ବିହାରର ଅଦିତି ଯାଦବ ୨୦୨୦ରେ ସିଡିଏସ ଲିଖିତ ପରୀକ୍ଷାରେ ହୋଇଥିଲେ ଉତ୍ତୀର୍ଣ୍ଣ । ୨୮ ଜୁନ ୨୦୨୧ରେ ସାକ୍ଷାତକାର ଦେବା ପାଇଁ ଧାର୍ଯ୍ୟ ହୋଇଥିଲା ତାରିଖ । ଦିନକୁ ୧୫ଘଣ୍ଟା ଯାଏଁ ପରିଶ୍ରମ କରି ପ୍ରସ୍ତୁତ ହେଉଥିଲେ ଅଦିତି । ଏଭଳି ସମୟରେ ଝିଅକୁ ସମ୍ପୂର୍ଣ୍ଣ ସାହାଯ୍ୟ କରୁଥିଲେ ଅଦିତିଙ୍କ ପିତା ଚନ୍ଦ୍ରଶେଖର । ଛାଇ ଭଳି ଝିଅର ପାଖେ ପାଖେ ରହି ଯୋଗାଉଥିଲେ ସବୁ ପ୍ରକାର ଆବଶ୍ୟକତା । ୨୬ ଜୁନ ସନ୍ଧ୍ୟା ୬ହେବ । ଅଦିତିଙ୍କ ସାକ୍ଷାତକାରକୁ ମାତ୍ର ଦୁଇଦିନ ବାକି ଥାଏ । ବଜାରରୁ କିଛି ସଉଦା ଆଣିବା ପାଇଁ ସ୍କୁଟର ନେଇ ବାହାରିଲେ ଚନ୍ଦ୍ରଶେଖର । କିଛି ସମୟ ପରେ ଖବର ଆସିଲା ଚନ୍ଦ୍ରଶେଖର ଆଉ ନାହାନ୍ତି । ଏକ ବାଇକ ସହ ତାଙ୍କର ମୁଂହାମୁହିଁ ଧକ୍କା ହେବା ଫଳରେ ଚାଲିଯାଇଛି ତାଙ୍କର ଜୀବନ ।
ପରିବାରରେ ଏଭଳି ଦୁଖଃଦ ସମୟରେ ସମସ୍ତଙ୍କୁ ସାହସ ଦେଲେ ଅଦିତି । ଦୁଃଖକୁ ନେଇ ସାକ୍ଷାତକାର ଦେବାକୁ ଗଲେ । ଓ ସଫଳତା ନେଇ ଘରକୁ ଫେରିଲେ । ତା ପରେ ଆରମ୍ଭ ହେଲା ତାଙ୍କର ୧୧ ମାସର କଠିନ ତାଲିମ ।
ଅଫିସର୍ସ ଟ୍ରେନିଂ ଏକାଡେମୀ ର ପାସିଂଆଉଟ ପରେଡରେ ସାମିଲ କିଛି ସାହସୀ ଓ ଆତ୍ମବିଶ୍ଵାସରେ ଭରା ମହିଳାଙ୍କୁ ଦେଖିବାକୁ ମିଳିଥିଲା । ଏମାନଙ୍କ ଭିତରେ ଥିଲେ ବିହାରର ଏହି ସାହସୀ ଯୁବତୀ ଅଦିତି ଯାଦବ । ସିଡିଏସ ସାକ୍ଷାତକାରର ଦୁଇଦିନ ପୂର୍ବରୁ ସଡ଼କ ଦୁର୍ଘଟଣାରେ ନିଜ ପିତାଙ୍କୁ ହରାଇଥିବା ଅଦିତି ନିଜ ପିତାଙ୍କ ସ୍ୱପ୍ନକୁ କିନ୍ତୁ ହଜାଇବାକୁ ଦେଇନଥିଲେ । ଅତ୍ୟନ୍ତ ସ୍ଥିରତାର ସହିତ ବିଚାରକଙ୍କ ସବୁ ପ୍ରଶ୍ନର ଦେଇଥିଲେ ଚତୁର ଉତ୍ତର । ଅଦିତି ସାକ୍ଷାତକାରରେ ସଫଳ ହେବା ଖବର ନିଜ ମାତାଙ୍କ ଆକ୍ଷିରେ ଆଣିଦେଇଥିଲା ଲୁହର ବନ୍ୟା । ସ୍ୱାମୀଙ୍କୁ ହରାଇବାର ଦୁଃଖକୁ ଭୁଲିଯିବା ଦିଗରେ ଝିଅର ଏତିକି ସଫଳତା ଦେଇଥିଲା ବହୁତ ବଡ଼ ଏକ ଶକ୍ତି ଓ ଆସ୍ୱସ୍ଥି ।