ଭୁବନେଶ୍ୱର: ବହୁ ବିବାଦ ମଧ୍ୟରେ ୱକଫ୍ ସଂଶୋଧନ ବିଲ୍ ସଂସଦରେ ପାରିତ ହୋଇସାରିଛି । କିନ୍ତୁ ଏହା ପରେ ବିଜୁ ଜନତା ଦଳରେ ବିବାଦ ସୃଷ୍ଟି ହୋଇଛି । ବିଲକୁ ନେଇ ଦଳର ସଦସ୍ୟମାନେ ଦୁଇ ଫାଳ ହୋଇଯାଇଛନ୍ତି । କିଛି ରାଜ୍ୟସଭା ସଦସ୍ୟ ବିଲ୍ ସପକ୍ଷରେ ଭୋଟ୍ ଦେଇଥିବାବେଳେ କିଛି ବିଲ୍ ବିରୁଦ୍ଧରେ ଭୋଟ୍ ଦେଇଛନ୍ତି ଏବଂ ଆଉ କିଛି ବିଲକୁଲ ମତ ଦେଇ ନାହାଁନ୍ତି । ତେବେ ଏହାରି ମଧ୍ୟରେ ଦଳର ସୁପ୍ରିମୋଙ୍କୁ କେହି ମାନୁ ନ ଥିବା ନେଇ ଚର୍ଚ୍ଚା ଆରମ୍ଭ ହୋଇଯାଇଛି । ସେପଟେ ଦଳର ବରିଷ୍ଠ ନେତା ବଦ୍ରି ନାରାୟଣ ପାତ୍ର ବଡ଼ ବୟାନ ଦେଇଛନ୍ତି । ସଦସ୍ୟଙ୍କ ମଧ୍ୟରେ କିଛି ଖେଳ ହୋଇଥିବା ନେଇ ସନ୍ଦେହ ପ୍ରକାଶ କରିଛନ୍ତି ବଦ୍ରି । 

ବିଧାୟକ ବଦ୍ରି ପାତ୍ର କହିଛନ୍ତି, ଏହା ଅଡ଼ୁଆ ପରିସ୍ଥିତି ସୃଷ୍ଟି କରିଛି । ସଭାପତି (ନବୀନ ପଟ୍ଟନାୟକ) ନିଷ୍ଠାପର ଭାବରେ ନିର୍ଦ୍ଦେଶ ଦେଇଥିଲେ ଯେ ୱକଫ୍ ବିଲ ବିପକ୍ଷରେ ଭୋଟ ଦେବାକୁ, କିନ୍ତୁ ଏମିତି କେମିତି ହେଲା ତାହା ବର୍ତ୍ତମାନ ଚିନ୍ତାର ବିଷୟ । ସେହି ଭାବରେ ସାଂସଦ ମୁନ୍ନା ଖାଁ ସଂସଦରେ ନିଜର ବକ୍ତବ୍ୟ ରଖିଥିଲେ । ଏମିତିକି ଦଳର ଇଫତାର ପାର୍ଟିରେ ମଧ୍ୟ ସଭାପତି କହିଥିଲେ ଯେ ବିରୋଧ କରିଥିଲେ । କାହିଁକି ହ୍ୱିପ୍ ରହିଲା ନାହିଁ, କାହିଁକି ସପକ୍ଷରେ ଏବଂ ବିପକ୍ଷରେ ଭୋଟ୍ ହେଲା ସେ ନେଇ ଆଲୋଚନା କରାଯିବ ବୋଲି ବଦ୍ରି କହିଛନ୍ତି । 

ସେପଟେ ବିଧାୟକ ପ୍ରସନ୍ନ ଆଚାର୍ଯ୍ୟ କହିଛନ୍ତି, ସସ୍ମିତ ପାତ୍ର ସପକ୍ଷରେ ଭୋଟ ଦେବେ ଆମେ ଅବଗତ ନ ଥିଲୁ । ଆମେ ଆଜି ହିଁ ଦଳର ସଭାପତିଙ୍କ ସହ ଆଲୋଚନା କରିବାକୁ ନିଷ୍ପତ୍ତି ନେଇଛୁ । ସଭାପତି ପୂର୍ବରୁ କହିଥିଲେ ଯେ ଆମେ ଏକ ଧର୍ମ ନିରପେକ୍ଷ ଦଳ ଏବଂ ଆମେ ୱାକଫ୍ ବିଲ୍‌କୁ ବିରୋଧ କରିବୁ । କେଉଁ ପରିସ୍ଥିତିରେ ଦଳ ଶେଷ ମୂହୁର୍ତ୍ତରେ ଏପରି ନିଷ୍ପତ୍ତି ନେଇଛି ତାହା ଆମେ ଜାଣି ନାହୁଁ । 

ବିଜେଡ଼ି ସାଂସଦ ସସ୍ମିତ ପାତ୍ର ୱକଫ୍ ବିଲ ସପକ୍ଷରେ ଭୋଟ ଦେଇଥିବାବେଳେ ବିପକ୍ଷରେ ମୁନ୍ନା ଖାଁ ଭୋଟ ଦେଇଥିଲେ । ସେହିପରି ଦେବାଶିଷ ସାମନ୍ତ ଦ୍ୱନ୍ଦ୍ୱରେ ରହି ମତଦାନରୁ ଦୂରେଇ ରହିଥିଲେ । ତେବେ ଅନ୍ୟ ସାଂସଦଙ୍କର ମତ ଏ ଯାଏଁ ସାମ୍ନାକୁ ଆସିନାହିଁ ।