ଛତ୍ରପୁର: ଗଞ୍ଜାମ ଜିଲ୍ଲା ନଦୀକୂଳରେ ଆରମ୍ଭ ହେବ ପକ୍ଷୀ ଗଣନା l ମୋଟ୍ ୪୯ ୟୁନିଟ୍‌ରେ ହେବ ଗଣତି l ଶୀତ ଋୁତୁରେ ଗଞ୍ଜାମ ଜିଲ୍ଲାର ଚିଲିକା ସମେତ ବହୁ ନଦୀ କୁଳିଆ ଅଞ୍ଚଳରେ ବିଦେଶୀ ପକ୍ଷୀଙ୍କ ସମାଗମ ଦେଖିବାକୁ ମିଳେ l ଏନେଇ ପ୍ରତି ବର୍ଷ ଏହି ପକ୍ଷୀ ଗଣନା ସରକାରଙ୍କ ପକ୍ଷରୁ କରାଯାଉଛି । ୧୮ ତାରିଖରେ ପକ୍ଷୀ ଗଣନା କାର୍ଯ୍ୟ କରାଯିବ । ସକାଳ ୬ଟାରୁ ଦିନ ୧୧ଟା ଯାଏଁ ଗଞ୍ଜାମ ଜିଲ୍ଲାର ଋଷିକୂଲ୍ୟା ଓ ବାହୁଦା ନଦୀ କୂଳରେ ପକ୍ଷୀ ଗଣନା ଆରମ୍ଭ ହେବ l ପୂର୍ବବର୍ଷ ପରି ଏହାକୁ ନିର୍ଭୁଲ ଭାବେ କରିବା ପାଇଁ ଗଞ୍ଜାମ ପୁରୁଣା ବନ୍ଧ ଗଙ୍ଗା ଦେବୀ ନଦୀକୂଳରେ ଥିବା ବନ ବିଭାଗ କାର୍ଯ୍ୟାଳୟରେ ଏକ ତାଲିମ ଶିବିର ଅନୁଷ୍ଠିତ ହୋଇଯାଇଛି l ୱାଇଲ୍ଡ ଲାଇଫ୍ କନଜରଭେଟର ମୁଖ୍ୟ ଡ଼ଃ.ସୁବ୍ରତ ଦେବତା ଯୋଗଦେଇ ପ୍ରଶିକ୍ଷଣ ପ୍ରଦାନ କରିଥିଲେ l ବିଶେଷ କରି ପୋତାଗଡ଼, ତାମ୍ପରା, ପାଲୁରୁ କେନାଲ, ଋଷିକୂଲ୍ୟା ନଦୀ, ବାଘଲଟି, ବାହୁଦା, ଘୋଡ଼ାହାଡ଼ ଆଦି ଅଞ୍ଚଳରେ ପକ୍ଷୀ ଗଣନା କରାଯିବ l

ଖଲ୍ଲିକୋଟ ରେଞ୍ଜର ଦିବ୍ୟଶଙ୍କର ବେହେରାଙ୍କ ଅଧ୍ୟକ୍ଷତାରେ ଆୟୋଜିତ ଏହି ପ୍ରସ୍ତୁତି ବୈଠକରେ ପକ୍ଷୀ ଗଣନା କାର୍ଯ୍ୟ ସୂଚାରୁରୂପେ ସମ୍ପାଦନ କରାଯାଇପାରିବ ଏବଂ ନିର୍ଭୁଲ ରିପୋର୍ଟ ପ୍ରସ୍ତୁତ କରାଯାଇପାରିବ ସେନେଇ ବନ ବିଭାଗ କର୍ମଚାରୀଙ୍କୁ ତାଲିମ ପ୍ରଦାନ କରାଯାଇଥିଲା l ବ୍ରହ୍ମପୁର ବନ ବିଭାଗ ଅଧିନରେ ମୋଟ୍ ୪୯ଟି ୟୁନିଟ ଗଠନ କରାଯାଇଛି l ସାମନ୍ତରାପଲ୍ଲୀରେ ୮ଟି ୟୁନିଟ କରାଯାଇଥିବା ବେଳେ, ଖଲ୍ଲିକୋଟରେ ୧୫ଟି, ବ୍ରହ୍ମପୁରରେ ୧୩ଟି ଓ ଦିଗପହଣ୍ଡିରେ ୧୩ଟି ୟୁନିଟ କରାଯାଇଛି l ପ୍ରତି ୟୁନିଟ୍‌ରେ ୩ ଜଣ ଲେଖାଁଏ ରହିବେ l ସେମାନଙ୍କୁ ବାଇନାକୁଲାର, ନୋଟ୍‌ପ୍ୟାଡ୍ ଭଳି ଆବଶ୍ୟକୀୟ ଉପକରଣ ପ୍ରଦାନ କରାଯିବ l ଦିନ ୨ଟା ସୁଦ୍ଧା ପ୍ରତି ୟୁନିଟ୍ ନିଜ ନିଜ ରିପୋର୍ଟ ଦାଖଲ କରିବେ l ଗତବର୍ଷ ୧୪୫ ପ୍ରଜାତିର ୨୨ ହଜାର ୭୭୭ ପକ୍ଷୀ ଆସିଥିବା ବେଳେ ଚଳିତ ବର୍ଷ ମଧ୍ୟ ଅନେକ ପ୍ରଜାତିର ପକ୍ଷୀ ଆସିବା ଲାଗି ବନ ବିଭାଗ ଆଶା ରଖିଛି ।

ଅଧିକ ପଢନ୍ତୁ : ବିଜାପୁରରେ ସୁରକ୍ଷା କର୍ମୀଙ୍କ ବଡ଼ ସଫଳତା,ଏନକାଉଣ୍ଟରରେ ଟଳିଲେ ୨ ନକ୍ସଲ