ନୂଆଦିଲ୍ଲୀ: ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ସ୍ପଷ୍ଟ କରିଛନ୍ତି ଯେ ସେ ଇରାନର ପରମାଣୁ କାର୍ଯ୍ୟକ୍ରମ କିମ୍ବା ତୈଳ କାରଖାନା ଉପରେ ଆକ୍ରମଣ କରିବେ ନାହିଁ। ତେବେ ଇସ୍ରାଏଲ ଯେକୌଣସି ସମୟରେ ଇରାନର ସାମରିକ ଘାଟି ଉପରେ ଆକ୍ରମଣ କରିବାକୁ ପ୍ରସ୍ତୁତ ବୋଲି ସେ କହିଛନ୍ତି। ରିପୋର୍ଟ ଅନୁଯାୟୀ, ନଭେମ୍ବର ୫ ପୂର୍ବରୁ ଇସ୍ରାଏଲ ଇରାନ ଉପରେ ଆକ୍ରମଣ କରିବାକୁ ପ୍ରସ୍ତୁତି ଚଳାଇଛି।

ୱାଶିଂଟନ ପୋଷ୍ଟ ଅନୁଯାୟୀ, ଗତ ସପ୍ତାହରେ ଆମେରିକା ରାଷ୍ଟ୍ରପତି ଜୋ ବାଇଡେନ ଏବଂ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କ ମଧ୍ୟରେ କଥାବାର୍ତ୍ତା ହୋଇଥିଲା। ଏହି ସମୟରେ ଦୁଇ ନେତା ଇରାନ ଉପରେ ପ୍ରତିଆକ୍ରମଣର ବିକଳ୍ପ ଉପରେ ଆଲୋଚନା କରିଥିଲେ। ବାଇଡେନ୍ ଖୋଲାଖୋଲି ଭାବେ କହିଛନ୍ତି ଯେ ସେ ଇରାନର ପରମାଣୁ ଏବଂ ତୈଳ କାରଖାନା ଉପରେ ଆକ୍ରମଣକୁ ସମର୍ଥନ କରିବେ ନାହିଁ।

ସେପଟେ ଇରାନର ତୈଳ ଓ ପରମାଣୁ କାର୍ଯ୍ୟକ୍ରମ ଉପରେ ଇସ୍ରାଏଲ ଆକ୍ରମଣ କରିବ ନାହିଁ ବୋଲି ନେତାନ୍ୟାହୁ ବାଇଡେନଙ୍କୁ କହିଛନ୍ତି। ୱାଶିଂଟନ ପୋଷ୍ଟଦୁଇ ଜଣ ଅଜ୍ଞାତ ଅଧିକାରୀଙ୍କ ବୟାନ ଦେଇ କହିଛି ଯେ ନେତନ୍ୟାହୁ ବାଇଡେନଙ୍କୁ କହିଛନ୍ତି ଯେ ଇସ୍ରାଏଲ ଇରାନର ସାମରିକ ଟାର୍ଗେଟ ଉପରେ ଆକ୍ରମଣ କରିବାକୁ ପ୍ରସ୍ତୁତ ଅଛି।

ଆମେରିକା ଓ ଇସ୍ରାଏଲ ଏକାସାଙ୍ଗରେ ଇରାନ ଉପରେ ଆକ୍ରମଣ ପାଇଁ ଯୋଜନା କରୁଛନ୍ତି। ବେଞ୍ଜାମିନ ନେତାନ୍ୟାହୁ କହିଛନ୍ତି ଯେ ଇସ୍ରାଏଲ ଏପରି ଆକ୍ରମଣ ଯୋଜନା କରିବାକୁ ରାଜି ହୋଇଛି ଯାହା ଦ୍ୱାରା ଆମେରିକା ରାଷ୍ଟ୍ରପତି ନିର୍ବାଚନ ଉପରେ କୌଣସି ପ୍ରତିକୂଳ ପ୍ରଭାବ ପଡିବ ନାହିଁ ।

ଯଦି ଇରାନର ତୈଳ କାରଖାନା ଉପରେ ଆକ୍ରମଣ ହୁଏ, ତେବେ ବିଶ୍ୱରେ ତୈଳ ଦର ବଢ଼ିବା ନିଶ୍ଚିତ ବୋଲି ବିଶ୍ୱାସ କରାଯାଉଛି। ଯଦି ଏପରି ହୁଏ ତେବେ ଡେମୋକ୍ରାଟିକ୍ ପ୍ରାର୍ଥୀ କମଳା ହାରିସଙ୍କୁ ଜନଅସନ୍ତୋଷର ଶିକାର ହେବାକୁ ପଡ଼ିପାରେ। ଜଣେ ଅଧିକାରୀଙ୍କ କହିବା ନୁସାରେ, ଦୁର୍ବଳତାକୁ ଏଡ଼ାଇବା ପାଇଁ ନଭେମ୍ବର ୫ରେ ଆମେରିକା ରାଷ୍ଟ୍ରପତି ନିର୍ବାଚନ ପୂର୍ବରୁ ଇସ୍ରାଏଲ ଇରାନ ଉପରେ ଆକ୍ରମଣ କରିବ।

ଅଧିକ ପଢ଼ନ୍ତୁ: ଲେବାନନ୍‌ର ବେକା ଉପତ୍ୟକାକୁ ଧ୍ୱଂସ କରିବୁ