ସିକର ନ୍ୟୁଜ୍: NEET UG ପରୀକ୍ଷା ୨୦୨୬ର ପ୍ରଶ୍ନପତ୍ର ଲିକ୍ ହେବା ପରେ ରାଜସ୍ଥାନର ଦ୍ୱିତୀୟ ବୃହତ୍ତମ କୋଚିଂ ସିଟି 'ସିକର' ଏବେ ସାରା ଦେଶରେ ଚର୍ଚ୍ଚାରେ ଅଛି। ଏହାର କାରଣ ହେଉଛି ପ୍ରଶ୍ନପତ୍ର ଲିକ୍ ମାମଲାର ତାର ସିକର ସହିତ ଜଡ଼ିତ ହେବା। ସିକରରେ କୋଚିଂର ଯାତ୍ରା ପ୍ରାୟ ତିନି ଦଶନ୍ଧି ପୁରୁଣା। ଏହି ତିନି ଦଶନ୍ଧି ମଧ୍ୟରେ ସିକର ସାରା ଦେଶରେ ପରିଚିତ ହୋଇପାରିଛି। ଏହା ରାଜସ୍ଥାନର କୋଚିଂ ସିଟି 'କୋଟା'କୁ ମଧ୍ୟ ଟକ୍କର ଦେବାକୁ ଲାଗିଛି। ଆଜି ସିକରକୁ ପ୍ରାୟ ୩ ହଜାର କୋଟି ଟଙ୍କାର ଏକ କୋଚିଂ ଇଣ୍ଡଷ୍ଟ୍ରି ଭାବେ ଗଣନା କରାଯାଉଛି। ଜାଣନ୍ତୁ, କିଏ କରିଥିଲେ ସିକରରେ କୋଚିଂର ଶୁଭାରମ୍ଭ ଏବଂ କେମିତି ଆଗକୁ ବଢ଼ିଲା ଏହି ଯାତ୍ରା?

ରାଜସ୍ଥାନର କୋଟା ସହର 'କୋଚିଂ ସିଟି' ଭାବେ ସାରା ଦେଶରେ ଖ୍ୟାତି ଅର୍ଜନ କରିଛି। ଏହାପରେ ରାଜସ୍ଥାନର ଦ୍ୱିତୀୟ ସହର ସିକର ମଧ୍ୟ ସେହି ରାସ୍ତାରେ ଦ୍ରୁତ ଗତିରେ ଆଗକୁ ବଢ଼ୁଛି। ଏଠାକାର କୋଚିଂ ଇଣ୍ଡଷ୍ଟ୍ରି ମଧ୍ୟ ଏବେ ହଜାର ହଜାର କୋଟି ଟଙ୍କାର ବ୍ୟବସାୟ ଅତିକ୍ରମ କରିସାରିଛି। କୋଟା ଶୈଳୀରେ ସିକରରେ ମଧ୍ୟ ଆଜି ୧୮ ରୁ ୨୦ଟି ରାଜ୍ୟର ଛାତ୍ରଛାତ୍ରୀ ମେଡିକାଲ୍ (NEET) ଏବଂ ଇଞ୍ଜିନିୟରିଂ (JEE) ପ୍ରବେଶିକା ପରୀକ୍ଷା ପାଇଁ ପ୍ରସ୍ତୁତ ହେବାକୁ ଆସୁଛନ୍ତି। କୋଚିଂ ସହିତ ଏଠାରେ ସ୍କୁଲ ଏବଂ କଲେଜର ଏକ ବଡ଼ ଯୋଜନା କରାଯାଇଛି। ସେହିପରି ପିଜି (PG) ଏବଂ ହଷ୍ଟେଲ ଇଣ୍ଡଷ୍ଟ୍ରି ମଧ୍ୟ ବୁମ୍ (Boom) ଧରିଛି। ନିକଟରେ ନିଟ୍ ପେପର ଲିକ୍ ମାମଲାରେ ସିକରର ନାମ ସାମ୍ନାକୁ ଆସିବା ପରେ ଏହା ପୁଣି ଥରେ ଦେଶବ୍ୟାପୀ ଚର୍ଚ୍ଚାର ଶିରୋନାମା ପାଲଟିଛି।

