ନୂଆଦିଲ୍ଲୀ: ନିଟ୍ ପାଠ୍ୟକ୍ରମରେ ନାମ ଲେଖାଇବାକୁ ଧର୍ମାନ୍ତୀକରଣକୁ ନେଇ ସୁପ୍ରିମକୋର୍ଟ କ୍ଷୋଭ ପ୍ରକାଶ କରିଛନ୍ତି । ସଂଖ୍ୟାଲଘୁ ସଂରକ୍ଷଣ ଲାଭ ପାଇବା ପାଇଁ ପରୀକ୍ଷା ପୂର୍ବରୁ ବୌଦ୍ଧ ଧର୍ମ ଗ୍ରହଣ କରିଥିଲେ ଏବଂ ସଂଖ୍ୟାଲଘୁ ପ୍ରମାଣପତ୍ର ପ୍ରଦାନ ସମ୍ପର୍କରେ ହରିୟାଣା ସରକାରଙ୍କଠାରୁ ସୁପ୍ରିମକୋର୍ଟ ସ୍ପଷ୍ଟୀକରଣ ଲୋଡିଛନ୍ତି । 

ବିଚାରପତି ସୂର୍ଯ୍ୟକାନ୍ତ ଏବଂ ଜୟମାଲ୍ୟ ବାଗଚୀଙ୍କ ଖଣ୍ଡପୀଠ ଏହି ପ୍ରୟାସକୁ କଡ଼ା ସମାଲୋଚନା କରିଛନ୍ତି ଏବଂ ପରିବାରର ଉଦ୍ଦେଶ୍ୟ ଉପରେ ସନ୍ଦେହ ପ୍ରକାଶ କରିଛନ୍ତି । ମୁଖ୍ୟ ବିଚାରପତି ଏହାକୁ ଠକେଇର ଏକ ନୂତନ ରୂପ ବୋଲି କହିଛନ୍ତି । ସିଜେଆଇ ସୂର୍ଯ୍ୟକାନ୍ତ ଆବେଦନକାରୀଙ୍କ ଯାଚିକାକୁ ସମ୍ପୂର୍ଣ୍ଣ ଖାରଜ କରି କହିଛନ୍ତି ଆପଣ ସଂଖ୍ୟାଲଘୁଙ୍କ ଅଧିକାର ଛଡ଼ାଇ ନେବାକୁ ଚାହୁଁଛନ୍ତି। ଆପଣ ଦେଶର ସବୁଠାରୁ ଧନୀ ସ୍ଥାନ ମଧ୍ୟରୁ ଗୋଟିଏରୁ ଆସିଛନ୍ତି। ଆପଣଙ୍କୁ ଆପଣଙ୍କର ଦକ୍ଷତା ଉପରେ ଗର୍ବ ହେବା ଉଚିତ। ଏହା ଆଉ ଏକ ପ୍ରକାରର ଠକେଇ। ଆମକୁ ଅଧିକ ମନ୍ତବ୍ୟ ଦେବାକୁ ବାଧ୍ୟ କରନ୍ତୁ ନାହିଁ।" ଜଷ୍ଟିସ୍ ବାଗଚି ମଧ୍ୟ ମନ୍ତବ୍ୟ ଦେଇଥିଲେ, "ଆପଣ ପରୀକ୍ଷା ପୂର୍ବରୁ ବୌଦ୍ଧ ଧର୍ମ ଗ୍ରହଣ କରିଥିଲେ କି?" କୋର୍ଟ ଜିଲ୍ଲା ପ୍ରଶାସନର ଭୂମିକା ଉପରେ ମଧ୍ୟ ପ୍ରଶ୍ନ ଉଠାଇ ପଚାରିଥିଲେ, "ହିସାର ସବ-ଡିଭିଜନାଲ୍ ଅଫିସର୍ କିପରି ଏପରି ପ୍ରମାଣପତ୍ର ପ୍ରଦାନ କଲେ ବୋଲି ଜଷ୍ଟିସ୍ ବାଗଚି ପ୍ରଶ୍ନ ଉଠାଇଛନ୍ତି । 

