ଆଲିଗଡ଼: ଉତ୍ତରପ୍ରଦେଶ ଆଲିଗଡ଼ ମୁସଲିମ ବିଶ୍ବବିଦ୍ୟାଳୟ (ଏଏମ୍ୟୁ) ପରିସରରେ ବୁଧବାର ଗୁଳିମାଡ଼ ହୋଇଛି। ଏହି ଗୁଳିମାଡ଼ରେ ୨ ଜଣ କର୍ମଚାରୀ ଆହତ ହୋଇଛନ୍ତି। ଘଟଣା ପରେ ସ୍ଥାନୀୟ ଲୋକେ ଆକ୍ରମଣକାରୀଙ୍କୁ କାବୁ କରି ପୁଲିସ ନିକଟରେ ଜିମା ଦେଇଛନ୍ତି। ଏହା ବ୍ୟତୀତ ଗୁଳିମାଡ଼ର ଶିକାର ହୋଇଥିବା ୨ ଆହତଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି। ଏହି ଅପ୍ରୀତିକର ଘଟଣା ପରେ ବିଶ୍ବବିଦ୍ୟାଳୟ ପରିସରରେ ସୁରକ୍ଷା ବ୍ୟବସ୍ଥା ବଢ଼ାଇ ଦିଆଯାଇଛି।
ଆଲିଗଡ଼ ମୁସଲିମ ବିଶ୍ବବିଦ୍ୟାଳୟରେ ଗୁଳିମାଡ଼ ଘଟଣା ନୂଆ ନୁହେଁ। ଏହା ପୂର୍ବରୁ ମଧ୍ୟ ଏଭଳି ଘଟଣା ଘଟିଥିଲା। ଗତବର୍ଷ ସେପ୍ଟେମ୍ବରରେ ଆଲିଗ ମୁସଲିମ ବିଶ୍ବବିଦ୍ୟାଳୟର ଜବାହରଲାଲ ନେହରୁ ମେଡିକାଲ କଲେଜରେ ଗୁଳିମାଡ଼ ମାମଲା ସାମ୍ନାକୁ ଆସିଥିଲା। ଦୁର୍ବୃତ୍ତ ଜଣକ କ୍ୟାଣ୍ଟିନ୍ ପରିଚାଳକଙ୍କୁ ଗୁଳିମାଡ଼ କରିଥିଲା। ଏହି ଘଟଣା ଜବାହରଲାଲ ନେହରୁ ମେଡିକାଲ କଲେଜର ସ୍ପେଶାଲ ୱାର୍ଡ ନିକଟସ୍ଥିତ କ୍ୟାଣ୍ଟିନ ବାହାରେ ହୋଇଥିଲା। ପ୍ରାୟ ୬ରାଉଣ୍ଡ ଗୁଳି କାରଣରୁ ଲୋକେ ଭୟଭୀତ ହୋଇଯାଇଥିଲେ। ଏହି ଘଟଣାରେ ଜଣେ ମହିଳା ଆହତ ହୋଇଥିଲେ। କୁହାଯାଇଥିଲା ଯେ, କ୍ୟାଣ୍ଟିନ ବିବାଦ କାରଣରୁ ଗୁଳିମାଡ଼ ହୋଇଥିଲା।
ସେହିପରି ୨୦୧୮ରେ ମଧ୍ୟ ଆଲିଗଡ଼ ମୁସଲିମ ବିଶ୍ବବିଦ୍ୟାଳୟରେ ଗୁଳିମାଡ଼ ହୋଇଥିଲା। ସେହି ସମୟରେ ଆରଏମ୍ ହଲ୍ରେ ଗୁଳିମାଡ଼ ହୋଇଥିଲା। ଏଥିରେ ୨ ଜଣ ଛାତ୍ର ଆହତ ହୋଇଥିଲେ। ଉଭୟ ସଂପର୍କୀୟ ଭାଇଥିଲେ।