ଭୁବନେଶ୍ୱର: ରାତି ହେଲେ ରାଜ୍ୟ ରାଜଧାନୀରେ ଚାଲୁଛି ଅପରାଧୀଙ୍କ ଆତଙ୍କରାଜ । ସଞ୍ଜ ନଇଁଲେ ଭୁବନେଶ୍ୱରରେ ବାହାରକୁ ବାହିରବା କଷ୍ଟକର ହୋଇପଡ଼ୁଛି । ଛିନତାଇ, ହଣାକଟା ଓ ଦୁର୍ବ୍ୟବହାର ଭଳି ଘଟଣା ଦିନକୁ ଦିନ ବଢ଼ିବାରେ ଲାଗିଛି । ପୁଣି ଜଣେ ଯୁବକଙ୍କୁ ମରଣାନ୍ତକ ଆକ୍ରମଣ କରାଯାଇଛି । ଆହତ ଯୁବକ ଜଣକ ହେଲେ ବଡ଼ଗଡ଼ର ଦୀପକ ପ୍ରଧାନ । ତାଙ୍କୁ ଗୁରୁତର ଅବସ୍ଥାରେ କ୍ୟାପିଟାଲ ମେଡ଼ିକାଲରେ ଭର୍ତ୍ତି କରାଯାଇଛି । 

ଗତକାଲି ରାତି ୧୧ଟା ସମୟରେ ବଡ଼ଗଡ଼ ଅଞ୍ଚଳର ଦୀପକ ପ୍ରଧାନ ବାଇକରେ ଘରକୁ ଫେରୁଥିଲେ । ଏହି ସମୟରେ ଦୁଇ ଜଣ ମୁଖା ପିନ୍ଧା ଯୁବକ ଏକ ବାଇକରେ ଆସି ଦୀପକଙ୍କ ଗାଡ଼ିକୁ ଗୋଇଠା ମାରିଥିଲେ । ଯଦ୍ୱାରା ଦୀପକ ଭାରସାମ୍ୟ ହରାଇ ତଳେ ପଡ଼ିଯାଇଥିଲେ । ଏହା ପରେ ସେମାନେ ଛୁରୀରେ ତାଙ୍କୁ ଆକ୍ରମଣ କରିଥିଲେ ଓ ଫେରାର ହୋଇଯାଇଥିଲେ । ଖବର ପାଇ ପୁଲିସ ଘଟଣା ସ୍ଥଳରେ ପହଁଚି ଦୀପକଙ୍କୁ ଉଦ୍ଧାର କରି କ୍ୟାପିଟାଲ ହସ୍ପିଟାଲରେ ଭର୍ତ୍ତି କରିଛନ୍ତି । ଦୀପକଙ୍କ ଶରୀରେ ଗଭୀର ଆଘାତ ଲାଗିଥିବା ମଧ୍ୟ ଦେଖିବାକୁ ମିଳିଛି । 

ପୂର୍ବ ଶତ୍ରୁତାକୁ କେନ୍ଦ୍ର କରି ଆକ୍ରମଣ କରାଯାଇଥିବା ସନ୍ଦେହ କରାଯାଉଛି । ପୁଲିସ ଅଭିଯୁକ୍ତମାନଙ୍କୁ ଚିହ୍ନଟ ମଧ୍ୟ କରିଛି । ଖୁବ ଶୀଘ୍ର ଅପରାଧିମାନଙ୍କୁ ଗିରଫ କରାଯିବ ବୋଲି ପୁଲିସ ପକ୍ଷରୁ ସୂଚନା ମିଳିଛି । 

ଏଠାରେ ଉଲ୍ଲେଖ ଯୋଗ୍ୟ, ଗତ ୪ ତାରିଖ ବିଳମ୍ବିତ ରାତିରେ ପଳାଶପଲ୍ଲୀ ଅଞ୍ଚଳରେ ସମାଜସେବୀ ଶିବ ପ୍ରସାଦ ଶ୍ରୀଚନ୍ଦନଙ୍କୁ ଆକ୍ରମଣ କରାଯାଇଥିଲା । ଦୁଇଟି ବାଇକରେ ଦୁର୍ବୃତ୍ତ ଆସି ତାଙ୍କୁ ଖଣ୍ଡାରେ ଗୋଡ଼ାଇ ଗୋଡ଼ାଇ ହାଣିଥିଲେ । ଏହି ମାମଲାରେ ଏୟାର ପୋର୍ଟ ଥାନା ପୁଲିସ ୪ ଜଣ ଅଭିଯୁକ୍ତଙ୍କୁ ଗିରଫ କରିଛି ।