ୱାଶିଂଟନ: ବିଶ୍ୱରେ ପ୍ରଥମ ଥର ପାଇଁ ଗୁରୁବାର ଦୁଇ ଜଣ ମହାକାଶଚାରୀ 'ପ୍ରାଇଭେଟ୍ ସ୍ପେସ୍ ୱାକ୍' କରି ଇତିହାସ ରଚିଛନ୍ତି। ଏମାନଙ୍କ ମଧ୍ୟରେ ଅଛନ୍ତି କୋଟିପତି ଉଦ୍ୟୋଗୀ ଜାରେଡ୍ ଇସାକମ୍ୟାନ୍ ଏବଂ ସ୍ପେସ୍ ଏକ୍ସ କର୍ମଚାରୀ ସାରା ଗିଲିସ୍। ଏହା ପୂର୍ବରୁ ବିଭିନ୍ନ ଦେଶର ସରକାରଙ୍କ ଦ୍ୱାରା ପଠାଯାଇଥିବା ମହାକାଶଚାରୀ ମହାକାଶକୁ ଚାଲି ଆସିଥିଲେ।

ସ୍ପେସ୍ ଏକ୍ସର ପୋଲାରିସ୍ ଡନ୍ ଅଭିଯାନର ଏକ ଅଂଶ ଭାବରେ ୪ ଜଣ ମହାକାଶଚାରୀ ମଙ୍ଗଳବାର ସ୍ପେସ୍ ଏକ୍ସ କ୍ରୁ ଡ୍ରାଗନ୍ କ୍ୟାପସୁଲରେ ମହାକାଶ ଅଭିମୁଖେ ଯାତ୍ରା କରିଛନ୍ତି। ସେମାନଙ୍କ ମଧ୍ୟରେ ଇସାକମ୍ୟାନ୍ ଓ ଗିଲିସ୍, ଆମେରିକା ବାୟୁସେନାର ଅବସରପ୍ରାପ୍ତ ଲେଫ୍ଟନାଣ୍ଟ କର୍ଣ୍ଣେଲ ସ୍କଟ୍ ପୋଏଟ୍ ଏବଂ ସ୍ପେସ୍ ଏକ୍ସର ଅନ୍ୟ ଜଣେ କର୍ମଚାରୀ ଆନ୍ନା ମେନନ୍ ରହିଛନ୍ତି।

ଇସାକମ୍ୟାନ୍ ଓ ଗିଲିସ୍ ପୃଥିବୀଠାରୁ ପ୍ରାୟ ୭୩୦ କିଲୋମିଟର ଉଚ୍ଚରେ ମହାକାଶରେ ବୁଲିଥିଲେ। ଉଭୟ ଯାତ୍ରୀ ଅଲଗା ଅଲଗା ସ୍ପେସ୍ ୱାକ୍ କରିଥିଲେ। ଦୁହେଁ କ୍ରୁ ଡ୍ରାଗନ୍ କ୍ୟାପସୁଲ ବାହାରେ ପ୍ରାୟ ୧୦ ମିନିଟ୍ ବିତାଇଥିଲେ। ସେହି ସମୟରେ ଉଭୟଙ୍କୁ କ୍ୟାପସୁଲରେ ସଂଯୋଗ କରାଯାଇଥିଲା। ଅନ୍ୟ ଦୁଇ ଜଣ ଯାତ୍ରୀ ପୋଟେଟ୍ ଏବଂ ଆନ୍ନା ମେନନ୍ କ୍ୟାପସୁଲରେ ବସିଥିଲେ। ସମଗ୍ର ପ୍ରକ୍ରିୟା ଏକ ଘଣ୍ଟା ୪୬ ମିନିଟ୍ ଧରି ଚାଲିଥିଲା। 