ସିକର ହେଉଛି ରାଜସ୍ଥାନର ଶେଖାୱାଟୀ ଅଞ୍ଚଳର ସବୁଠାରୁ ବଡ଼ ଜିଲ୍ଲା। ମହାରାଓ ଶେଖାଜୀଙ୍କ ନାମରେ ନାମିତ ଏହି ଅଞ୍ଚଳ ଆଜି କେବଳ ରାଜସ୍ଥାନ ନୁହେଁ, ବରଂ ସାରା ଦେଶରେ ଶିକ୍ଷା, ସେନା ଏବଂ ରାଜନୀତି କ୍ଷେତ୍ରରେ ଅଗ୍ରଣୀ ଅଟେ। ଶେଖାୱାଟୀ ଅଞ୍ଚଳରେ ତିନୋଟି ଜିଲ୍ଲା ଆସେ - ସିକର, ଚୁରୁ ଏବଂ ଝୁନଝୁନୁ। ଏହି ଅଞ୍ଚଳ ଦେଶ ସେବା ପାଇଁ ମଧ୍ୟ ପ୍ରସିଦ୍ଧ। ଏଠାକାର ସାହସୀ ଯୁବକମାନେ ସୀମାରେ ଦେଶ ପାଇଁ ପ୍ରାଣବଳି ଦେବାକୁ ସଦାସର୍ବଦା ପ୍ରସ୍ତୁତ ରହନ୍ତି। ଶେଖାୱାଟୀର ତିନି ଜିଲ୍ଲା ମଧ୍ୟରୁ ଝୁନଝୁନୁ ଏବଂ ସିକର ଶିକ୍ଷା କ୍ଷେତ୍ରରେ ଦେଶର ଅଗ୍ରଣୀ ଜିଲ୍ଲା ଭାବେ ପରିଗଣିତ ହୁଅନ୍ତି। ଦିନେ ରାଜସ୍ଥାନ ବୋର୍ଡର ଦଶମ ଏବଂ ଦ୍ୱାଦଶ ଶ୍ରେଣୀର ମେରିଟ୍ ଲିଷ୍ଟରେ ସବୁଠାରୁ ଅଧିକ ପିଲା ସିକର ଓ ଝୁନଝୁନୁରୁ ହିଁ ଆସୁଥିଲେ। ଏବେ ସିକର କୋଚିଂ କ୍ଷେତ୍ରରେ ମଧ୍ୟ ସାରା ଦେଶରେ ନିଜର ଦବଦବା ଜାହିର କରିଛି।

୧୯୯୬ରେ ପଡ଼ିଥିଲା ସିକର କୋଚିଂର ମୂଳଦୁଆ:

ସିକରରେ କୋଚିଂ ଇଣ୍ଡଷ୍ଟ୍ରିର ଯାତ୍ରା ପ୍ରାୟ ତିନି ଦଶନ୍ଧି ପୁରୁଣା। ଏଠାରେ ଏହି ଉଦ୍ୟୋଗ ଆରମ୍ଭ କରିବାର ଶ୍ରେୟ ମୁଖ୍ୟତଃ CLCର ପ୍ରତିଷ୍ଠାତା ଇଞ୍ଜିନିୟର ଶ୍ରବଣ ଚୌଧୁରୀଙ୍କୁ ଯାଏ। ସିକରର ଏକ ଛୋଟ ଗାଁ 'ରୋସାୱା'ରୁ ବାହାରିଥିବା ଶ୍ରବଣଙ୍କୁ କୋଟା କୋଚିଂର ସଫଳତା ସବୁବେଳେ ବିବ୍ରତ କରୁଥିଲା । ସେଥିପାଇଁ ସେ ସିକରରେ କୋଚିଂକୁ ଆଗକୁ ବଢ଼ାଇବାକୁ ସ୍ଥିର କଲେ। କୋଟାକୁ ଚ୍ୟାଲେଞ୍ଜ ଦେବା ପାଇଁ ୧୯୯୬ରେ ଅତି କ୍ଷୁଦ୍ର ସ୍ତରରେ CLCର ମୂଳଦୁଆ ପଡ଼ିଲା। ବର୍ଷ ବର୍ଷ ଧରି ମିଳିଥିବା ସଫଳତା ପରେ ସିକରର ନାମ ରାଜସ୍ଥାନରେ ଚର୍ଚ୍ଚାକୁ ଆସିଲା ଏବଂ ପରେ ଏହା ଏକ ଇଣ୍ଡଷ୍ଟ୍ରି ଭାବେ ଗଢ଼ିଉଠିଲା। ପ୍ରାୟ ୧୦ ବର୍ଷ ପର୍ଯ୍ୟନ୍ତ କୋଚିଂ କ୍ଷେତ୍ରରେ CLC ଏକଛତ୍ର ଶାସନ କରିଥିଲା।

