ଭୁବନେଶ୍ୱର:

ଓଡ଼ିଶା ରାଜନୀତିରେ ଏକ ବଡ଼ ଧରଣର ଅଦଳବଦଳ ଦେଖିବାକୁ ମିଳିଛି। ବରିଷ୍ଠ ନେତା ତଥା ଚୌଦ୍ୱାର-କଟକ ନିର୍ବାଚନ ମଣ୍ଡଳୀର ପୂର୍ବତନ ବିଧାୟକ ପ୍ରଭାତ ବିଶ୍ୱାଳ ରବିବାର ଆନୁଷ୍ଠାନିକ ଭାବେ ଭାରତୀୟ ଜନତା ପାର୍ଟି (ବିଜେପି)ରେ ଯୋଗ ଦେଇଛନ୍ତି। ଭୁବନେଶ୍ୱରସ୍ଥିତ ରାଜ୍ୟ ବିଜେପି କାର୍ଯ୍ୟାଳୟରେ ଆୟୋଜିତ ଏକ ଭବ୍ୟ ମିଶ୍ରଣ ପର୍ବରେ ସେ ନିଜର ଶହ ଶହ ସମର୍ଥକଙ୍କ ସହ ପଦ୍ମ ଶିବିରରେ ସାମିଲ ହୋଇଛନ୍ତି।

ମୁଖ୍ୟମନ୍ତ୍ରୀ ଓ ରାଜ୍ୟ ସଭାପତିଙ୍କ ଉପସ୍ଥିତିରେ ମିଶ୍ରଣ

ଏହି ହାଇପ୍ରୋଫାଇଲ୍ ମିଶ୍ରଣ ପର୍ବରେ ଖୋଦ୍ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏବଂ ବିଜେପି ରାଜ୍ୟ ସଭାପତି ମନମୋହନ ସାମଲ ଉପସ୍ଥିତ ରହି ପ୍ରଭାତ ବିଶ୍ୱାଳଙ୍କୁ ଦଳକୁ ସ୍ୱାଗତ କରିଥିଲେ। ସେମାନଙ୍କ ସହ ବିଜେପିର ଅନ୍ୟାନ୍ୟ ବରିଷ୍ଠ ନେତୃବୃନ୍ଦ ମଧ୍ୟ ଏହି କାର୍ଯ୍ୟକ୍ରମରେ ସାମିଲ ଥିଲେ। ବିଜେପିରେ ଯୋଗଦେବା ପୂର୍ବରୁ ଆଜି ସକାଳୁ କଟକ ମହାନଦୀ ବିହାରସ୍ଥିତ ପ୍ରଭାତଙ୍କ ବାସଭବନରେ ସମର୍ଥକଙ୍କ ପ୍ରବଳ ଭିଡ଼ ଜମିଥିଲା ଏବଂ ସେଠାରେ ବିଜେପି ବ୍ୟାନରରେ ତାଙ୍କ ଫଟୋ ଲଗାଯାଇ ଉତ୍ସବର ମାହୋଲ ସୃଷ୍ଟି ହୋଇଥିଲା।

ବିଜେଡିରୁ ଇସ୍ତଫା ପରେ ନୂଆ ଇନିଂସ

ଦୀର୍ଘ ବର୍ଷ ଧରି ପ୍ରଭାତ ବିଶ୍ୱାଳ ବିଜୁ ଜନତା ଦଳ (ବିଜେଡି)ର ଏକ ପ୍ରମୁଖ ଚେହେରା ରହିଥିଲେ ଏବଂ ଚୌଦ୍ୱାର-କଟକ ଅଞ୍ଚଳରେ ତାଙ୍କର ଦୃଢ଼ ସଂଗଠନ ରହିଛି। ବିଜେଡି ସହ ସମ୍ପର୍କ ତୁଟାଇବା ପରେ ସେ ଆଜିଠାରୁ ବିଜେପି ବ୍ୟାନର ତଳେ ନିଜର ନୂଆ ରାଜନୈତିକ ଇନିଂସ ଆରମ୍ଭ କରିଛନ୍ତି।

ଭୁଶୁଡ଼ିବ କି ବିଜେଡି ଗଡ଼?

ପ୍ରଭାତ ବିଶ୍ୱାଳଙ୍କ ଭଳି ଜଣେ ପ୍ରଭାବଶାଳୀ ନେତା ବିଜେପିକୁ ଯିବା ପରେ ଚୌଦ୍ୱାର-କଟକ ନିର୍ବାଚନ ମଣ୍ଡଳୀରେ ବିଜେଡିର ଗଡ଼ ଭୁଶୁଡ଼ି ପଡ଼ିବ ବୋଲି ରାଜନୈତିକ ସମୀକ୍ଷକମାନେ ଚର୍ଚ୍ଚା କରୁଛନ୍ତି। ତାଙ୍କ ମିଶ୍ରଣ ଯୋଗୁଁ ଏହି ଅଞ୍ଚଳରେ ବିଜେପିର ସ୍ଥିତି ଆହୁରି ମଜଭୁତ ହେବ ବୋଲି କୁହାଯାଉଛି। ତେବେ ଏହି ବଡ଼ ରାଜନୈତିକ ପରିବର୍ତ୍ତନ ପରେ ଆଗାମୀ ଦିନରେ ବିଜେଡି ନିଜ ସ୍ଥିତି କିଭଳି ବଜାୟ ରଖୁଛି, ତାହା ଦେଖିବାକୁ ବାକି ରହିଲା।