ଭାରତର ସବୁଠାରୁ ବଡ଼ IPO ମଧ୍ୟରୁ ଗୋଟିଏ ହେବାର ସମ୍ଭାବନା ଥିବା ଜିଓ ପ୍ଲାଟଫର୍ମସ୍‌ର ପ୍ରସ୍ତାବିତ ଆଇପିଓ ପୂର୍ବରୁ କମ୍ପାନୀ ନିଜର ଆଗାମୀ ରଣନୀତି ସ୍ପଷ୍ଟ କରିଛି। ଜିଓର ପରବର୍ତ୍ତୀ ଅଭିବୃଦ୍ଧି ପାଇଁ ମୋବିଲିଟି, ହୋମ୍ ବ୍ରଡବ୍ୟାଣ୍ଡ ଏବଂ ଏଣ୍ଟରପ୍ରାଇଜ୍-ଇଣ୍ଟରନ୍ୟାସନାଲ୍ ବ୍ୟବସାୟ ଉପରେ ଫୋକସ୍ କରାଯିବ। ଜିଓ ପ୍ଲାଟଫର୍ମସ୍‌ର ପରିଚାଳନା ନିର୍ଦ୍ଦେଶକ ଆକାଶ ଅମ୍ବାନୀ ଏହି ତିନିଟି କ୍ଷେତ୍ରକୁ କମ୍ପାନୀର ପ୍ରମୁଖ ‘ଗ୍ରୋଥ୍ ଇଞ୍ଜିନ୍’ ଭାବେ ଉପସ୍ଥାପନ କରିଛନ୍ତି।

ଅକ୍ଟୋବର ୧୫ରେ ମୁମ୍ବାଇରେ ସାମ୍ବାଦିକଙ୍କ ସହ ଆଲୋଚନା ବେଳେ ଆକାଶ କହିଛନ୍ତି ଯେ ପ୍ରତ୍ୟେକ ଭାରତୀୟ, ଘର ଓ ଉଦ୍ୟୋଗକୁ ଉନ୍ନତ ତଥା ସୁଲଭ ଡିଜିଟାଲ୍ ସେବା ଯୋଗାଇବା ଜିଓର ମୁଖ୍ୟ ଲକ୍ଷ୍ୟ। କମ୍ପାନୀ ଆକଳନ ଅନୁସାରେ, ୨୦୩୧ ଆର୍ଥିକ ବର୍ଷ ସୁଦ୍ଧା ଭାରତର ଡିଜିଟାଲ୍ ଅର୍ଥନୀତି ପ୍ରାୟ ୧.୪ ଟ୍ରିଲିୟନ୍ ଡଲାରରେ ପହଞ୍ଚିପାରେ।

ମୋବାଇଲ୍ ଗ୍ରାହକ ବଢ଼ାଇବା ଉପରେ ନଜର

ଜିଓର ବର୍ତ୍ତମାନ ପ୍ରାୟ ୫୩.୩ କୋଟି କନେକ୍ଟିଭିଟି ଗ୍ରାହକ ରହିଛନ୍ତି। ଆଗାମୀ ପାଞ୍ଚ ବର୍ଷରେ ଦେଶରେ ପ୍ରାୟ ୩୪ କୋଟି ନୂଆ ୪ଜି ଓ ୫ଜି ଗ୍ରାହକ ଯୋଡ଼ିବାର ସୁଯୋଗ ରହିଥିବା କମ୍ପାନୀ ଆକଳନ କରିଛି। ଏଥିରେ ପ୍ରାୟ ୧୦ କୋଟି ନୂଆ ମୋବାଇଲ୍ ସଂଯୋଗ ନେବାକୁ ଥିବା ଗ୍ରାହକ ଏବଂ ୨ଜିରୁ ୪ଜି-୫ଜିକୁ ଅପଗ୍ରେଡ୍ କରିବାକୁ ଥିବା ପ୍ରାୟ ୨୪ କୋଟି ଗ୍ରାହକ ସାମିଲ ଅଛନ୍ତି।

