ରାଞ୍ଚି: ଭୁବନେଶ୍ୱର ବାଲିଅନ୍ତା ଘଟଣାର ପୁନରାବୃତ୍ତି ଝାଡ଼ଖଣ୍ଡରେ ରାଞ୍ଚିରେ ଘଟିଛି । ଅସଦାଚରଣକୁ କେନ୍ଦ୍ର କରି ଜଣେ ଯୁବକଙ୍କୁ ପିଟିପିଟି ହତ୍ୟା କରାଯାଇଛି । ରାଞ୍ଚିର ରାତୁ ଥାନା ଅନ୍ତର୍ଗତ ଲହନା ଗାଁରେ ଏହି ଭିଡ଼ ହିଂସା ଘଟିଛି । ମୃତକ ହେଲେ ଲହନା ଗ୍ରାମର ବାସିନ୍ଦା ଉଦିତ ମିର୍ଦ୍ଧାଙ୍କ ୨୫ ବର୍ଷୀୟ ପୁଅ ରୋହିତ ମିର୍ଦ୍ଧା । ସେ ବିଜେପି ଅନୁସୂଚିତ ଜାତି (ଏସସି) ମୋର୍ଚ୍ଚାର ରାଜ୍ୟ ଉପାଧ୍ୟକ୍ଷ କମଲେଶ ରାମଙ୍କ ଭଣଜା ବୋଲି ଚିହ୍ନଟ କରାଯାଇଛି।

ମୃତକଙ୍କ ବାପା ଉଦିତ ମିର୍ଦ୍ଧାଙ୍କ ଅଭିଯୋଗ ଅନୁସାରେ, ଗତକାଲି ଅପରାହ୍ନ ତିନିଟା ସମୟରେ ତାଙ୍କୁ ଜଣେ ବ୍ୟକ୍ତି ଫୋନରେ କହିଥିଲେ ତାଙ୍କ ପୁଅ ରୋହିତଙ୍କୁ କିଛି ଲୋକ ଆକ୍ରମଣ କରିଛନ୍ତି । ଏହା ପରେ ସେ ପତ୍ନୀଙ୍କ ସହିତ ଘଟଣା ସ୍ଥଳକୁ ଦୌଡ଼ିକି ଯାଇଥିଲେ । ଯେତେବେଳେ ପୁଅ ରୋହିତକୁ ଉଦ୍ଧାର କରିବାକୁ ଚେଷ୍ଟା କରିଥିଲେ ସେମାନେ ମଧ୍ୟ ଆକ୍ରମଣରୁ ବର୍ତ୍ତି ପାରିନଥିଲେ । କୌଣସି ପ୍ରକାର ସେମାନେ ରୋହିତଙ୍କୁ ଡାକ୍ତରଖାନାକୁ ନେଇଥିଲେ । ମାତ୍ର ରାତିରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା । 

ଏ ନେଇ ପରିବାର ପକ୍ଷରୁ ରାତୁ ଥାନାରେ ଏଫଆଇଆର ଦାଖଲ ହୋଇଛି । ଇନ୍ଦ୍ରଜିତ ସାହୁ, ସନ୍ତୋଷ ସାହୁ ଏବଂ ବିକାଶ ସାହୁଙ୍କ ସମେତ ସେହି ଗ୍ରାମର ବାସିନ୍ଦା ୧୦ ରୁ ୧୫ ଜଣ ଅଜ୍ଞାତ ବ୍ୟକ୍ତିଙ୍କ ନାମରେ ମାମଲା ରୁଜୁ କରାଯାଇଛି। ପୋଲିସ ମୁଖ୍ୟ ଅଭିଯୁକ୍ତ ଇନ୍ଦ୍ରଜିତ ସାହୁଙ୍କୁ ଗିରଫ କରିଛି । 

ଅନ୍ୟପକ୍ଷରେ, ଅଭିଯୁକ୍ତ ଇନ୍ଦ୍ରଜିତ ସାହୁଙ୍କ ପତ୍ନୀ ଶାରଦା ଦେବୀ ମଧ୍ୟ ରାତୁ ଥାନାରେ ପୃଥକ ଅଭିଯୋଗ କରିଛନ୍ତି । ତାଙ୍କୁ ରୋହିତ ଅସଦାଚରଣ କରିଥିଲେ । କଦଳୀ ଫସଲ ଦେଖିବାକୁ ଯାଇଥିବାବେଳେ ରୋହିତ ମିର୍ଦ୍ଧା ତାଙ୍କୁ ଦୁଷ୍କର୍ମ ଉଦ୍ୟମ କରିଥିଲେ । ଏହା ପରେ ସେ ଚିତ୍କାର କରିବାରୁ ସ୍ଥାନୀୟ ଲୋକେ ଧାଇଁ ଆସିଥିଲେ । ଏହା ପରେ ରୋହିତଙ୍କୁ ସଂଘବଦ୍ଧ ଆକ୍ରମଣ କରିଥିଲେ । 

ମୃତକଙ୍କ ବାପା ଉଦିତ ମିର୍ଦ୍ଧା କହିଛନ୍ତି ଯେ ତାଙ୍କ ପୁଅକୁ ଟାର୍ଗେଟ କରି ମିଥ୍ୟା ଅଭିଯୋଗରେ ଫସାଇ ଦିଆଯାଇଛି। ସେ ଅଭିଯୋଗ କରିଛନ୍ତି ଯେ ଏକ ଜମି ବିବାଦକୁ ନେଇ ଗାଁରେ ପୂର୍ବରୁ ଉତ୍ତେଜନା ଲାଗି ରହିଛି, ଯାହା ସମ୍ପର୍କରେ ପୂର୍ବରୁ ମଧ୍ୟ ଅଭିଯୋଗ କରାଯାଇଥିଲା। ରୋହିତ ତାଙ୍କର ଏକମାତ୍ର ପୁଅ ଏବଂ ଗତ କିଛି ବର୍ଷ ଧରି ମାନସିକ ରୋଗରେ ପୀଡିତ ଥିଲେ।

ଘଟଣା ବିଷୟରେ ସୂଚନା ପାଇ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରି ମୁଖ୍ୟ ଅଭିଯୁକ୍ତ ଇନ୍ଦ୍ରଜିତ ସାହୁଙ୍କୁ ଗିରଫ କରିଛି। ଡିଏସପି ଅଜୟ ଆର୍ଯ୍ୟନଙ୍କ ନେତୃତ୍ୱରେ, ଅନ୍ୟ ଫେରାର ଅଭିଯୁକ୍ତମାନଙ୍କୁ ଧରିବା ପାଇଁ ଚଢାଉ କରାଯାଉଛି।

ଏହି ସମୟରେ, ଘଟଣା ବିଷୟରେ ଜାଣିବା ପରେ, ବିଜେପି ଅନୁସୂଚିତ ଜାତି ମୋର୍ଚ୍ଚାର ରାଜ୍ୟ ଉପାଧ୍ୟକ୍ଷ କମଲେଶ ରାମଙ୍କ ସମେତ ଅନେକ ନେତା ଏବଂ ଦଳୀୟ କର୍ମୀ ରାତୁ ପୋଲିସ ଷ୍ଟେସନରେ ପହଞ୍ଚି ଦୋଷୀମାନଙ୍କୁ ତୁରନ୍ତ ଗିରଫ କରିବାକୁ ଦାବି କରିଛନ୍ତି।