ଭୁବନେଶ୍ୱର:  ଗଭୀର ଅବପାତ ଜନିତ ବର୍ଷା ପରେ ଏବେ ପୁଣି ଥରେ ବନ୍ୟା ଆଶଙ୍କା ଦେଖା ଦେଇଛି । ବିଭିନ୍ନ ନଦୀରେ ଜଳସ୍ତର ବୃଦ୍ଧି ପାଇଥିବାବେଳେ ବନ୍ୟା ଆଶଙ୍କାରେ ଲୋକେ ଭୟଭୀତ ଅବସ୍ଥାରେ ରହିଛନ୍ତି । ମାଲକାନଗିରିଠାରୁ ଆରମ୍ଭ କରି ମୟୁରଭଞ୍ଜ ଯାଏ ଅନେକ  ଜଳମଗ୍ନ ହୋଇ ରହିଛି । ମୟୂରଭଞ୍ଜରେ ପ୍ରାୟ ୨୦ଟି ବ୍ଲକ ପ୍ରଭାବିତ ହୋଇଛି । 

ସୂଚନା ଅନୁସାରେ ଜିଲ୍ଲାର ୨୦ଟି ବ୍ଲକ, ଗୋଟିଏ ପୌରପାଳିକା ଓ ଗୋଟିଏ ଏନ୍‌ଏସି ବନ୍ୟାରେ ପ୍ରଭାବିତ ।  ବେତନଟୀ-ବଡ଼ସାହି ସମେତ ବିଭିନ୍ନ ଅଞ୍ଚଳର ଗାଁ ଏବେବି ଜଳମଗ୍ନ । ବନ୍ୟା ଯୋଗୁଁ ବେତନଟୀ ବ୍ଲକର ପାଟଳୀପୁରା, କଳମା ଏବଂ ବଡ଼ସାହି ବ୍ଲକର ଶାଳଗାଁ, ମାନଗୋବିନ୍ଦପୁର, ଚନ୍ଦନପୁର, ଦୁର୍ଗାପୁର, କେନ୍ଦୁଡ଼ିହ ଓ ବଳଭଦ୍ରପୁର ଭଳି ଅନେକ ଗାଁ ଜଳମଗ୍ନ ହୋଇଛି। ବୁଢାବଳଙ୍ଗ ନଦୀ ନାଖରା ପୋଲ ଉପରେ ୨-୩ ଫୁଟ୍ ପାଣି ଚାଲୁଥିବା ବେଳେ ବେତନଟୀ-ବଡ଼ସାହି, ମାଣତ୍ରୀ-ବୈଶିଙ୍ଗା ରାସ୍ତାରେ ଯାତାୟାତ ଠପ୍ ହୋଇଯାଇଛି । 

ସେହିପରି ବର୍ଷା ଓ ବନ୍ୟା ପାଇଁ ଉଦ୍ଧାର କାର୍ଯ୍ୟକୁ ମଧ୍ୟ ଜୋରଦାର କରାଯାଇଛି । ଜିଲ୍ଲାରେ ୩ଟି ଓଡ୍ରାଫ୍ ଓ ୧୮ ଅଗ୍ନିଶମ ଟିମ୍ ନିୟୋଜିତ ହୋଇଛନ୍ତି । ୧୦,୩୭୩ ଜଣଙ୍କୁ ପ୍ରଭାବିତଙ୍କ ଆଶ୍ରୟ ସ୍ଥଳକୁ ସ୍ଥାନାନ୍ତର କରାଯାଇଛି । ପ୍ରାୟ ୮୯ ରିଲିଫ୍ କ୍ୟାମ୍ପ ଓ ୭୨ ମାଗଣା ରୋଷେଇ କେନ୍ଦ୍ର ଚାଲୁ ରହିଛି । 

ଜିଲ୍ଲାରେ ଆଜି ପାଇଁ ୭ଟି ବ୍ଲକର ସମସ୍ତ ସ୍କୁଲ ବନ୍ଦ ରହିଛି । ଉଦ୍ଧାର ଓ ରିଲିଫ୍ କାର୍ଯ୍ୟ ଜାରି ରହିଛି। ବନ୍ୟା ପରିସ୍ଥିତିକୁ ନଜରରେ ରଖି ଆଜି ଠାକୁରମୁଣ୍ଡା, କପ୍ତିପଦା, ଉଦଳା, ଗୋପବନ୍ଧୁନଗର, ଖୁଣ୍ଟା, ବଡ଼ସାହି ଓ ବେତନଟୀ ବ୍ଲକର ୧ମରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ସମସ୍ତ ସ୍କୁଲ ବନ୍ଦ ରହିଛି। 

ସେପଟେ ବାରିପଦା ସହରର ବିଭିନ୍ନ ୱାର୍ଡରୁ ବନ୍ୟା ପାଣି ଛାଡ଼ିବା ପରେ ଲୋକେ ଧୀରେ ଧୀରେ ସ୍ୱାଭାବିକ ଜୀବନକୁ ଫେରୁଛନ୍ତି । ଉଦଳା, କପ୍ତିପଦା, ବାଙ୍ଗିରିପୋଷି ଓ ସାରସକଣା ଅଞ୍ଚଳରେ ମଧ୍ୟ ସ୍ଥିତି ସୁଧୁରିଥିବା ବେଳେ କଟ୍‌ଅଫ୍ ରାସ୍ତାରେ ଯାତାୟାତ ସ୍ୱାଭାବିକ ହୋଇଛି ।