୧୦ କୋଟି ଘରକୁ ବ୍ରଡବ୍ୟାଣ୍ଡ ସେବା ଲକ୍ଷ୍ୟ

ହୋମ୍ ବ୍ରଡବ୍ୟାଣ୍ଡ ହେଉଛି ଜିଓର ଦ୍ୱିତୀୟ ପ୍ରମୁଖ ଅଭିବୃଦ୍ଧି କ୍ଷେତ୍ର। ବର୍ତ୍ତମାନ କମ୍ପାନୀର ପ୍ରାୟ ୨.୮୬ କୋଟି ଫିକ୍ସଡ୍ ବ୍ରଡବ୍ୟାଣ୍ଡ ଗ୍ରାହକ ଅଛନ୍ତି। ଏହି ସଂଖ୍ୟାକୁ ଭବିଷ୍ୟତରେ ୧୦ କୋଟି ଘର ପର୍ଯ୍ୟନ୍ତ ପହଞ୍ଚାଇବାକୁ ଜିଓ ଲକ୍ଷ୍ୟ ରଖିଛି। ଫାଇବର ଓ ୱାୟାରଲେସ୍ ଟେକ୍ନୋଲୋଜି ମାଧ୍ୟମରେ ଦେଶର ୧୯ ହଜାର ପିନ୍‌କୋଡ୍ ଅଞ୍ଚଳରେ ସେବା ବିସ୍ତାର କରାଯାଉଛି।

ବିଦେଶରେ ଟେକ୍ନୋଲୋଜି ବ୍ୟବସାୟ ବଢ଼ାଇବ ଜିଓ

ତୃତୀୟ ଗ୍ରୋଥ୍ ଇଞ୍ଜିନ୍ ହେଉଛି ଏଣ୍ଟରପ୍ରାଇଜ୍ ଓ ଆନ୍ତର୍ଜାତୀୟ ବ୍ୟବସାୟ। ଭାରତର ପ୍ରାୟ ୫୬.୮ ବିଲିୟନ୍ ଡଲାରର ଏଣ୍ଟରପ୍ରାଇଜ୍ ଡିଜିଟାଲ୍ ସେବା ବଜାରରେ ଜିଓ ବଡ଼ ସୁଯୋଗ ଦେଖୁଛି। ଦେଶର ପ୍ରାୟ ୬୫ ପ୍ରତିଶତ ବ୍ୟାଙ୍କ ଶାଖା ଜିଓ ନେଟୱର୍କ ସହ ସଂଯୁକ୍ତ ଥିବା କମ୍ପାନୀ ପକ୍ଷରୁ କୁହାଯାଇଛି।

ଜିଓ ନିଜେ ବିକଶିତ କରିଥିବା ଟେକ୍ନୋଲୋଜିକୁ ବିଦେଶୀ ବଜାରରେ ବ୍ୟବସାୟିକ ଭାବେ ବ୍ୟବହାର କରିବାକୁ ଯୋଜନା କରୁଛି। କେବଳ ସଫ୍ଟୱେର୍ ବିକ୍ରି ନୁହେଁ, ଅନ୍ୟ ଟେଲିକମ୍ କମ୍ପାନୀଙ୍କୁ ପରିଚାଳିତ ସେବା ଯୋଗାଇବା ମଧ୍ୟ ଏହି ଯୋଜନାର ଅଂଶ।

ଆଇପିଓ ପୂର୍ବରୁ ଏହି ରଣନୀତି ଜିଓର ଦୀର୍ଘମିଆଦୀ ବ୍ୟବସାୟିକ ଦିଗକୁ ସାମ୍ନାକୁ ଆଣିଛି। ତେବେ ପ୍ରସ୍ତାବିତ ଆଇପିଓର ଆକାର, ମୂଲ୍ୟ ଓ ସମୟସୀମା ସମ୍ପର୍କିତ ଚୂଡ଼ାନ୍ତ ବିବରଣୀ ଏଠାରେ ଦିଆଯାଇନାହିଁ।