ନୂଆଦିଲ୍ଲୀ: ଲୋକସଭା ପରେ ରାଜ୍ୟସଭାରେ ମଧ୍ୟ ୱାକଫ ସଂଶୋଧନ ବିଧେୟକ ୨୦୨୫ ପାରିତ ହୋଇଛି । କିନ୍ତୁ କଂଗ୍ରେସ ବିଧେୟକୁ ତୀବ୍ର ବିରୋଧ କରିଛି । ଦେଶର ସର୍ବପୁରାତନ ଦଳର କହିବା କଥା ଶୀଘ୍ର ୱାକଫ ସଂଶୋଧନ ବିଧେୟକ ବିୋଧରେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହେବ ଏବଂ ଏହାର ସାମ୍ବିଧାନିକ ବୈଧତାକୁ ଚ୍ୟାଲେଞ୍ଜ କରାଯିବ । ପାର୍ଟିର ସାଧାରଣ ସଂପାଦକ ଜୟରାମ ରମେଶ ଏକ୍ସରେ ପୋଷ୍ଟ କରି ଏହାର ସୂଚନା ଦେଇଛନ୍ତି ।

ସେ କହିଛନ୍ତି, ଆମେ ମୋଦୀ ସରକାରଙ୍କ ଦ୍ୱାରା ଭାରତୀୟ ସମ୍ବିଧାନରେ ନିହିତ ସିଦ୍ଧାନ୍ତ, ପ୍ରାବଧାନ ଓ ପ୍ରଥା ଉପରେ ହେଉଥିବା ହମଲାର ବିରୋଧ କରି ଚାଲିବୁ । ଏହା ସହିତ କଂଗ୍ରେସ ନାଗରିକ ସଂଶୋଧନ ଅଧିନିୟମ, ୨୦୧୯କୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିବ । କେବଳ ଏତିକି ନୁହେଁ ଦଳ ୨୦୧୯ରେ ଆରଟିଆଇ ଆକ୍ଟ, ୨୦୦୫ରେ ହୋଇଥିବା ସଂଶୋଧନକୁ ବି ସୁପ୍ରିମକୋର୍ଟରେ ଚ୍ୟାଲେଞ୍ଜ କରିବ ।

ରମେଶ କହିଛନ୍ତି, କଂଗ୍ରେସ ୧୯୯୧ର ପୂଜାସ୍ଥଳ ଅଧିନିୟମର ଭାବନା ଓ ପତ୍ରକୁ ବଜାୟ ରଖିବା ପାଇଁ ସୁପ୍ରିମକୋର୍ଟଙ୍କ ହସ୍ତକ୍ଷେପ ଲୋଡିଛି । ଏହି ବିଧେୟକକୁ ଲୋକସଭାରେ ଗୁରୁବାର ପାରିତ କରାଯାଇଥିଲା । ଏହା ପରେ ରାଜ୍ୟସଭାରେ ମଧ୍ୟ ବିଧେୟକ ଗୃହୀତ ହୋଇଛି । ତେବେ କଂଗ୍ରେସର ମୂଳ ଫୋକସ ୱାକଫ ସଂଶୋଧନ ବିଧେୟକ ଉପରେ ରହିଛି । 

ଏହା ପୂର୍ବରୁ ରାଜ୍ୟସଭାରେ ବିରୋଧୀ ଦଳ ନେତା ମଲ୍ଲିକାର୍ଜୁନ ଖଡଗେ ୱାକଫ ସଂଶୋଧନ ବିଧେୟକକୁ ମୁସଲମାନ ବିରୋଧୀ ଦର୍ଶାଇଥିଲେ । ଏହି ବିଧେୟକକୁ ସଂଖ୍ୟାଲଘୁଙ୍କ ବିନାଶ ପାଇଁ ଅଣାଯାଇଛି । ଦେଶରେ ସଂଖ୍ୟାଲଘୁଙ୍କୁ ହଇରାଣ କରିବା ହିଁ ଏହି ବିଧେୟକର ମୂଳ ଉଦ୍ଦେଶ୍ୟ । ଏହା କଦାପି ଗ୍ରହଣୀୟ ନୁହେଁ ।