ମ୍ୟାଚ୍‌ ଜାରି ଥିବା ବେଳେ ସୁରକ୍ଷାର ସୀମା ଅତିକ୍ରମ କରି ରୋହିତ ଶର୍ମାଙ୍କୁ ଦଣ୍ଡବତ କଲେ ପ୍ରଶଂସକ
Khabar Odisha:Sports-cricket-Fan-breaches-security-tries-to-touch-Rrohit-Sharmas-feet-during-2nd-T20-in-Ranchi

ରାଞ୍ଚି, ନଭେମ୍ବର ୨୦ (ଖବର ଓଡ଼ିଶା): ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଶୁକ୍ରବାର ଟି-୨୦ ଶୃଙ୍ଖଳାର ୨ୟ ମ୍ୟାଚ ରାଞ୍ଚିରେ ଜାରିଥିବା ବେଳେ ଜଣେ ପ୍ରଶଂସକ ଅଚାନକ ପଡ଼ିଆ ଭିତରକୁ ଦୌଡ଼ିଛନ୍ତି। ସେ ରୋହିତ ଶର୍ମାଙ୍କ ନିକଟକୁ ଯାଇ ଦଣ୍ଡବତ କରିଛନ୍ତି। ରୋହିତଙ୍କ ଏହି ପ୍ରଶଂସକ ଜଣକ ସୁରକ୍ଷାକର୍ମୀଙ୍କ ଖାତିର ନକରି ସିଧାସଳଖ ପଡ଼ିଆ ଭିତରକୁ ପ୍ରବେଶ କରିଥିଲେ। 

ପ୍ରଶଂସକଙ୍କର ଏଭଳି ବ୍ୟବହାର ଦେଖି ରୋହିତ ଶର୍ମା ଭାବୁକ ହୋଇଯାଇଥିଲେ। ସେ ପ୍ରଶଂସକଙ୍କୁ ଏଭଳି ନକରିବାକୁ କହି ଉଠିବାକୁ ଅନୁରୋଧ କରିଥିଲେ। ରୋହିତଙ୍କ ଏହି ପ୍ରଶଂସକ ମାଟିରେ ଶୋଇ ଦୁଇ ହାତଯୋଡ଼ି ପ୍ରଣାମ କରିଥିଲେ। ମାତ୍ର ସେ ରୋହିତଙ୍କ ପାଦ ସ୍ପର୍ଶ କରିପାରି ନଥିଲେ। 

ସୁରକ୍ଷା କର୍ମୀ ନିଜଆଡ଼କୁ ଆସୁଥିବା ଦେଖି ସେ ହଠାତ୍‌ ଛିଡ଼ା ହୋଇଥିଲେ ଏବଂ ପୁଣି ଥରେ ଦୌଡ଼ି ଦର୍ଶକଙ୍କ ନିକଟରେ ବସିପଡ଼ିଥିଲେ। ଅନେକ ଲୋକ ଏହି ଦୃଶ୍ୟକୁ ନିଜ ମୋବାଇଲରେ କଏଦ କରିଛନ୍ତି। କ୍ରିକେଟରେ ଏହା ପ୍ରଥମ ଘଟଣା ନୁହେଁ। ପୂର୍ବରୁ ମଧ୍ୟ ଏଭଳି ପରିସ୍ଥିତି ଉପୁଜିଛି। ମ୍ୟାଚ ଚାଲିଥିବା ବେଳେ ପୂର୍ବରୁ ମଧ୍ୟ ରୋହିତଙ୍କ ନିକଟକୁ ପ୍ରଶଂସକମାନେ ଦୌଡ଼ିଛନ୍ତି। 

ତେବେ ଭାରତ ଶୁକ୍ରବାର ମ୍ୟାଚରେ ଉଭୟ ବୋଲିଂ ଓ ବ୍ୟାଟିଂ କ୍ଷେତ୍ରରେ ଭଲ ପ୍ରଦର୍ଶନ କରିଥିବାରୁ ମ୍ୟାଚକୁ ୭ ୱିକେଟ୍‌ରେ ଜିତିଛି। ଏଥି ସହିତ ଟି-୨୦ ଶୃଙ୍ଖଳାରେ ୨-୦ରେ ଅଗ୍ରଣୀ ରହିଛି। ନ୍ୟୁଜିଲାଣ୍ଡ ପ୍ରଥମେ ବ୍ୟାଟିଂ କରିଥିଲା ଏବଂ ନିର୍ଦ୍ଧାରିତ ୨୦ ଓଭରରେ ୬ଟି ୱିକେଟ ହରାଇ ୧୫୩ ରନ୍‌ କରିଥିଲା। ଫଳରେ ଭାରତକୁ ୧୫୪ ରନ୍‌ର ବିଜୟ ଲକ୍ଷ୍ୟ ମିଳିଥିଲା। ଭାରତର ଇନିଂସ ଆରମ୍ଭ କରିଥିଲେ ରୋହିତ ଶର୍ମା(୫୫ ରନ୍‌, ୩୬ ବଲ, ଗୋଟିଏ ଚୌକା, ୫ଛକା) ଓ କେଏଲ୍‌ ରାହୁଲ (୬୫ ରନ୍‌, ୪୯ ବଲ, ୬ଚୌକା, ୨ ଛକା)। ଟିମ୍‌ ଇଣ୍ଡିଆ ୧୭.୩ ଓଭରରେ ୩ଟି ୱିକେଟ୍‌ ହରାଇ ୧୫୫ ରନ୍‌ କରିଥିଲା। 

 

 

  • Tags:

Subscribe

National International State Sports Entertainment