ଏବେ ନୁହେଁ ୨୦୦୨ରେ ଭାଙ୍ଗିଥିଲା ବିଜେଡି, ବଚେଂଇଥିଲା ବିଜେପି
Khabar Odisha:BJD-Break-In-2002

ପଂଚାୟତ ନିର୍ବାଚନରେ ଖରାପ ପଦର୍ଶନ ପରେ ଏବେ ବିଜେଡି ରାଜନୀତିରେ ସୃଷ୍ଟି ହୋଇଛି ଅସ୍ଥିରତା । କିଏ ବିଜେଡି ଭାଙ୍ଗିବ କଥା କହୁଥିବା ବେଳେ କିଛି ନେତା ବିଜେଡିରୁ ଯାଇ ବିଜେପିରେ ମିଶିବେ ବୋଲି ମଧ୍ୟ ଚର୍ଚ୍ଚା ହେଉଛି । ପ୍ରଥମେ ଦାମ ରାଉତ, ପରେ ତଥାଗତ ଶତପଥୀ କରିଛନ୍ତି ଅଭିଯୋଗଯେ ଦଳରେ କିଛି ସୁବିଧାବାଦୀ ଅଛନ୍ତି ଯେଉଁମାନେ ବିଜେଡିକୁ ଭାଙ୍ଗି ବିଜେପି ସହ ମିଶିବାକୁ ଚାହୁଁଛନ୍ତି । ଏହାକୁ ନେଇ କେବଳ ଦଳ ନୁହେଁ ଗଣମାଧ୍ୟମରେ  ମଧ୍ୟ ଆରମ୍ଭ ହୋଇଛି ଚର୍ଚ୍ଚା । ଦାମ ରାଉତଙ୍କ ବିଭୀଷଣ ଚରିତ୍ରର ବୟାନ ଓ ପରେ ତଥାଗତ ଶତପଥିଙ୍କ ଟ୍ୱିଟରରେ ବିଜେଡି ଭାଙ୍ଗିବାର ଆଶଙ୍କା ଏସବୁ ବିଜେଡି ଭାଙ୍ଗିବାର ଚର୍ଚ୍ଚାକୁ ଖୋରାକ ଯୋଗାଇଛି । ପରେ କେନ୍ଦ୍ର ମନ୍ତ୍ରୀ ଜୁଏଲ ଓରାମଙ୍କ ବୟାନକୁ ନେଇ ମଧ୍ୟ ଆଲୋଚନା ବଢିବାରେ ଲାଗିଛି । ଏହା ବିଜୁ ଜନତା ଦଳ ଭାଙ୍ଗିବାର ଚର୍ଚ୍ଚାକୁ ଆହୁରି ସରଗରମ କରିଛି ।  ହେଲେ ବିଜୁ ଜନତା ଦଳରେ ଦଳ ଭାଙ୍ଗିବାର ଚର୍ଚ୍ଚା ଆଜି ନୁଆ ନୁହେଁ ।


ପ୍ରକାଶ ଥାଉକି ଅଟଳ ବିହାରି ବାଜପେୟୀଙ୍କ ସରକାର ସମୟରେ କେନ୍ଦ୍ରରେ ବିଜୁ ଜନତା ଦଳ ଓ ବିଜେପି ମଧ୍ୟରେ ମେଣ୍ଟ ସରକାର ଥିଲା । ସେ ସମୟରେ ୨୦୦୨ରେ କେତେକ ବିଜେଡି ସାଂସଦ ବିଦ୍ରୋହ ଘୋଷଣା କରିଥିଲେ । ମାନିନଥିଲେ ମୁଖିଆ ନବୀନଙ୍କ ନିର୍ଦ୍ଧେଶକୁ ।  ବିଦ୍ରୋହୀ ଗୋଷ୍ଠୀ ସେ ସମୟରେ ବିଜେଡିର ସଂସଦୀୟ ଦଳର ନେତା ଥିବା ଭଦ୍ରକର ସାଂସଦ ଅର୍ଜୁନ ଚରଣ ସେଠୀଙ୍କୁ ହଟାଇ ପ୍ରସନ୍ନ ଆଚାର୍ଯ୍ୟଙ୍କୁ ନେତା ନିର୍ବାଚିତ କରିଥିଲେ । ସେହିଭଳି ପୁରୀ ସାଂସଦ ବ୍ରଜ କିଶୋର ତ୍ରିପାଠୀ ସେ ସମୟରେ ଥିଲେ କେନ୍ଦ୍ର ମନ୍ତ୍ରୀ ଆଉ ବିଜେଡିର ମୁଖ୍ୟ ସଚେତକ ମଧ୍ୟ । ତାଙ୍କୁ ମଧ୍ୟ ଏ ବିଦ୍ରୋହି ଗୋଷ୍ଠୀ ସଚେତକ ପଦରୁ ହଟାଇ ଭର୍ତ୍ତୁହରି ମହତାବଙ୍କୁ ଘୋଷଣା କରିଥିଲେ ସଚେତକ ଭାବେ । ହେଲେ ସେସମୟରେ ଭାରତୀୟ ଜନତା ପାର୍ଟିର କିଛି ବରିଷ୍ଠ ନେତା ବିଜେଡିକୁ ଦଳର ଏ ବିପର୍ଯ୍ୟୟରୁ ରକ୍ଷା କରିଥିଲେ । ନବୀନଙ୍କୁ ସୁରକ୍ଷା ଦେବାକୁ ଯାଇ ବିଦ୍ରୋହୀଙ୍କର ରାତିଅଧିଆ ଚାଲକୁ ବିଫଳ କରିଦେଇଥିଲେ ପ୍ରମୋଦ ମହାଜନ । ସେତେବେଳେ ଲୋକସଭାରେ ବିଜେଡିର ୧୦ଜଣ ସାଂସଦ ଥିବବେଳେ ୭ ଜଣ ସାମିଲ ହୋଇଥିଲେ ବିଦ୍ରୋହୀ ଗୋଷ୍ଠିରେ । ପ୍ରସନ୍ନ ପାଟ୍ଟଶାଣି, ପ୍ରସନ୍ନ ଆଚାର୍ଯ୍ୟ, ଭର୍ତ୍ତୁହରି ମହତାବ ଏହି ବିଦ୍ରୋହର ମୁଖ୍ୟ ନାୟକ ଥିଲେ ବୋଲି ସେତେବେଳେ ଚର୍ଚ୍ଚା ହୋଇଥିଲା । କିନ୍ତୁ ସେମାନେ ନିଜକୁ ସୁରକ୍ଷିତ କରିପାରିଥିଲେ । ସେହି ଘଟଣାରେ ସେତେବେଳେ ତକ୍ରାଳିନ ସାଂସଦ ଥିବା ଜଗନ୍ନାଥ ମଲ୍ଲିକ, କୁମୁଦିନୀ ପଟ୍ଟନାୟକ, ପ୍ରଭାତ ସାମନ୍ତରାୟଙ୍କୁ ଦଳରୁ ୬ ବର୍ଷ ପାଇଁ ନିଲମ୍ବିତ କରାଯାଇଥିଲା । 
 
  • Tags:

Subscribe

National International State Sports Entertainment