠାନରେ ଘଟିଛି, ଯେଉଁଥିରେ ରାୱଲପିଣ୍ଡିରେ ଥିବା ନୁର ଖାନ ବାୟୁସେନା ଘାଟି ମଧ୍ୟ ଅନ୍ତର୍ଭୁକ୍ତ, ଏହା ଇସଲାମାବାଦରୁ ୧୦ କିଲୋମିଟରରୁ କମ୍ ଦୂରରେ ଏବଂ ଦେଶର ସାମରିକ ମୁଖ୍ୟାଳୟ ସଂଲଗ୍ନ ଏକ ପ୍ରମୁଖ ସ୍ଥାନ।

ପାକିସ୍ତାନୀ ଗଣମାଧ୍ୟମ ଏବଂ ସୋସିଆଲ ମିଡିଆରେ ପ୍ରସାରିତ ଅନେକ ଭିଡିଓରେ ନୁର ଖାନ ବାୟୁସେନା ଘାଟିରେ ଏକ ବଡ଼ ବିସ୍ଫୋରଣ ପରେ ନିଆଁ ଲାଗିଥିବା ଦେଖାଯାଇଥିଲା। ପାକିସ୍ତାନୀ ଗଣମାଧ୍ୟମ ଅନୁଯାୟୀ, ସାରା ରାତି ଭାରତ ପକ୍ଷରୁ ନିରନ୍ତର ଏବଂ ଶକ୍ତିଶାଳୀ ବିସ୍ଫୋରଣ ହୋଇଥିଲା।

ଅଧିକ ପଢ଼ନ୍ତୁ: କ୍ରମାଗତ ତୃତୀୟ ଦିନରେ ଆକ୍ରମଣ ଉଦ୍ୟମ