ନୂଆଦିଲ୍ଲୀ: ହଟିଛି ବ୍ୟାରିକେଡ୍ ଏବଂ ଖୋଲି ଯାଇଛି ପଞ୍ଜାବ-ହରିୟାଣାର ଚର୍ଚ୍ଚିତ ଶମ୍ଭୁ ବର୍ଡର୍ । ଚାଷୀ ଆନ୍ଦୋଳନ ପାଇଁ ଦୀର୍ଘ ଏକ ବର୍ଷରୁ ଉର୍ଦ୍ଧ୍ୱ ସମୟ ଧରି ବନ୍ଦ ରହିଥିବା ଶମ୍ଭୁ ସୀମାକୁ ଖୋଲି ଦିଆଯାଇଛି । ଏହା ସହିତ ଖନୌରୀ ସୀମାକୁ ମଧ୍ୟ ଖୋଲି ଦିଆଯାଇଛି । ଗତକାଲି ରାତିରୁ ବ୍ୟାରିକେଡ୍ ହଟାଇବା ପ୍ରକ୍ରିୟା ଆରମ୍ଭ ହୋଇ ଆଜି ଶେଷ ହୋଇଛି । ଫଳରେ ରାସ୍ତାର ଗୋଟିଏ ପାର୍ଶ୍ୱରରେ ଗାଡ଼ି ଚଳାଚଳ ସ୍ୱାଭାବିକ ହୋଇଛି । 

ଚାଷୀଙ୍କ ଆନ୍ଦୋଳନ ପାଇଁ ଶମ୍ଭୁ ସୀମା ଦୀର୍ଘ ୧୩ ମାସ ହେବ ବନ୍ଦ ରହିଥିଲା । ତେବେ ଏହି କଟକଣାକୁ ପଞ୍ଜାବ ସରକାର ହଟାଇ ଦେଇଛନ୍ତି । ଜାତୀୟ ରାଜପଥ ଉପରେ ଥିବା ସମସ୍ତ ବ୍ୟାରିକେଡକୁ ହଟାଇ ଦିଆଯାଇଛି । ଫଳରେ ରାସ୍ତାରେ ଗାଡ଼ି ଚଳାଚଳ ଆରମ୍ଭ ହୋଇଛି । ଏବେ ଯାତ୍ରୀମାନଙ୍କୁ ଟୋଲ୍ ର ଟଙ୍କା ଦେବାକୁ ପଡ଼ିବ ନାହିଁ । କିନ୍ତୁ ଏହି ଆନ୍ଦୋଳନ ଯୋଗୁଁ ୨୫୦ କୋଟି ଟଙ୍କାର ଟୋଲ୍ ରାଶି କ୍ଷତି ହୋଇଛି । 

ପଟିଆଲା ବରିଷ୍ଠ ପୋଲିସ ଅଧୀକ୍ଷକ (ଏସ୍ଏସ୍ପି) ନାନକ ସିଂହ ଗୁରୁବାର କହିଛନ୍ତି ଯେ ଯାତାୟାତ ପାଇଁ ରାସ୍ତାଗୁଡ଼ିକୁ ଖୋଲାଯାଇଛି । ରାସ୍ତାଗୁଡ଼ିକ ସମ୍ପୂର୍ଣ୍ଣ ସଫା ଅଛି ଏବଂ ରାଜପଥରେ ଯାନବାହାନ ଚଳାଚଳ ଜାରି ରହିଛି । ଆଗାମୀ ୩-୪ ଘଣ୍ଟା ମଧ୍ୟରେ ଯାତାୟାତ ସ୍ୱାଭାବିକ ହେବ ବୋଲି ସେ କହିଛନ୍ତି ।

ପଟିଆଲା ରେଞ୍ଜ ଡିଆଇଜି ମନଦୀପ ସିଂହ ସିଦ୍ଧୁ କହିଛନ୍ତି ଯେ ଖାନୌରି ସୀମାରେ ଏକ ବଡ଼ ଅଞ୍ଚଳ ଖାଲି କରାଯାଇଛି ଏବଂ ଟ୍ରାକ୍ଟର-ଟ୍ରଲି ଇତ୍ୟାଦିକୁ ସୀମାରୁ ୩ କିଲୋମିଟର ଦୂରକୁ ସ୍ଥାନାନ୍ତର କରାଯାଉଛି । ଯଦି କେହି ସେଠାରୁ ଟ୍ରଲି ନେବାକୁ ଚାହାଁନ୍ତି, ତେବେ ସେ ତାଙ୍କର ପରିଚୟ ପ୍ରମାଣ ଦେଖାଇପାରିବେ ଏବଂ ଉପଯୁକ୍ତ ପ୍ରବେଶ ପରେ ଟ୍ରଲିଟି ତାଙ୍କୁ ହସ୍ତାନ୍ତର କରାଯିବ। ଗତକାଲି ଚାଷୀମାନେ ଆମକୁ ସମର୍ଥନ କରିଥିଲେ । ଅଟକ ରଖାଯାଇଥିବା ଚାଷୀମାନଙ୍କର ଉପଯୁକ୍ତ ଯତ୍ନ ନିଆଯାଇଛି ।

ବୁଧବାର ଦିନ ଶମ୍ଭୁ ଏବଂ ଖନୌରି ସୀମାରେ ଚାଷୀ ଆନ୍ଦୋଳନର ନେତୃତ୍ୱ ନେଉଥିବା ଉଭୟ ସଂଗଠନ ପଞ୍ଜାବର ଆମ ଆଦମୀ ପାର୍ଟି (ଆପ୍) ସରକାରଙ୍କୁ ପ୍ରତିବାଦକାରୀଙ୍କୁ ହଟାଇବା ଏବଂ ଚାଷୀ ନେତାମାନଙ୍କୁ ଅଟକ ରଖିବା ପାଇଁ ସମାଲୋଚନା କରିଥିଲେ । ପୋଲିସ କାର୍ଯ୍ୟାନୁଷ୍ଠାନକୁ ନିନ୍ଦା କରି ମୁକ୍ତସର ଜିଲ୍ଲାର ଗିଦ୍ଦେରବାହାରେ କୃଷକମାନଙ୍କର ଏକ ଗୋଷ୍ଠୀ ପ୍ରତିବାଦ କରିଥିଲେ । ଏହି ସମୟରେ ମୋଗା ଜିଲ୍ଲାର ମହିଳାମାନଙ୍କ ସମେତ ଅନ୍ୟ ଏକ ଗୋଷ୍ଠୀ ପୋଲିସଙ୍କ ସହ ଧସ୍ତାଧସ୍ତି ପରିସ୍ଥିତି ହୋଇଥିଲା । ସେହି ସମୟରେ, ଅଖିଳ ଭାରତୀୟ କିଷାନ ସଭା ଏବଂ ଭାରତୀୟ କିଷାନ ୟୁନିଅନର ବ୍ୟାନର ତଳେ ଚାଷୀମାନେ ଏକତ୍ରିତ ହୋଇ ହରିୟାଣା ମୁଖ୍ୟମନ୍ତ୍ରୀ ନାଇବ ସିଂହ ସାଇନିଙ୍କ କର୍ଣ୍ଣାଲରେ ବାସଭବନ ପର୍ଯ୍ୟନ୍ତ ଏକ ପ୍ରତିବାଦ ଶୋଭାଯାତ୍ରା ବାହାର କରିଥିଲେ।