୨୦୦୭ରେ 'ଗୁରୁକୃପା'ର ଅଭ୍ୟୁଦୟ:

ଏହାପରେ କୋଟାରେ ଚାଲୁଥିବା ଅନେକ କୋଚିଂ ସେଣ୍ଟରର ଶାଖା ଏଠାରେ ଖୋଲିବା ଆରମ୍ଭ ହେଲା। ଦାସୱାନୀ କ୍ଲାସେସ୍, ବଂଶଲ କ୍ଲାସେସ୍, କ୍ୟାରିୟର କୋଚିଂ ଭଳି ବଡ଼ ବଡ଼ ନାମ ଏଠାକୁ ଆସିଲେ, କିନ୍ତୁ ସେମାନେ ଏଠାରେ ସେତେଟା ସଫଳ ହୋଇପାରିଲେ ନାହିଁ। ଏହାପରେ ୨୦୦୭ରେ ସିକରରେ 'ଗୁରୁକୃପା କୋଚିଂ ସେଣ୍ଟର'ର ଅଭ୍ୟୁଦୟ ହେଲା। ସେତେବେଳକୁ ସିକରରେ କୋଚିଂର ଏକ ପ୍ୟାଟର୍ଣ୍ଣ ସେଟ୍ ହୋଇସାରିଥିଲା। ଛାତ୍ରଛାତ୍ରୀ ଏବଂ ଅଭିଭାବକମାନେ କୋଚିଂର ଲାଭ ବୁଝିସାରିଥିଲେ। ତେଣୁ ଗୁରୁକୃପା ମଇଦାନକୁ ଓହ୍ଲାଇବା ମାତ୍ରେ CLCକୁ ଟକ୍କର ଦେବା ଆରମ୍ଭ କଲା। ଏହି ସମୟରେ ପ୍ରିନ୍ସ ଗ୍ରୁପ୍ ମଧ୍ୟ ସ୍କୁଲରୁ ଆଗକୁ ବଢ଼ି କୋଚିଂ କ୍ଷେତ୍ରରେ ପାଦ ଦେଲା ଏବଂ ଏଠାରେ 'ପ୍ରିନ୍ସ ଏଜୁକେସନ୍ ହବ୍' ତିଆରି କଲା। ଆଜି ସହରରେ ଛୋଟବଡ଼ ପ୍ରାୟ ଦେଢ଼ ଡଜନ କୋଚିଂ ସଂସ୍ଥା ନିଜର ପତିଆରା ଜମାଇଛନ୍ତି।

ଡିଫେନ୍ସ ସର୍ଭିସ୍ ପାଇଁ ମଧ୍ୟ ବଡ଼ କୋଚିଂ ହବ୍:

କୋଟା ଏବଂ ସିକର କୋଚିଂ ଇଣ୍ଡଷ୍ଟ୍ରି ମଧ୍ୟରେ ଏକ ବଡ଼ ପାର୍ଥକ୍ୟ ହେଉଛି, ସିକରରେ କେବଳ ମେଡିକାଲ କିମ୍ବା ଇଞ୍ଜିନିୟରିଂ ନୁହେଁ, ବରଂ ସବୁ ପ୍ରକାର ଚାକିରି ପାଇଁ କୋଚିଂ ଉପଲବ୍ଧ। ସିକର ଡିଫେନ୍ସ ସର୍ଭିସ୍ (ସେନାବାହିନୀ) ପାଇଁ ମଧ୍ୟ ଏକ ବଡ଼ ହବ୍। ଏଠାକାର ଯୁବକମାନଙ୍କର ପ୍ରଥମ ସ୍ୱପ୍ନ ସେନାରେ ଭର୍ତ୍ତି ହେବା। ତେଣୁ କୋଚିଂ ସେଣ୍ଟରଗୁଡ଼ିକ ଯୁବକଙ୍କ ଏହି ଜୋସ୍କୁ ଚିହ୍ନି ଡିଫେନ୍ସ ସମ୍ବନ୍ଧୀୟ କୋଚିଂ ଏବଂ ଫିଜିକାଲ ଟ୍ରେନିଂ ମଧ୍ୟ ଆରମ୍ଭ କରିଦେଲେ। କୋଚିଂ କାରଣରୁ ସିକରର ଅର୍ଥନୀତିକୁ ଏକ 'ବୁଷ୍ଟର୍ ଡୋଜ୍' ମିଳିଛି।

