ମଧ୍ୟପ୍ରାଚ୍ୟରେ ଇରାନ-ଇସ୍ରାଏଲ ଯୁଦ୍ଧ ଓ ହର୍ମୁଜ ପ୍ରଣାଳୀକୁ ନେଇ ବଢୁଥିବା ତୈଳ ସଙ୍କଟ ମଧ୍ୟରେ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପାଞ୍ଚ ଦିନିଆ ବିଦେଶ ଗସ୍ତ ଆରମ୍ଭ କରିଛନ୍ତି। ୧୫ରୁ ୨୦ ପର୍ଯ୍ୟନ୍ତ UAE, ନେଦରଲ୍ୟାଣ୍ଡସ୍, ସ୍ୱିଡେନ୍, ନରୱେ ଓ ଇଟାଲୀ ଗସ୍ତରେ ଯାଇଥିବା ମୋଦି ଭାରତର ଶକ୍ତି ସୁରକ୍ଷା ଓ କୂଟନୀତିକ ସମ୍ପର୍କକୁ ନୂଆ ଦିଗ ଦେବେ ବୋଲି ଆଶା କରାଯାଉଛି।

ଦେଶରେ ପେଟ୍ରୋଲ-ଡିଜେଲ ଦର ବୃଦ୍ଧି ପରେ ସାଧାରଣ ଲୋକଙ୍କ ଚିନ୍ତା ବଢିଥିବା ବେଳେ, ମୋଦିଙ୍କ ଆବୁଧାବି ଗସ୍ତକୁ ବହୁତ ଗୁରୁତ୍ୱ ଦିଆଯାଉଛି। ୟୁଏଇ ରାଷ୍ଟ୍ରପତିଙ୍କ ସହ ତୈଳ ଓ ଏଲଏନଜି ଯୋଗାଣ ନେଇ ବଡ଼ ଆଲୋଚନା ହେବାର ସମ୍ଭାବନା ରହିଛି। ଭାରତ ନିଜର ପେଟ୍ରୋଲିୟମ ଭଣ୍ଡାରକୁ ବଢାଇବା ପାଇଁ ନୂତନ ସୁବିଧା ତିଆରି କରିବାକୁ ଯୋଜନା କରୁଥିବା ବେଳେ, ୟୁଏଇ ଏଥିରେ ମୁଖ୍ୟ ସହଭାଗୀ ହୋଇପାରେ। ପ୍ରଧାନମନ୍ତ୍ରୀ ମୋଦି ଆବୁଧାବିରେ ୟୁଏଇ ରାଷ୍ଟ୍ରପତିଙ୍କ ସହ ଶକ୍ତି ସୁରକ୍ଷା ବିଷୟରେ ଗମ୍ଭୀର ଆଲୋଚନା କରିବେ। ଭାରତ ନିଜର ପେଟ୍ରୋଲିୟମ ଭଣ୍ଡାରକୁ ବିସ୍ତାର କରିବା ପାଇଁ ୬.୫ ଏମଏମଟି କ୍ଷମତା ବିଶିଷ୍ଟ ଦୁଇଟି ନୂତନ ସୁବିଧା ନିର୍ମାଣ କରିବାକୁ ଯୋଜନା କରୁଛି, ଯେଉଁଥିରେ ୟୁଏଇର ସହାୟତା ଲୋଡ଼ାଯାଇଛି। 

ୟୁଏଇ ବର୍ତ୍ତମାନ ଓପେକ୍ ରୁ ବାହାରି ଯାଇଥିବାରୁ ଏହା ନିଜର ତୈଳ ଉତ୍ପାଦନ ବୃଦ୍ଧି କରିବା ପାଇଁ ସମ୍ପୂର୍ଣ୍ଣ ସ୍ୱାଧୀନ ।  ଏହା ଭାରତ ପାଇଁ ଏକ ନିର୍ଭରଯୋଗ୍ୟ ଯୋଗାଣକାରୀ ହେବାର ସମ୍ଭାବନା ରହିଛି। ତୈଳ ବ୍ୟତୀତ ରନ୍ଧନ ଗ୍ୟାସର ସୁରକ୍ଷା ପାଇଁ ଏହି ଗସ୍ତରେ ବୃହତ ଏଲଏନଜି ଚୁକ୍ତି ମଧ୍ୟ ହୋଇପାରେ। ଉଭୟ ଦେଶ ମଧ୍ୟରେ ଦ୍ୱିପାକ୍ଷିକ ବାଣିଜ୍ୟକୁ ୨୦୦ ବିଲିୟନ ଡଲାରକୁ ବୃଦ୍ଧି କରିବାକୁ ଲକ୍ଷ୍ୟ ରଖାଯାଇଛି।

ତେବେ ପ୍ରଧାନମନ୍ତ୍ରୀଙ୍କ ପାଞ୍ଚ ଦେଶ ଗସ୍ତକୁ ନେଇ ସାଂସଦ ପ୍ରବୀଣ ଖଣ୍ଡେଲୱାଲ କହିଛନ୍ତି, ପଶ୍ଚିମ ଏସିଆ ସଙ୍କଟ ସମୟରେ ମୋଦିଙ୍କ ଏହି ଗସ୍ତ ଭାରତ ପାଇଁ ଅତ୍ୟନ୍ତ ଜରୁରୀ। ବିଶ୍ୱମଞ୍ଚରେ ଭାରତର ସ୍ଥିତିକୁ ଆହୁରି ମଜବୁତ କରିବ ଏହି ଗସ୍ତ। ବିହାର ମନ୍ତ୍ରୀ ରାମ  କ୍ରିପାଲ ଯାଦବ କହିଛନ୍ତି, ୟୁଏଇରେ ବହୁ ଭାରତୀୟ କାର୍ଯ୍ୟରତ ଥିବାରୁ ଏହି ଗସ୍ତ ଦୁଇ ଦେଶର ସମ୍ପର୍କକୁ ଆହୁରି ସୁଦୃଢ କରିବ। ବଢୁଥିବା ତୈଳ ଦରକୁ ନେଇ ମୋଦି ଡିଜେଲ ଓ ପେଟ୍ରୋଲ ବ୍ୟବହାର କମାଇବାକୁ ଦେଶବାସୀଙ୍କୁ ଆହ୍ୱାନ କରିଛନ୍ତି। ଏହି ସମସ୍ୟାର କୂଟନୀତିକ ସମାଧାନ ଖୋଜିବା ପାଇଁ ସେ ଗଲ୍ଫ ଦେଶଗୁଡିକ ସହ ଆଲୋଚନା କରୁଛନ୍ତି।