ମୁମ୍ବାଇ: ସଲମାନ ଖାନଙ୍କୁ ଅନେକ ଥର ଲରେନ୍ସ ବିଷ୍ଣୋଇ ଗ୍ୟାଙ୍ଗ ତରଫରୁ ଧମକ ମିଳି ସାରିଛି । ଏବେ ବଲିଉଡର ବାଦଶାହ ଶାହରୁଖ ଖାନଙ୍କୁ ମଧ୍ୟ ଜୀବନରେ ମାରି ଦେବାକୁ ଧମକ ମିଳିଛି । ଏହି ମାମଲାରେ ବାନ୍ଦ୍ରା ପୋଲିସ କେସ ରୁଜୁ କରି ତଦନ୍ତ ଆରମ୍ଭ କରି ଦେଇଛି । ସଦ୍ୟତମ ଖବର ଅନୁଯାୟୀ, ଶାହରୁଖ ଖାନଙ୍କୁ ଧମକ ଦେଇଥିବା ଅଭିଯୁକ୍ତକୁ ରାୟପୁରରୁ ଗିରଫ କରାଯାଇଛି । ତେବେ ଗିରଫଦାରୀ ସଂପର୍କରେ ପୋଲିସ ପକ୍ଷରୁ କୌଣସି ଆନୁଷ୍ଠାନିକ ସୂଚନା ଦିଆଯାଇ ନାହିଁ । 

ଖବର ଅନୁଯାୟୀ, ରାୟପୁରର ଫୈଜାନ ନାମକ ଜଣେ ବ୍ୟକ୍ତି ଶାହରୁଖଙ୍କୁ ଧମକପୂର୍ଣ୍ଣ କଲ୍ କରିଥିଲା । ଏହି ଫୋନ ଶାହରୁଖ ଖାନଙ୍କ ପ୍ରଡକ୍ସନ କମ୍ପାନି ରେଡ୍ ଚିଲିଜର ଅଫିସକୁ ଆସିଥିଲା । ଏହାକୁ ନେଇ ଚାଞ୍ଚଲ୍ୟ  ଖେଳି ଯାଇଛି । ତୁରନ୍ତ ପୋଲିସ ନିକଟରେ ଅଭିଯୋଗ କରାଯାଇ ମୁମ୍ବାଇର ବାନ୍ଦ୍ରା ପୋଲିସ ଥାନାରେ ଏଫଆଇଆର ରୁଜୁ କରାଯାଇଥିଲା ।

ଅନ୍ୟପଟେ ମୁମ୍ବାଇ ପୋଲିସର ଟିମ୍ ଛତିଶଗଡର ରାଜଧାନୀ ରାୟପୁର ପହଞ୍ଚି ଥିଲେ । କାରଣ ପୋଲିସ କଲ୍ ଟ୍ରେସ କରିବାରୁ ଏହା ରାୟପୁରରୁ ଆସିଥିବା ଜଣା ପଡିଥିଲା । ଶେଷ  ଲୋକେସ ରାୟପୁର ସହରର ବାଜାର ରହିଥିଲା ।  ପୋଲିସ ସେଠାରେ ପହଞ୍ଚି ଅଭିଯୁକ୍ତର ଛାନଭିନ ଚଳାଇଥିଲା । ପୋଲିସ ମାମଲାକୁ ନେଇ ସବୁ ଦିଗରୁ ତଦନ୍ତ ଜାରି ରଖିଛି ।

ସୂଚନାଯୋଗ୍ୟ, ଶାହରୁଖ ନିକଟରେ ନିଜର ୫୯ତମ ଜନ୍ମଦିନ ପାଳନ କରିଥିଲେ । ମାତ୍ର ସୁରକ୍ଷା ଦୃଷ୍ଟିକୋଣରୁ ସୁପରଷ୍ଟାର ଏଥର ନିଜର ଜନ୍ମଦିନରେ ତାଙ୍କ ବାସଭବନ ମନ୍ନତ ବାହାରେ ପ୍ରଶଂସକଙ୍କ ଅଭିବାଦନ ଗ୍ରହଣ କରି ନ ଥିଲେ । ପ୍ରଶଂସକଙ୍କୁ ବାହାରେ ଅଟକିବାକୁ ମଧ୍ୟ ଦିଆଯାଇ ନ ଥିଲା । ତେଣୁ ଆଶଙ୍କା କରାଯାଉଛି ଏହି ଧମକ କିଛି ଦିନ ପୂର୍ବରୁ ମିଳିଥାଇାପରେ । ତେଣୁ ପୋଲିସ ଶାହରୁଖ ଖାନଙ୍କ ସୁରକ୍ଷା ବଢାଇ ଦେଇଥିଲା ।