ନୂଆଦିଲ୍ଲୀ:  ତୈଳ ବିପଣନ କମ୍ପାନୀଗୁଡ଼ିକ କମର୍ସିଆଲ ଏଲପିଜି ଗ୍ୟାସ ସିଲିଣ୍ଡରର ମୂଲ୍ୟ ସଂଶୋଧନ କରିଛନ୍ତି। ଏକ ବଡ଼ ଆଶ୍ୱସ୍ତି ପ୍ରଦାନ କରି, ତୈଳ କମ୍ପାନୀ ୧୯ କିଲୋଗ୍ରାମ ବାଣିଜ୍ୟିକ ଏଲପିଜି ସିଲିଣ୍ଡରର ମୂଲ୍ୟ ୨୪ ଟଙ୍କା ହ୍ରାସ କରିଛନ୍ତି।ଏହି ନୂତନ ଦର ଜୁନ୍ ୧, ଅର୍ଥାତ୍ ରବିବାରରୁ ଲାଗୁ  ହେବ। କମର୍ସିଆଲ ଏଲପିଜି ଗ୍ୟାସ ସିଲିଣ୍ଡରର ମୂଲ୍ୟ ହ୍ରାସ ସେହି ବ୍ୟବସାୟଗୁଡ଼ିକୁ ଆଶ୍ୱସ୍ତି ଦେବ ଯେଉଁମାନେ ସେମାନଙ୍କ କାର୍ଯ୍ୟ ପାଇଁ ବାଣିଜ୍ୟିକ ଏଲପିଜି ସିଲିଣ୍ଡର ଉପରେ ଅତ୍ୟଧିକ ନିର୍ଭରଶୀଳ। ଏବେ ଦିଲ୍ଲୀରେ ୧୯ କିଲୋଗ୍ରାମର ବାଣିଜ୍ୟିକ ସିଲିଣ୍ଡର ୧,୭୨୩.୫୦ ଟଙ୍କାରେ ଉପଲବ୍ଧ ହେବ। 

କ୍ରମାଗତ ଦ୍ୱିତୀୟ ମାସ ପାଇଁ ବାଣିଜ୍ୟିକ ସିଲିଣ୍ଡର ଶସ୍ତା

ଲଗାତାର ଦ୍ୱିତୀୟ ମାସ ପାଇଁ ବାଣିଜ୍ୟିକ ସିଲିଣ୍ଡରର ମୂଲ୍ୟ ହ୍ରାସ ପାଇଛି। ମେ ମାସ ଆରମ୍ଭରେ ମଧ୍ୟ କମ୍ପାନୀଗୁଡ଼ିକ ପ୍ରତି ସିଲିଣ୍ଡରର ମୂଲ୍ୟ ୧୪.୫୦ ଟଙ୍କା ହ୍ରାସ କରିଥିଲେ। ଏହା ହୋଟେଲ, ରେଷ୍ଟୁରାଣ୍ଟ ଏବଂ ଖାଦ୍ୟ ଶିଳ୍ପ ଭଳି ସେବା ଉପରେ ସିଧାସଳଖ ପ୍ରଭାବ ପକାଇବ । ବିଶେଷ କରି  ଯେଉଁଠାରେ ଏହି ଗ୍ୟାସ୍ ବହୁଳ ପରିମାଣରେ ବ୍ୟବହୃତ ହୁଏ, ସେଠାରେ କିଛିଟା ଆଶ୍ୱସ୍ତି ମିଳିବ।

ବିମାନ ଚଳାଚଳ କ୍ଷେତ୍ରକୁ ମଧ୍ୟ ଆଶ୍ୱସ୍ତି

କେବଳ ବାଣିଜ୍ୟିକ ଗ୍ୟାସ୍ ନୁହେଁ ବରଂ ବିମାନ ଉଡ଼ାଣ ପାଇଁ ବ୍ୟବହୃତ ବିମାନ ଟରବାଇନ୍ ଇନ୍ଧନ (ଏଟିଏଫ) ମଧ୍ୟ ଶସ୍ତା ହୋଇଛି। ଏହାର ମୂଲ୍ୟ ୪.୪ ପ୍ରତିଶତ ଅର୍ଥାତ୍ ପ୍ରତି କିଲୋଲିଟର ୩,୯୫୪.୩୮ ଟଙ୍କା ହ୍ରାସ ପାଇଛି। ଏବେ ଏଟିଏଫର ନୂତନ ମୂଲ୍ୟ ପ୍ରତି କିଲୋଲିଟର ୮୫,୪୮୬.୮୦ ଟଙ୍କାକୁ ହ୍ରାସ ପାଇଛି । ଏହା ଏୟାର ଇଣ୍ଡିଆ ଏବଂ ଇଣ୍ଡିଗୋ ଭଳି ବିମାନ କମ୍ପାନୀ ପାଇଁ ଏକ ବଡ଼ ଆଶ୍ୱସ୍ତି, କାରଣ ସେମାନଙ୍କର ଖର୍ଚ୍ଚର ୩୦ ପ୍ରତିଶତ ଇନ୍ଧନରେ ହିଁ ଚାଲି ଯାଉଛି । 

ଏହି ସମସ୍ତ ହ୍ରାସ ପଛରେ ସବୁଠାରୁ ବଡ଼ କାରଣ ହେଉଛି ବିଶ୍ୱ ସ୍ତରରେ ଅଶୋଧିତ ତୈଳ ମୂଲ୍ୟ ହ୍ରାସ ପାଇବା। ଅନ୍ତର୍ଜାତୀୟ ବଜାରରେ ବ୍ରେଣ୍ଟ ଅଶୋଧିତ ତୈଳର ମୂଲ୍ୟ ବ୍ୟାରେଲ ପିଛା ୬୩ ଡଲାର ପାଖାପାଖି ପହଞ୍ଚିଛି, ଯାହା ୨୦୨୧ ଏପ୍ରିଲ ପରଠାରୁ ସର୍ବନିମ୍ନ ଦର ।