ଖବର ଓଡ଼ିଶା: ମହିଳା ଏସିଆ କପ୍ ରେ ଭାରତୀୟ ଦଳ ଦମଦାର ପ୍ରଦର୍ଶନ ଜାରି ରଖିଛି । ଟୁର୍ଣ୍ଣାମେଣ୍ଟରେ ଅପରାଜିତ ରହିଥିବା ବ୍ଲୁ ଆର୍ମି ସେମିଫାଇନାଲରେ ବାଂଲାଦେଶକୁ ପରାସ୍ତ କରି ଫାଇନାଲ ପାଇଁ ସ୍ଥାନ ନିଶ୍ଚିତ କରିଛି । ଭାରତୀୟ ଦଳ ଅତି ସହଜରେ ୧୦ ୱିକେଟ୍ ରେ ମ୍ୟାଚ୍ ରେ ବିଜୟୀ ହୋଇଛି । 

ଏସିଆ କପ୍-ରେ ପଡ଼ୋଶୀ ବାଂଲାଦେଶ ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା । ୨୦ ଓଭର୍ ବିଶିଷ୍ଟ ଟୁର୍ଣ୍ଣାମେଣ୍ଟରେ ବାଂଲାଦେଶ ଦଳ ପ୍ରଥମେ ବ୍ୟାଟିଂ କରିଥିଲା । ବିପକ୍ଷ ଦଳ ୮ଟି ୱିକେଟ୍ ହରାଇ ମାତ୍ର ୮୦ ରନରେ ସୀମିତ ରହିଥିଲା । ରେଣୁକା ସିଂ ଓ ରାଧା ଯାଦବ ୩ଟି ଲେଖାଏଁ ୱିକେଟ୍ ନେଇ ଥିବା ବେଳେ ଦୀପ୍ତି ଶର୍ମା ଗୋଟାଏ ୱିକେଟ୍ ନେଇଥିଲେ । ଏହା ପରେ ଭାରତୀୟ ଦଳ ବ୍ୟାଟିଂ ଆରମ୍ଭ କରିଥିଲା । ଭାରତୀୟ ଦଳ ବିନା ୱିକେଟରେ ଲକ୍ଷ୍ୟ ହାସଲ କରିଥିଲା । ସ୍ମୃତି ମାନ୍ଧାନା ୫୫ (୩୯) ଓ ସେଫାଲୀ ବର୍ମା ୨୬(୨୮) ରନ୍ କରି ଟିମ୍ କୁ ଫାଇନାଲରେ ପ୍ରବେଶ କରାଇଥିଲେ । ରେଣୁକା ସିଂ ପ୍ଲେୟାର ଅଫ୍ ଦ ମ୍ୟାଚ ହୋଇଛନ୍ତି ।  

ବର୍ତ୍ତମାନ ସମସ୍ତେ ପାକିସ୍ତାନକୁ ଅପେକ୍ଷା କରିଛନ୍ତି ଯାହାର ସେମିଫାଇନାଲ ମ୍ୟାଚ୍ କିଛି ସମୟ ମଧ୍ୟରେ ଆରମ୍ଭ ହେବ । ଦ୍ୱିତୀୟ  ସେମିଫାଇନାଲରେ ପାକିସ୍ତାନ ଶ୍ରୀଲଙ୍କାକୁ ଭେଟିବ ।