ନୂଆଦିଲ୍ଲୀ: ମଣିଷ ଜୀବନରେ ଖୁସି ରହିବା ପାଇଁ ସବୁଠୁ ଅଧିକ କ’ଣ ଦରକାର? ଟଙ୍କା, ସଫଳତା ନା ସୁସ୍ଥ ଶରୀର? ଏହି ପ୍ରଶ୍ନର ଉତ୍ତର ଖୋଜିବା ପାଇଁ ବୈଜ୍ଞାନିକମାନେ ଦୀର୍ଘ ୮୮ ବର୍ଷ ଧରି ଏକ ଅଧ୍ୟୟନ ଚଳାଇଥିଲେ। ହାର୍ଭାର୍ଡ ୟୁନିଭରସିଟି ଦ୍ୱାରା କରାଯାଇଥିବା ଏହି 'ହାର୍ଭାର୍ଡ ଷ୍ଟଡି ଅଫ୍ ଆଡଲ୍ଟ ଡେଭଲପମେଣ୍ଟ' ବିଶ୍ୱର ସବୁଠୁ ଲମ୍ବା ସମୟ ଧରି ଚାଲିଥିବା ମନସ୍ତାତ୍ବିକ ଗବେଷଣା। ଏଥିରୁ ଯେଉଁ ସିଦ୍ଧାନ୍ତ ମିଳିଛି, ତାହା ଆପଣଙ୍କୁ ଚକିତ କରିଦେବ।

କିପରି ହୋଇଥିଲା ଏହି ଗବେଷଣା?

୧୯୩୮ ମସିହାରୁ ଆରମ୍ଭ ହୋଇଥିବା ଏହି ଗବେଷଣାରେ ୭୨୪ ଜଣ ବ୍ୟକ୍ତିଙ୍କୁ ସାମିଲ କରାଯାଇଥିଲା। ଏଥିରେ କିଛି ଧନୀ ପରିବାରର ପିଲା ଥିଲେ ତ କିଛି ଗରିବ ପରିବାରର। ବୈଜ୍ଞାନିକମାନେ ସେମାନଙ୍କର ପୁରା ଜୀବନ, ସ୍ୱାସ୍ଥ୍ୟ, କାମ ଏବଂ ସମ୍ପର୍କ ଉପରେ ଦଶନ୍ଧି ଦଶନ୍ଧି ଧରି ନଜର ରଖିଥିଲେ। ବର୍ତ୍ତମାନ ଏହି ଗବେଷଣାରେ ସେମାନଙ୍କର ପରବର୍ତ୍ତୀ ପିଢ଼ିର ପ୍ରାୟ ୧୩୦୦ ଲୋକ ମଧ୍ୟ ସାମିଲ ହୋଇଛନ୍ତି।

ଗବେଷଣାର ବଡ଼ ସିଦ୍ଧାନ୍ତ: କ’ଣ ଦିଏ ପ୍ରକୃତ ଖୁସି?

ଏହି ୮୮ ବର୍ଷର ଗବେଷଣାରୁ ମିଳିଥିବା ସବୁଠୁ ଗୁରୁତ୍ୱପୂର୍ଣ୍ଣ ସୂତ୍ର ହେଉଛି — "ସୁସମ୍ପର୍କ" ଗବେଷଣାରୁ ଜଣାପଡିଛି ଯେ:

• ସମ୍ପର୍କ ହିଁ ସର୍ବଶ୍ରେଷ୍ଠ: ଧନ ସମ୍ପତ୍ତି ବା ସଫଳତା ଅପେକ୍ଷା ଯେଉଁମାନଙ୍କର ନିଜ ପରିବାର, ସାଙ୍ଗସାଥୀ ଏବଂ ସମାଜ ସହ ଭଲ ସମ୍ପର୍କ ଅଛି, ସେମାନେ ଅଧିକ ଖୁସିରେ ରହନ୍ତି।

• ନିର୍ଜନତା ବା ଏକାକୀପଣ ବିଷ ସଦୃଶ: ଯେଉଁ ଲୋକମାନେ ନିଜକୁ ଏକାକୀ ମନେ କରନ୍ତି, ସେମାନଙ୍କର ସ୍ୱାସ୍ଥ୍ୟ ଶୀଘ୍ର ଖରାପ ହୁଏ ଏବଂ ସେମାନଙ୍କର ମୃତ୍ୟୁ ମଧ୍ୟ ଅପେକ୍ଷାକୃତ ଶୀଘ୍ର ହୋଇଥାଏ।

• ମାନସିକ ଶାନ୍ତି ଓ ସ୍ମୃତିଶକ୍ତି: ଯେଉଁମାନେ ଏକ ସୁରକ୍ଷିତ ଏବଂ ଭଲ ସମ୍ପର୍କରେ ରହନ୍ତି, ସେମାନଙ୍କର ମସ୍ତିଷ୍କ ଅଧିକ ସମୟ ପର୍ଯ୍ୟନ୍ତ ସତେଜ ରହେ ଏବଂ ସ୍ମୃତିଶକ୍ତି ମଧ୍ୟ ପ୍ରଖର ରହେ।

ଧନ ଓ ପ୍ରତିଷ୍ଠା ଗୌଣ?

ବୈଜ୍ଞାନିକମାନେ ଦେଖିଲେ ଯେ ଟଙ୍କା ଏକ ନିର୍ଦ୍ଦିଷ୍ଟ ସୀମା ପର୍ଯ୍ୟନ୍ତ ସୁବିଧା ଦେଇଥାଏ, କିନ୍ତୁ ଏହା ସବୁବେଳେ ଖୁସିର ଗ୍ୟାରେଣ୍ଟି ଦିଏ ନାହିଁ। ବରଂ ମଣିଷର "ସାମାଜିକ ସଂଯୋଗ" ତାକୁ ମାନସିକ ଏବଂ ଶାରୀରିକ ଭାବେ ସୁସ୍ଥ ରଖିବାରେ ମୁଖ୍ୟ ଭୂମିକା ଗ୍ରହଣ କରେ।

୮୮ ବର୍ଷର ଏହି ଗବେଷଣା ଆମକୁ ଶିଖାଉଛି ଯେ, ଯଦି ଆପଣ ଲମ୍ବା ସମୟ ପର୍ଯ୍ୟନ୍ତ ଖୁସିରେ ଏବଂ ସୁସ୍ଥ ରହିବାକୁ ଚାହୁଁଛନ୍ତି, ତେବେ ନିଜର ନିକଟ ସମ୍ପର୍କୀୟଙ୍କୁ  ସମୟ ଦିଅନ୍ତୁ। ଭଲ ବନ୍ଧୁ ତିଆରି କରନ୍ତୁ ଏବଂ ପରିବାର ସହ ସମ୍ପର୍କକୁ ମଜବୁତ କରନ୍ତୁ।