ସୁବର୍ଣ୍ଣପୁର : ବିଦ୍ୟାଳୟ ଭିତରେ ଆଣ୍ଠୁଏ ପାଣି। ରାଜରାସ୍ତାରେ ଛାତ୍ର ଛାତ୍ରୀ। ସ୍କୁଲ ଭିତରକୁ ପଶିଲା କେନାଲ ପାଣି। ସୁବର୍ଣ୍ଣପୁର ଜିଲ୍ଲା ବିନିକା ବ୍ଳକ ଗ୍ରାମରେ ଏଭଳି ଦୃଶ୍ୟ ଦେଖିବାକୁ ମିଳିଛି। ମହାଦେବପାଲି ଗ୍ରାମ ସ୍ଥିତ ଉଚ୍ଚ ପ୍ରାଥମିକ ବିଦ୍ୟାଳୟ ପରିସରରେ କେନାଲ ପାଣି ପଶି ସ୍କୁଲ ପରିସରରେ ଆଣ୍ଠୁଏ ପାଣି ଜମା ହୋଇଥିଲା। ଯାହାଫଳରେ ପିଲାଙ୍କ ପାଠ ପଢାରେ ବ୍ୟାଘାତ ହୋଇଥିଲା। ସ୍କୁଲ ଭିତରେ ସରିସୃପ ପହଁରୁଥିବା ମଧ୍ୟ ଦେଖିବାକୁ ମିଳିଥିଲା। ଏହି ସମସ୍ୟା ଅନେକ ଦିନରୁ ରହି ଆସିଥିଲେ ହେଁ ତାର ସମାଧାନ କରାଯାଉନାହିଁ। 

ସାମାନ୍ୟ ବର୍ଷା ହେଲେ ଏଭଳି ପାଣି ଜମି ରହୁଥିବାରୁ ବାରମ୍ବାର ବିଭାଗୀୟ ଅଧିକାରୀଙ୍କ ଦୃଷ୍ଟି ଆକର୍ଷଣ କରିଥିଲେ ମଧ୍ୟ କେହି ଶୁଣୁନଥିବା ଗ୍ରାମବାସୀ ତଥା ଅବିଭାବକ ମାନେ ଅଭିଯୋଗ ଆଣିଥିଲେl ଏବଂ ଛାତ୍ରଛାତ୍ରୀ ଅବିଭାବକ ମାନେ ବାଧ୍ୟ ହୋଇ ରାଜ ରାସ୍ତାକୁ ଆସି ସୋନପୁର ବିନିକା ମୁଖ୍ୟ ରାସ୍ତା ଅବରୋଧ କରିଥିଲେ। ଏ ସମ୍ପର୍କରେ ଜାଣିବା ପରେ ଜିଲ୍ଲାପାଳ ନୃପାରାଜ୍ ସାହୁ ଘଟଣା ସ୍ଥଳରେ ପହଞ୍ଚିଥିଲେ। ତୁରନ୍ତ ବିଦ୍ୟାଳୟରେ ଜମି ରହିଥିବା ପାଣି ବାହାର କରିବାକୁ ବ୍ୟବସ୍ଥା କରିଥିଲେ। ବିଦ୍ୟାଳୟରେ ପାଣି ପଶିଥିବାରୁ ପିଲାଙ୍କ ପାଠ ପଢାରେ ବ୍ୟାଘାତ ସୃଷ୍ଟି ହୋଇଥିଲା। ଗ୍ରାମବାସୀ ଏହାର ସ୍ଥାୟୀ ସମାଧାନ ଦାବି କରିଥିଲେ। ତେବେ ତୁରନ୍ତ ଏହାର ସମାଧାନ କରାଯିବ ବୋଲି ଜିଲ୍ଲାପାଳ ପ୍ରତିଶୃତି ଦେଇଛନ୍ତି।