ନୂଆଦିଲ୍ଲୀ: ଆମେରିକା, ଇସ୍ରାଏଲ ଏବଂ ଇରାନ ମଧ୍ୟରେ ଯୁଦ୍ଧ ସମଗ୍ର ବିଶ୍ଵରେ ଇନ୍ଧନ ସଙ୍କଟ ସୃଷ୍ଟି କରିଛି। ଆମର ପଡ଼ୋଶୀ ପାକିସ୍ତାନ ପରେ ନେପାଳରେ  ମଧ୍ୟ ଏହାର ପ୍ରଭାବ ପଡ଼ିଛି। ପଡ଼ୋଶୀ ନେପାଳରେ ପେଟ୍ରୋଲ ଏବଂ ଡିଜେଲର ଘୋର ଅଭାବ ହେତୁ, ବାଲେନ ଶାହ ସରକାର ଏକ ବଡ଼ ନିଷ୍ପତ୍ତି ନେଇଛନ୍ତି। ଏହି ସଙ୍କଟର ସମାଧାନ ପାଇଁ, ସରକାର ସପ୍ତାହରେ ଦୁଇ ଦିନ ଛୁଟି ଘୋଷଣା କରିବାକୁ ନିଷ୍ପତ୍ତି ନେଇଛନ୍ତି। 

ସରକାରଙ୍କ ଅନୁଯାୟୀ, ସରକାରୀ କାର୍ଯ୍ୟାଳୟ ଏବଂ ଶିକ୍ଷାନୁଷ୍ଠାନଗୁଡ଼ିକରେ ଶନିବାର ଏବଂ ରବିବାର ସାପ୍ତାହିକ ଛୁଟି ରହିବ।

ନେପାଳ ସରକାରଙ୍କ ମୁଖପାତ୍ର ଏବଂ ଶିକ୍ଷା ମନ୍ତ୍ରୀ ସସ୍ମିତ ପୋଖରେଲଙ୍କ ଅନୁସାରେ, ସରକାର କାର୍ଯ୍ୟାଳୟ ସମୟକୁ ସକାଳ ୯ଟାରୁ ସନ୍ଧ୍ୟା ୫ଟା ପର୍ଯ୍ୟନ୍ତ ପରିବର୍ତ୍ତନ କରିଛନ୍ତି। ସେ କହିଛନ୍ତି, ଇନ୍ଧନ ଯୋଗାଣ ସମସ୍ୟା ଯୋଗୁଁ ଏହି ନିଷ୍ପତ୍ତି ନିଆଯାଇଛି ଏବଂ ସୋମବାରଠାରୁ ନୂତନ ବ୍ୟବସ୍ଥା କାର୍ଯ୍ୟକାରୀ ହେବ। ପେଟ୍ରୋଲିୟମ ଅଭାବକୁ ଦୃଷ୍ଟିରେ ରଖି ସରକାରଙ୍କ କ୍ୟାବିନେଟ୍ ବୈଠକରେ ଏହି ନିଷ୍ପତ୍ତିକୁ ଅନୁମୋଦନ କରାଯାଇଛି।  ପୁରୁଣା ପେଟ୍ରୋଲ ଏବଂ ଡିଜେଲ ଯାନଗୁଡ଼ିକୁ ବୈଦ୍ୟୁତିକ ଯାନରେ ପରିଣତ କରିବା ଉପରେ ମଧ୍ୟ ଆଲୋଚନା ହୋଇଛି ଏବଂ ଏହି ପରିବର୍ତ୍ତନକୁ ସହଜ କରିବା ପାଇଁ ଆବଶ୍ୟକୀୟ ଆଇନଗତ ବ୍ୟବସ୍ଥା କରାଯିବ।

ଖୁସି ଖବର! ଏଲପିଜି ଟ୍ୟାଙ୍କର୍ ‘ଗ୍ରୀନ୍ ସାନଭିକ୍ଷ ଅତିକ୍ରମ କଲା ହର୍ମୁଜ୍, ଦିନକ ପରେ ପହଞ୍ଚିବ ମୁମ୍ବାଇ

ସରକାରଙ୍କ ଉଦ୍ଦେଶ୍ୟ କ’ଣ?

ସସ୍ମିତ ପୋଖରେଲ କହିଛନ୍ତି, ରବିବାର ବସିଥିବା ମନ୍ତ୍ରୀ ପରିଷଦ ବୈଠକରେ ଆବଶ୍ୟକୀୟ ଆଇନଗତ ପ୍ରତିବନ୍ଧକ ଦୂର କରିବା ଏବଂ ଉପଯୁକ୍ତ ବ୍ୟବସ୍ଥା କରିବାକୁ ସମ୍ପୃକ୍ତ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦିଆଯାଇଛି। ପରିବେଶ ସୁରକ୍ଷା ଏବଂ ଇନ୍ଧନ ବ୍ୟବହାର ହ୍ରାସ କରିବା ଲକ୍ଷ୍ୟରେ ଏହି ନିଷ୍ପତ୍ତି ନିଆଯାଇଛି।

ବୈଦ୍ୟୁତିକ ଯାନଗୁଡ଼ିକ ଇନ୍ଧନ ନିର୍ଭରତା ହ୍ରାସ କରିବ

ମୁଖପାତ୍ର ପୋଖରେଲ କହିଛନ୍ତି ଯେ ଡିଜେଲ ଏବଂ ପେଟ୍ରୋଲ ଯାନଗୁଡ଼ିକୁ ବୈଦ୍ୟୁତିକ ଯାନରେ ପରିବର୍ତ୍ତନ କରିବା ପାଇଁ ଆବଶ୍ୟକୀୟ ଆଇନଗତ ଢାଞ୍ଚା ପ୍ରସ୍ତୁତ କରାଯିବ। ଏହା ଇନ୍ଧନ ନିର୍ଭରତା ହ୍ରାସ କରିବ ଏବଂ ନେପାଳର ନବୀକରଣୀୟ ଶକ୍ତି ବ୍ୟବହାରକୁ ପ୍ରୋତ୍ସାହିତ କରିବ। ସରକାର ବର୍ତ୍ତମାନର ସଙ୍କଟକୁ ଦୃଷ୍ଟିରେ ରଖି ଏହି ନିଷ୍ପତ୍ତି ନେଇଛନ୍ତି। ଭବିଷ୍ୟତରେ, ଯେତେବେଳେ ଏହି ସଙ୍କଟ ଦୂର  ହେବ ପେଟ୍ରୋଲ ଏବଂ ଡିଜେଲ ଯାନ ମାଲିକମାନେ ମଧ୍ୟ ଆଶ୍ୱସ୍ତି ପାଇବେ। ତଥାପି, ବର୍ତ୍ତମାନର ସଙ୍କଟକୁ ଦୃଷ୍ଟିରେ ରଖି, ସରକାରଙ୍କ ଧ୍ୟାନ ବୈଦ୍ୟୁତିକ ଯାନ ଉପରେ ରହିଛି।