ହରଦୋଇ, ଜୁନ୍ ୨୨ (ଖବର ଓଡ଼ିଶା): ଉତ୍ତର ପ୍ରଦେଶର ହରଦୋଇ ଜିଲ୍ଲାରେ ଅଭାବନୀୟ ଘଟଣା ଘଟିଛି । ପାରିବାରିକ ବିବାଦ କାରଣରୁ ୯୦ ବର୍ଷୀୟ ଶ୍ୱଶୁର ନିଜର ୫୭ ବର୍ଷୀୟ ବୋହୂଙ୍କୁ ଲାଇସେନ୍ସପ୍ରାପ୍ତ ବନ୍ଧୁକରେ ଗୁଳି କରିଛି । ଘଟଣାସ୍ଥଳରେ ହିଁ ବୋହୂଙ୍କର ମୃତ୍ୟୁ ହୋଇଛି । ସୂଚନା ମିଳିବା ପରେ ପୋଲିସ ଘଟଣାସ୍ଥଳରେ ପହଞ୍ଚି ଅଭିଯୁକ୍ତ ଶ୍ୱଶୁରକୁ ଗିରଫ କରିଛି ।
ପୋଲିସ କହିବା ଅନୁସାରେ ବେହଟା ଗୋକୁଳ ଥାନା ଅନ୍ତର୍ଗତ ସୟଦପୁର ଗାଁରେ ଏହି ଘଟଣା ଘଟିଛି । ୯୦ ବର୍ଷୀୟ ଗଫୁରଙ୍କ ୨ ପୁଅ ଇରଶାଦ ଓ ଇକବାଲ । ଗଫୁରଙ୍କ ନିଜ ଭଉଣୀ ସହିତ କିଛି ପାରିବାରିକ ସମସ୍ୟାକୁ ନେଇ ଯୁକ୍ତିତର୍କ ହେଉଥିଲା । ଏହି ସମୟରେ ଇରଶାଦଙ୍କ ସ୍ତ୍ରୀ ବେଗମ ସୁଲେମା ନିଜ ଶ୍ୱଶୁରଙ୍କ ବିରୋଧରେ ଟିପ୍ପଣୀ କରିଥିଲେ । ଏହା ପରେ ବରିଷ୍ଠ ନାଗରିକ ନିଜ ବୋହୂ ସୁଲେମା ସହିତ ଯୁକ୍ତି କରିଥିଲେ । ସେ ଉତ୍ତେଜିତ ହୋଇ ନିଜର ଲାଇସେନ୍ସ ପ୍ରାପ୍ତ ବନ୍ଧୁକରେ ଗୁଳି କରିଥିଲେ । ସୁଲେମା ଘଟଣାସ୍ଥଳରେ ହିଁ ଜୀବନ ହରାଇଥିଲେ ।