ଢାକା: ଆସନ୍ତା ନିର୍ବାଚନ ପୂର୍ବରୁ ବାଂଲାଦେଶରେ ରାଜନୈତିକ ହିଂସା ନିରନ୍ତର ଜାରି ରହିଛି। ମଙ୍ଗଳବାର ରାତିରେ ରାଜଧାନୀ ଢାକାରେ ଅଜ୍ଞାତ ଆକ୍ରମଣକାରୀମାନେ ବାଂଲାଦେଶ ନ୍ୟାସନାଲିଷ୍ଟ ପାର୍ଟି (ବିଏନ୍‌ପି)ର ଯୁବ ନେତା ଅଜିଜୁର ରହମାନ ମୁସାବ୍ବିରଙ୍କୁ ଗୁଳି କରି ହତ୍ୟା କରିଛନ୍ତି। ଏହି ଘଟଣା ଏପରି ସମୟରେ ଘଟିଛି ଯେତେବେଳେ ନିର୍ବାଚନ ଆଚରଣ ବିଧି ଲାଗୁ ହୋଇଛି ଏବଂ ଫେବୃଆରୀ ୧୨ରେ ଭୋଟ୍ ହେବାକୁ ଯାଉଛି। ଏହି ହତ୍ୟାକାଣ୍ଡ ପୁଣି ଥରେ ବାଂଲାଦେଶରେ ବିପର୍ଯ୍ୟସ୍ତ ଆଇନ ଶୃଙ୍ଖଳା ପରିସ୍ଥିତି ଏବଂ ନିର୍ବାଚନୀ ପରିବେଶ ଉପରେ ଗମ୍ଭୀର ପ୍ରଶ୍ନ ଉଠାଇଛି।

ପୋଲିସ ଏବଂ ଦଳୀୟ ସୂତ୍ର ଅନୁସାରେ, ଅଜିଜୁର ରହମାନ ମୁସାବ୍ବିର ଢାକା ମେଟ୍ରୋପଲିଟାନ୍ ନର୍ଥ ଭଲ୍ୟୁଣ୍ଟେୟାର ପାର୍ଟିର ପୂର୍ବତନ ସାଧାରଣ ସମ୍ପାଦକ ଥିଲେ। ମଙ୍ଗଳବାର ରାତି ପ୍ରାୟ ୮ଟା ୩୦ରେ ବସୁନ୍ଧରା ସିଟି ସପିଂ କମ୍ପ୍ଲେକ୍ସ ନିକଟବର୍ତ୍ତୀ ସୁପର ଷ୍ଟାର ହୋଟେଲ ନିକଟ କରୱାନ ବଜାର ଅଞ୍ଚଳରେ ତାଙ୍କ ଉପରେ ଆକ୍ରମଣ କରାଯାଇଥିଲା। ଏହି ଅଞ୍ଚଳ ଢାକାର ସବୁଠାରୁ ବ୍ୟସ୍ତବହୁଳ ବାଣିଜ୍ୟିକ କ୍ଷେତ୍ର ମଧ୍ୟରୁ ଗୋଟିଏ।

ପ୍ରାଥମିକ ସୂଚନା ଅନୁଯାୟୀ, ଆକ୍ରମଣକାରୀମାନେ ମୁସାବ୍ବିରଙ୍କ ଉପରେ ନିକଟରୁ ଅନେକ ରାଉଣ୍ଡ ଗୁଳି ଚଳାଇ ଘଟଣାସ୍ଥଳରୁ ପଳାଇ ଯାଇଥିଲେ। ଗୁଳି ବାଜିବା ପରେ ତାଙ୍କ ଅବସ୍ଥା ଗୁରୁତର ହୋଇଯାଇଥିଲା। ଏହି ଆକ୍ରମଣରେ ଆଉ ଜଣେ ଆହତ ହୋଇଛନ୍ତି ଏବଂ ତାଙ୍କୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରାଯାଇଛି। ପୋଲିସ କହିଛି ଯେ ଆହତଙ୍କ ଅବସ୍ଥା ସ୍ଥିର ଅଛି।

ତେଜଗାଓଁ ଡିଭିଜନର ଅତିରିକ୍ତ ଡେପୁଟି ପୋଲିସ କମିଶନର ଫଜଲୁଲ କରିମ ସ୍ଥାନୀୟ ଗଣମାଧ୍ୟମକୁ କହିଛନ୍ତି ଯେ ଉଭୟ ପୀଡିତଙ୍କୁ ପ୍ରଥମେ ବିଆରବି ହସ୍ପିଟାଲକୁ ନିଆଯାଇଥିଲା। ପରେ ମୁସବ୍ବିରଙ୍କୁ ପାନ୍ଥପଥ ଅଞ୍ଚଳର ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଥିଲା, ଯେଉଁଠାରେ ତାଙ୍କ ପେଟରେ ଗୁଳି ବାଜିବାରୁ ସେ ମୃତ୍ୟୁବରଣ କରିଥିଲେ। ଅନ୍ୟ ଆହତଙ୍କୁ ଅଧିକ ଚିକିତ୍ସା ପାଇଁ ଢାକା ମେଡିକାଲ କଲେଜ ହସ୍ପିଟାଲକୁ ପଠାଯାଇଥିଲା।

ଏହି ହତ୍ୟାକାଣ୍ଡକୁ ବାଂଲାଦେଶରେ ବୃଦ୍ଧି ପାଉଥିବା ରାଜନୈତିକ ହିଂସାର ଏକ ଅଂଶ ବୋଲି ବିବେଚନା କରାଯାଉଛି। ସମ୍ପ୍ରତି ଜଣେ ଯୁବ ଦଳ ନେତାଙ୍କୁ ମଧ୍ୟ ଗୁଳି କରି ହତ୍ୟା କରାଯାଇଥିଲା। ପୂର୍ବରୁ ଡିସେମ୍ବର ୧୨ ତାରିଖରେ ରାଜନୈତିକ ଅସ୍ଥିରତା ମଧ୍ୟରେ ଇନକିଲାବ ମଞ୍ଚ ନେତା ଓସମାନ ହାଦିଙ୍କୁ ମଧ୍ୟ ହତ୍ୟା କରାଯାଇଥିଲା। ଜୁଲାଇରେ ଏକ ଜନବିଦ୍ରୋହ ପରେ ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନାଙ୍କୁ ଗାଦିଚ୍ୟୁତ କରିବା ପରଠାରୁ ଦେଶରେ ରାଜନୈତିକ ପରିବେଶ ଉତ୍ତେଜନାପୂର୍ଣ୍ଣ ରହିଛି।

ଅଧିକ ପଢ଼ନ୍ତୁ: ଦୁଇଟି ଝିଅ ସ୍କୁଲରେ ପଢ଼ୁଥିଲେ ଜଣଙ୍କର ପାଠପଢ଼ା ମାଗଣା ହେବ