ନୂଆଦିଲ୍ଲୀ: ପହଲଗାମ୍ ଆତଙ୍କୀ ଆକ୍ରମଣ ପରେ କେନ୍ଦ୍ର ସରକାରଙ୍କ ଘନ ଘନ ରଣନୈତିକ ବୈଠକ ମୋଦି ସରକାର ଜାତୀୟ ସୁରକ୍ଷା ପରାମର୍ଶଦାତା ବୋର୍ଡ (NSAB) ର ଗଠନରେ ଏକ ବଡ଼ ପରିବର୍ତ୍ତନ କରିଛନ୍ତି। ଦେଶର ସର୍ବୋଚ୍ଚ ଗୁଇନ୍ଦା ସଂସ୍ଥା RAWର ପୂର୍ବତନ ମୁଖ୍ୟ ଆଲୋକ ଜୋଶୀଙ୍କୁ NSABର ନୂତନ ଅଧ୍ୟକ୍ଷ ନିଯୁକ୍ତ କରାଯାଇଛି। ଭାରତର ଜାତୀୟ ସୁରକ୍ଷା ବ୍ୟବସ୍ଥାକୁ ଅଧିକ ପ୍ରଭାବଶାଳୀ ଏବଂ ସମନ୍ୱିତ କରିବା ଲକ୍ଷ୍ୟରେ ଏହି ପଦକ୍ଷେପ ନିଆଯାଇଛି।

ପୁନଃଗଠିତ ଜାତୀୟ ସୁରକ୍ଷା ପରାମର୍ଶଦାତା ବୋର୍ଡରେ ଏବେ ପ୍ରତିରକ୍ଷା, ଗୁଇନ୍ଦା ଏବଂ କୂଟନୀତି କ୍ଷେତ୍ରର ବିଶେଷଜ୍ଞଙ୍କ ସମେତ ସାତ ଜଣ ସଦସ୍ୟ ରହିବେ। ବୋର୍ଡରେ ତିନି ଜଣ ଅବସରପ୍ରାପ୍ତ ସାମରିକ ଅଧିକାରୀ, ଦୁଇ ଜଣ ଅବସରପ୍ରାପ୍ତ IPS ଅଧିକାରୀ ଏବଂ ଜଣେ ଅବସରପ୍ରାପ୍ତ IFS ଅଧିକାରୀ ଅଛନ୍ତି। ଏହି ବିବିଧ ଗଠନ ସୁରକ୍ଷା ମାମଲାରେ ଏକ ସନ୍ତୁଳିତ ଏବଂ ବହୁମୁଖୀ ଦୃଷ୍ଟିକୋଣ ପ୍ରଦାନ କରିବ ବୋଲି ଆଶା କରାଯାଉଛି।

ଆଲୋକ ଜୋଶୀଙ୍କ ଭୂମିକା ଏବଂ ଗୁରୁତ୍ୱ

ଆଲୋକ ଜୋଶୀ ଜଣେ ଅଭିଜ୍ଞ ଗୁଇନ୍ଦା ଅଧିକାରୀ। ସେ ହରିୟାଣା କ୍ୟାଡରର ୧୯୭୬ ବ୍ୟାଚର ଆଇପିଏସ ଅଧିକାରୀ। ସେ ୨୦୧୨ ରୁ ୨୦୧୪ ପର୍ଯ୍ୟନ୍ତ RAW ର ମୁଖ୍ୟ ଏବଂ ପରବର୍ତ୍ତୀ ସମୟରେ ୨୦୧୫ ରୁ ୨୦୧୮ ପର୍ଯ୍ୟନ୍ତ ନ୍ୟାସନାଲ୍ ଟେକ୍ନିକାଲ୍ ରିସର୍ଚ୍ଚ ଅର୍ଗାନାଇଜେସନ୍ (NTRO) ର ଅଧ୍ୟକ୍ଷ ଭାବରେ କାର୍ଯ୍ୟ କରିଥିଲେ। ଗୁଇନ୍ଦା ଏବଂ ଟେକ୍ନିକାଲ୍ ସୁରକ୍ଷା କ୍ଷେତ୍ରରେ ତାଙ୍କର ଅଭିଜ୍ଞତାକୁ ଦୃଷ୍ଟିରେ ରଖି, ତାଙ୍କର ନିଯୁକ୍ତିକୁ ରଣନୀତିକ ଦୃଷ୍ଟିକୋଣରୁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବିବେଚନା କରାଯାଉଛି। 

ଜାତୀୟ ସୁରକ୍ଷା ପରାମର୍ଶଦାତା ବୋର୍ଡ (NSAB) ଭାରତର ଜାତୀୟ ସୁରକ୍ଷା ପରିଷଦ (NSC)ର ଏକ ଗୁରୁତ୍ୱପୂର୍ଣ୍ଣ ଅଂଶ, ଯାହା ଜାତୀୟ ସୁରକ୍ଷା ଏବଂ ଅନ୍ତର୍ଜାତୀୟ ବ୍ୟାପାର ଉପରେ ସରକାରଙ୍କୁ ପରାମର୍ଶ ଦିଏ। ଏହି ବୋର୍ଡ ଦେଶର ଆଭ୍ୟନ୍ତରୀଣ ଏବଂ ବାହ୍ୟ ସୁରକ୍ଷା ପ୍ରତି ବିପଦର ମୂଲ୍ୟାଙ୍କନ ଏବଂ ସମାଧାନ ପାଇଁ ଜାତୀୟ ସୁରକ୍ଷା ପରାମର୍ଶଦାତା (NSA) ଏବଂ ପ୍ରଧାନମନ୍ତ୍ରୀଙ୍କୁ ରଣନୈତିକ ପରାମର୍ଶ ପ୍ରଦାନ କରେ। ବୋର୍ଡରେ ସାଧାରଣତଃ ପ୍ରତିରକ୍ଷା, ଗୁଇନ୍ଦା, ବୈଦେଶିକ ସେବା ଏବଂ ଅନ୍ୟାନ୍ୟ କ୍ଷେତ୍ରର ବିଶେଷଜ୍ଞମାନେ ଥାଆନ୍ତି, ଯେଉଁମାନେ ସେମାନଙ୍କ ଅଭିଜ୍ଞତା ଆଧାରରେ ନୀତିଗତ ସୁପାରିଶ କରନ୍ତି।