ନୂଆଦିଲ୍ଲୀ: ନେପାଳର ରସୁୱା ଅଞ୍ଚଳରେ ଭୋଟେକୋଶି ନଦୀରେ ଜଳ ପ୍ରଳୟଙ୍କାରୀ ବନ୍ୟା  ନିମିଷକରେ ସବୁ କିଛି ଛାରଖାର କରିଦେଇଛି ।ବୁଧବାର ଭୋଟେକୋଶି ନଦୀରେ ପ୍ରଳୟଙ୍କାରୀ ବନ୍ୟା ସୁ ସୁ ଗର୍ଜନ କରି ହଠାତ୍ ମାଡ଼ି ଆସିଥିଲା । କ୍ଷଣିକେ ମଧ୍ୟରେ ତାପ ପରି ବଡ଼ ବଡ଼ ଅଟ୍ଟାଳିକା ଭୁଶୁଡ଼ି ପଡ଼ିଥିଲା । ବଡ଼ ପୋଲ ମଧ୍ୟ ଜଳର ସ୍ରୋତରେ ଭାଙ୍ଗି ପଡ଼ିଥିଲା । ଯାହାକୁ ଶବ୍ଦରେ ବର୍ଣ୍ଣନା ଅସମ୍ଭବ ହୋଇପଡ଼ୁଛି । 

୧୩୩ ଜଣ ଭାରତୀୟ ନିଖୋଜ

ଏପର୍ଯ୍ୟନ୍ତ ୭୨ ଜଣଙ୍କ ମୃତ୍ୟୁ ସୁନିଶ୍ଚିତ ହୋଇଥିବାବେଳେ ନିଖୋଜ ବ୍ୟକ୍ତିଙ୍କ ସଂଖ୍ୟା ୪୬୩ରେ ପହଞ୍ଚିଛି । ନେପାଳରେ ବନ୍ୟା ପରେ, ୪୬୩ ଜଣ ନିଖୋଜ ହୋଇଥିବା ରିପୋର୍ଟ କରାଯାଇଛି। ଏହି ସଂଖ୍ୟାରେ ୨୦୩ ଜଣ ମହିଳା ଏବଂ ୨୦୦ ପୁରୁଷ ଅଛନ୍ତି। ନିଖୋଜଙ୍କ ମଧ୍ୟରେ ୧୩୩ ଜଣ ଭାରତୀୟଙ୍କ ସମେତ ୩୪୧ ଜଣ ବିଦେଶୀ ନାଗରିକ ଅଛନ୍ତି, ଯେତେବେଳେ ୬୨ ଜଣ ନେପାଳୀ ନାଗରିକ ମଧ୍ୟ ନିଖୋଜ ଥିବା ରିପୋର୍ଟ ହୋଇଛି ।

ଏହି ପ୍ରଳୟ ବ୍ୟାପକ କ୍ଷୟକ୍ଷତି କରିଛି । ୧୧ଟି ହ୍ରାଇଡ୍ରୋପାୱାର ପ୍ଲାଣ୍ଟ, ୪୩୧ ମେଗାୱାଟ ବିଦ୍ୟୁତ ଉତ୍ପାଦନ ସିଷ୍ଟମ, ୧୯ ଟି ପୋଲ ଏବଂ ୪୦ କିଲୋମିଟର ଯାଏ ସଡ଼କ କ୍ଷତିଗ୍ରସ୍ତ ହୋଇଛି । ନେପାଳ ଓ ଚୀନକୁ ସଂଯୋଗ କରୁଥିବା ମୁଖ୍ୟ ରାସ୍ତା ଧୋଇ ଯାଇଛି । ଖାଲି ସେତିକି ନୁହେଁ ୨୫ ରୁ ଉର୍ଦ୍ଧ୍ୱ ଟେଲିକମ୍ ଟାୱାର ଭାଙ୍ଗିଯାଇଛି । 

ନେପାଳ ସେନା ପ୍ରଭାବିତ ଅଞ୍ଚଳରୁ ୨୫ ଜଣଙ୍କୁ ସୁରକ୍ଷିତ ଭାବରେ ସ୍ଥାନାନ୍ତର କର ଏବଂ ଉଦ୍ଧାର କାର୍ଯ୍ୟ ପାଇଁ ୧୫ଟି ହେଲିକପ୍ଟରକୁ ନିୟୋଜିତ କରାଯାଇଛି।

ଉଦ୍ଧାର କାର୍ଯ୍ୟରେ ନେପାଳ ସେନାର ୧୪ଟି ହେଲିକପ୍ଟର ଏବଂ ୭ଟି ଉଦ୍ଧାରକାରୀ ଦଳ ନିୟୋଜିତ ହୋଇଛନ୍ତି । 

ଉଦ୍ଧାର କାର୍ଯ୍ୟ ପାଇଁ ଭାରତୀୟ ବାୟୁସେନା ପ୍ରସ୍ତୁତ 

ନେପାଳର ଏହି ସଙ୍କଟ ପରିସ୍ଥିତିରେ ଭାରତ ମଧ୍ୟ ସହଯୋଗର ହାତ ବଢ଼ାଇଛି । ଉଦ୍ଧାରକାର୍ଯ୍ୟ ପାଇଁ  ଭାରତୀୟ ବାୟୁ ସେନାର C-17 ଏବଂ C-130 ବିମାନ ପ୍ରସ୍ତୁତ ଅଛି। ହିଣ୍ଡନ୍ ଏବଂ ପାଲମ୍ ଏୟାରବେସର ଉଭୟ ବିମାନକୁ ପ୍ରସ୍ତୁତ ରଖାଯାଇଛି। ଆବଶ୍ୟକ ହେଲେ ନେପାଳକୁ ରିଲିଫ୍ ସାମଗ୍ରୀ, ଡାକ୍ତରୀ ଦଳ, ଔଷଧ ଏବଂ ଭଗ୍ନାବଶେଷ ସଫା କରିବା ପାଇଁ ଉପକରଣ ପଠାଯିବ ।

ହାଇଆଲର୍ଟରେ ଉତ୍ତର ପ୍ରଦେଶ ଓ ବିହାର 

ନେପାଳରେ ବନ୍ୟା ପରେ, ଭାରତର ଉତ୍ତର ପ୍ରଦେଶ ଏବଂ ବିହାର ରାଜ୍ୟଗୁଡ଼ିକରେ ସତର୍କତା ବୃଦ୍ଧି କରାଯାଇଛି । ଗଣ୍ଡକ, ନାରାୟଣୀ ଏବଂ କୋସି ନଦୀରେ ଜଳସ୍ତର ଉପରେ କଡ଼ା ନଜର ରଖାଯାଇଛି। ଉତ୍ତର ପ୍ରଦେଶର ମହାରାଜଗଞ୍ଜ ଏବଂ କୁଶିନଗର ଏବଂ ବିହାରର କିଛି ଅଂଶ ସମେତ ଦୁର୍ବଳ ଅଞ୍ଚଳଗୁଡ଼ିକର ପ୍ରଶାସନକୁ ସତର୍କ ରଖାଯାଇଛି। ଏହି ସମୟରେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନେପାଳର ପ୍ରଧାନମନ୍ତ୍ରୀ ବାଲେନ ଶାହଙ୍କ ସହ ଫୋନ୍ ଯୋଗେ କଥା ହୋଇ ସମସ୍ତ ପ୍ରକାରର ରିଲିଫ୍ ସହାୟତା ଯୋଗାଇ ଦିଆଯିବାର ପ୍ରତିଶ୍ରୁତି ଦେଇଛନ୍ତି।