ପୂର୍ବ ସମୟ ସକାଳ ୬ଟା ୫୨ମିନିଟରେ ଇସାକମ୍ୟାନ୍ ପ୍ରଥମେ ବାହାରିଥିଲେ ଏବଂ ବିଶ୍ୱର ପ୍ରଥମ ବ୍ୟକ୍ତି ଭାବେ ଘରୋଇ ସ୍ପେସ୍ ୱାକ୍ କରିଥିଲେ। ଏହାପରେ ସ୍ପେସ୍ ଏକ୍ସ ଇଞ୍ଜିନିୟର ସାରା ଗିଲିସ୍ ମହାକାଶକୁ ଯାଇଥିଲେ। ଏହାର ସିଧା ପ୍ରସାରଣ କରାଯାଇଥିଲା। ଏହି ଅଭିଯାନରେ ଏକ ପତଳା ସ୍ପେସ୍ ସୁଟ୍ ଏବଂ କ୍ରୁ ଡ୍ରାଗନ୍ କ୍ୟାବିନ୍ କୁ ସମ୍ପୂର୍ଣ୍ଣ ଭାବେ ନିଷ୍କ୍ରିୟ କରିବା ପାଇଁ ଏକ ପ୍ରକ୍ରିୟା ସମେତ ଉପକରଣପରୀକ୍ଷା କରାଯାଇଥିଲା। ଭବିଷ୍ୟତର ଘରୋଇ ମହାକାଶ ଅଭିଯାନରେ ଏହି ଜ୍ଞାନକୌଶଳବ୍ୟବହାର କରାଯାଇପାରିବ।

ଆମେରିକାର ମହାକାଶ ଏଜେନ୍ସି ନାସା ପ୍ରଶାସକ ବିଲ୍ ନେଲସନ ଏହାକୁ ଏକ ବଡ଼ ସଫଳତା ବୋଲି ବର୍ଣ୍ଣନା କରିଛନ୍ତି। ସାମାଜିକ ଗଣମାଧ୍ୟମରେ ପୋଷ୍ଟ କରାଯାଇଥିବା ସ୍ପେସ୍ ଏକ୍ସ, ପୋଲାରିସ୍ ଡନ୍ ସ୍ପେସ୍ ୱାକ୍ ସମ୍ପୂର୍ଣ୍ଣ ହୋଇଛି। ପ୍ରଥମ ଥର ପାଇଁ ବାଣିଜ୍ୟିକ ମହାକାଶଚାରୀମାନେ କୌଣସି ବାଣିଜ୍ୟିକ ମହାକାଶଯାନରୁ ସ୍ପେସ୍ ୱାକ୍ ଶେଷ କରିଛନ୍ତି।

ଏଲନ୍ ମସ୍କଙ୍କ କମ୍ପାନି ସ୍ପେସ୍ ଏକ୍ସର ଏହା ସବୁଠାରୁ ବିପଦପୂର୍ଣ୍ଣ ସ୍ପେସ୍ ଟ୍ରିପ୍। ସ୍ପେସ୍ ଏକ୍ସ ହେଉଛି ଏକମାତ୍ର ଘରୋଇ କମ୍ପାନୀ ଯାହା ନିୟମିତ ଭାବରେ ମନୁଷ୍ୟଙ୍କୁ ପୃଥିବୀ କକ୍ଷପଥକୁ ପଠାଇବା ଏବଂ ଫେରିବାରେ ସକ୍ଷମ। ଶିଳ୍ପପତି ଜାରେଡ୍ ଇସାକମ୍ୟାନ୍ ପୋଲାରିସ୍ ଏହି ମିଶନପାଇଁ ପାଣ୍ଠି ଯୋଗାଉଥିଲେ ହେଁ ସେ ପାଣ୍ଠି ବାବଦରେ ସବିଶେଷ ତଥ୍ୟ ଦେଇନାହାନ୍ତି।

ଅଧିକ ପଢ଼ନ୍ତୁ: ଝିଅର ମୁଣ୍ଡ ଉପରେ ସିସିଟିଭି କ୍ୟାମେରା ଲଗାଇଦେଲେ ବାପା