ଏଠାରେ ପିଲାଙ୍କୁ ପ୍ରଫେସନାଲ୍ ନୁହେଁ, ଇମୋସନ୍ ସହିତ ପଢ଼ାଯାଏ:

ସିକରର କୋଚିଂ ଯାତ୍ରା ବାବଦରେ ଶିକ୍ଷାବିତ୍ ଡକ୍ଟର ବଳବନ୍ତ ସିଂ ଚିରାଣା କହନ୍ତି ଯେ, କୋଟା ଏବଂ ସିକର ମଧ୍ୟରେ ଏକ ବଡ଼ ଫରକ ଅଛି। ସିକରରେ ପଢ଼ାଉଥିବା ଶିକ୍ଷକମାନଙ୍କ ପରିଶ୍ରମ ହିଁ ସଫଳତାର ରହସ୍ୟ। ଏଠାରେ କୋଟା ଭଳି କୌଣସି ସ୍ଥାପିତ ବଡ଼ ବ୍ରାଣ୍ଡ ନାହିଁ। ସିକରରେ ଯେଉଁମାନେ କୋଚିଂର ମୂଳଦୁଆ ପକାଇଛନ୍ତି, ସେମାନେ ହେଉଛନ୍ତି ଗାଁରୁ ବାହାରିଥିବା କଠିନ ପରିଶ୍ରମୀ ଯୁବକ। ସେମାନେ ପିଲାଙ୍କୁ କେବଳ ପଇସା ପାଇଁ ନୁହେଁ, ବରଂ ଇମୋସନ୍ (ଭାବନା) ସହିତ ପଢ଼ାନ୍ତି ଏବଂ ସିକରର ନାମ ଉପରକୁ ନେବା ପାଇଁ ସେମାନଙ୍କ ପାଖରେ ଜିଦ୍ ଅଛି।

ପ୍ରାୟ ୩ ହଜାର କୋଟିର ଶିଳ୍ପ:

ଆଜି ସିକରର ପିପରାଲି ରୋଡ୍, ନଭଲଗଡ଼ ରୋଡ୍ ଏବଂ ସିକର ବାଇପାସ୍ ସମ୍ପୂର୍ଣ୍ଣ ଭାବେ କୋଚିଂ ସେଣ୍ଟର ଏବଂ ହଷ୍ଟେଲରେ ଭରିଯାଇଛି। ମୋଟାମୋଟି ଅନୁମାନ ଅନୁସାରେ, ସିକର ଏକ ୩ ହଜାର କୋଟି ଟଙ୍କାର କୋଚିଂ ଇଣ୍ଡଷ୍ଟ୍ରି। ପ୍ରାୟ ୨୦ ରୁ ୨୫ ହଜାର ପରିବାରର ଜୀବିକା ଏହି କୋଚିଂ ବ୍ୟବସାୟ ସହ ଜଡ଼ିତ। ଏଠାରେ ୫୦୦ରୁ ଅଧିକ ହଷ୍ଟେଲ ଏବଂ ପିଜି ଖୋଲିସାରିଛି। ପ୍ରାୟ ଏକ ଲକ୍ଷରୁ ଅଧିକ ପିଲା ଏଠାକୁ ଶିକ୍ଷା ପାଇଁ ଆସୁଛନ୍ତି। ଜିଲ୍ଲାରେ ପ୍ରାୟ ୨୦୦୦ରୁ ଅଧିକ ପ୍ରାଇଭେଟ୍ ସ୍କୁଲ୍ ରହିଛି। ଏହି କୋଚିଂ ଇଣ୍ଡଷ୍ଟ୍ରି ଯୋଗୁଁ ଏଠାରେ ଜମିର ଦର ଆକାଶଛୁଆଁ ହୋଇଛି।