କୋର୍ଟ ଜାଣିବାକୁ ପାଇଛନ୍ତି ଯେ ଉଭୟ ପ୍ରାର୍ଥୀ ଆବେଦନ କରିବା ସମୟରେ ନିଜକୁ ସାଧାରଣ ବର୍ଗର ବୋଲି ଘୋଷଣା କରିଥିଲେ ଏବଂ ନିଶ୍ଚିତ କରିଥିଲେ ଯେ ସେମାନେ ଜନ୍ମଗତ ଭାବରେ ସାଧାରଣ ବର୍ଗର । କୋର୍ଟ ତାଙ୍କ ଆଦେଶରେ କହିଛନ୍ତି ଅଧିକ ତଦନ୍ତ ପରେ ଏବଂ ପ୍ରାର୍ଥୀଙ୍କ ଓକିଲଙ୍କଠାରୁ ନିଶ୍ଚିତ ହେବା ପରେ, ଏହା ସ୍ପଷ୍ଟ ଯେ ପ୍ରାର୍ଥୀମାନେ ସାଧାରଣ ବର୍ଗର ପ୍ରାର୍ଥୀ ଭାବରେ ଉପସ୍ଥିତ ହୋଇଥିଲେ କାରଣ ସେମାନେ ଜନ୍ମଗତ ଭାବରେ ସାଧାରଣ ବର୍ଗର ।  ପ୍ରାର୍ଥୀମାନେ ନିଟ୍-2025 ପରୀକ୍ଷାରେ ଦେବା ସମୟରେ ଜାତିଗତ ପ୍ରମାଣପତ୍ର ପ୍ରଦାନ କରିଥିଲେ । କିନ୍ତୁ ଆର୍ଥିକ ଦୃଷ୍ଟିରୁ ଦୁର୍ବଳ ବର୍ଗର ନୁହଁନ୍ତି । କୋର୍ଟ କହିଛନ୍ତି ଯଦି ଆର୍ଥିକ ଦୁର୍ବଳ ଶ୍ରେଣୀର ନୁହଁନ୍ତି ସେମାନଙ୍କୁ ସଂଖ୍ୟାଲଘୁ ସମ୍ପ୍ରଦାୟର ପ୍ରାର୍ଥୀ ଭାବରେ କିପରି ବିବେଚନା କରାଯାଇଥିଲା । ଉତ୍ତରଦାୟିତ୍ୱ ସ୍ଥିର କରିବା ପାଇଁ, କୋର୍ଟ ହରିୟାଣାର ମୁଖ୍ୟ ସଚିବଙ୍କୁ ରାଜ୍ୟରେ ସଂଖ୍ୟାଲଘୁ ପ୍ରମାଣପତ୍ର ପ୍ରଦାନ କରିବା ପାଇଁ ନିର୍ଦ୍ଦେଶାବଳୀ ଉପରେ ଏକ ସ୍ଥିତି ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି ।

ହରିୟାଣାର ହିସାର ଜିଲ୍ଲାର ଏକ ଜାଟ୍ ପରିବାର କୃଷ୍ଣା ପୁନିଆଙ୍କ ପୁଅ ନୀତିନ ପୁନିଆ ଏବଂ ଝିଅ ଏକତା ପୁନିଆଙ୍କ ଦ୍ୱାରା ଦାୟର କରାଯାଇଛି । ଏହି ଜାଟ୍ ପରିବାର ସାଧାରଣ ବର୍ଗରେ ଆସୁଛନ୍ତି। କିନ୍ତୁ ମେଡ଼ିକାଲ କଲେଜରେ ନାମ ଲେଖାଇବାକୁ ସଂରକ୍ଷଣ ପାଇଁ ଧର୍ମ ପରିବର୍ତ୍ତନ କରିଛନ୍ତି । ସେମାନଙ୍କ ଆବେଦନ ଅନୁସାରେ ଉତ୍ତର ପ୍ରଦେଶର ସୁଭାର୍ତି ମେଡିକାଲ କଲେଜରେ ବୌଦ୍ଧ ସଂଖ୍ୟାଲଘୁ କୋଟା ଅଧୀନରେ ପ୍ରବେଶ ପାଇଁ ଚୟନ କରାଯାଇଥିଲା, କିନ୍ତୁ ସେମାନେ ନିଟ୍-ପିଜି ପାଠ୍ୟକ୍ରମରେ ସଫଳତାର ସହ ନାମ ଲେଖାଇ ପାରିନଥିଲେ ।

ଆବେଦନକାରୀମାନେ ହିସାରର ସବ-ଡିଭିଜନାଲ ଅଫିସର (ସିଭିଲ୍) ଦ୍ୱାରା ପ୍ରଦାନ କରାଯାଇଥିବା ବୌଦ୍ଧ ସଂଖ୍ୟାଲଘୁ ପ୍ରମାଣପତ୍ର ପାଇଥିଲେ । ଯାହା ଜରିଆରେ ସେମାନେ କଲେଜରେ ନାମ ଲେଖାଇବାକୁ ଅନୁମତି ପାଇଥିଲେ । ତଥାପି, ୨୦୧୬ ମସିହାର ଏକ ବିଜ୍ଞପ୍ତି ମାଧ୍ୟମରେ ଉତ୍ତର ପ୍ରଦେଶ ସରକାର କହିଥିଲେ ଯେ ସଂଖ୍ୟାଲଘୁ ମାନ୍ୟତା ଦାବି କରୁଥିବା ପ୍ରତିଷ୍ଠାନଗୁଡ଼ିକୁ ଜାତୀୟ ସଂଖ୍ୟାଲଘୁ କମିଶନ ଦ୍ୱାରା ସ୍ୱୀକୃତିପ୍ରାପ୍ତ ହୋଇଥିଲେ ମଧ୍ୟ ଉତ୍ତର ପ୍ରଦେଶ ରାଜ୍ୟରୁ ସ୍ୱୀକୃତି ପାଇବାକୁ ବାଧ୍ୟତାମୂଳକ । ସମ୍ପୃକ୍ତ କର୍ତ୍ତୃପକ୍ଷ ପ୍ରବେଶ ମଞ୍ଜୁର କରିଥିଲେ ମଧ୍ୟ ଉତ୍ତର ପ୍ରଦେଶ ସରକାର ଏହାକୁ ଅଗ୍ରାହ୍ୟ କରିଥିଲେ । ମାମଲାର ଶୁଣାଣି ସମୟରେ ଖଣ୍ଡପୀଠ କଠୋର ଆଭିମୁଖ୍ୟ ଗ୍ରହଣ କରି ସମ୍ପୃକ୍ତ ପରିବାର ଉପରେ ବର୍ଷିଥିଲେ । ପରିବାରର କାର୍ଯ୍ୟକୁ ଧୋକା ବୋଲି କହିଛନ୍ତି ।