ପ୍ରତିରକ୍ଷା ମନ୍ତ୍ରଣାଳୟ ନୌସେନାର ସାମୁଦ୍ରିକ ସୁରକ୍ଷା ବଢ଼ାଇବା ପାଇଁ ବେଙ୍ଗାଲୁରୁର ASSPL ସହିତ ୪୪୯ କୋଟି ଟଙ୍କାର ୨୦ଟି ଉନ୍ନତ GNSS ଜ୍ୟାମର୍ସ କିଣିବାକୁ ଚୁକ୍ତି କରିଛି। ଏହି ସ୍ୱଦେଶୀ ଜ୍ୟାମର୍ସ ଶତ୍ରୁ ଜାହାଜଗୁଡ଼ିକୁ ଭାରତୀୟ ସାମୁଦ୍ରିକ ସୀମା ମଧ୍ୟକୁ ପ୍ରବେଶ କରିବାରୁ ରୋକିବ, ଯାହାଦ୍ୱାରା ନୌସେନାର କ୍ଷମତା ବୃଦ୍ଧି ପାଇବ। ଏଥିରେ ୭୫% ସ୍ୱଦେଶୀ ସରଞ୍ଜାମ ବ୍ୟବହାର କରାଯିବା 'ଆତ୍ମନିର୍ଭର ଭାରତ'ର ଏକ ବଡ଼ ଉଦାହରଣ।

ନୌସେନାକୁ ମଜବୁତ ଏବଂ ସୁରକ୍ଷିତ କରିବା ଦୃଷ୍ଟିକୋଣରୁ ପ୍ରତିରକ୍ଷା ମନ୍ତ୍ରଣାଳୟ ଏକ ବଡ଼ ନିଷ୍ପତ୍ତି ନେଇଛି। ମନ୍ତ୍ରଣାଳୟ ବେଙ୍ଗାଲୁରୁର ASSPL କମ୍ପାନୀ ସହିତ ୪୪୯ କୋଟି ଟଙ୍କାରେ ଉନ୍ନତ କ୍ଷମତା ସମ୍ପନ୍ନ ଗ୍ଲୋବାଲ୍ ନେଭିଗେସନ୍ ସାଟେଲାଇଟ୍ ସିଷ୍ଟମ୍ (GNSS) ଜ୍ୟାମର୍ସ ନିର୍ମାଣ ପାଇଁ ଚୁକ୍ତି କରିଛି, ଯାହା ଆଗାମୀ ସମୟରେ ନୌସେନା ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ସାବ୍ୟସ୍ତ ହୋଇପାରେ। ଏହି ସାଟେଲାଇଟ୍ ଜ୍ୟାମର୍ସ ଲାଗିବା ପରେ ଶତ୍ରୁ ଦେଶର କୌଣସି ବି ଜାହାଜ ଭାରତର ସାମୁଦ୍ରିକ ରଡାର୍ ପରିସରକୁ ଆସି କ୍ଷତି ପହଞ୍ଚାଇ ପାରିବେ ନାହିଁ। ଏହି ସାଟେଲାଇଟ୍ ଜ୍ୟାମର୍ସରେ ବ୍ୟବହାର ହେବାକୁ ଥିବା ୭୫ ପ୍ରତିଶତ ସାମଗ୍ରୀ ସ୍ୱଦେଶୀ ହେବ, ଯାହା ଆତ୍ମନିର୍ଭର ଭାରତର ଏକ ବଡ଼ ଉଦାହରଣ ଅଟେ।

ପ୍ରତିରକ୍ଷା ମନ୍ତ୍ରଣାଳୟ ବେଙ୍ଗାଲୁରୁର 'ଆକର୍ଡ ସଫ୍ଟୱେର୍ ଆଣ୍ଡ ସିଷ୍ଟମ୍ସ ପ୍ରାଇଭେଟ୍ ଲିମିଟେଡ୍' (ASSPL) କମ୍ପାନୀ ସହିତ ଭାରତୀୟ ନୌସେନା ପାଇଁ ୨୦ଟି ଉନ୍ନତ କ୍ଷମତା ସମ୍ପନ୍ନ ଗ୍ଲୋବାଲ୍ ନେଭିଗେସନ୍ ସାଟେଲାଇଟ୍ ସିଷ୍ଟମ୍ (ECGNSS) ଜ୍ୟାମର୍ସ କିଣିବା ପାଇଁ ଏହି ଚୁକ୍ତି କରିଛି। ଏହି ଚୁକ୍ତି ‘କ୍ରୟ (ଭାରତୀୟ-ସ୍ୱଦେଶୀ ଭାବେ ଡିଜାଇନ୍, ବିକଶିତ ଏବଂ ନିର୍ମିତ)’ ବର୍ଗ ଅଧୀନରେ ୧୦ ଜୁନ୍‌ରେ ଦିଲ୍ଲୀଠାରେ ପ୍ରତିରକ୍ଷା ସଚିବ ରାଜେଶ କୁମାର ସିଂହଙ୍କ ଉପସ୍ଥିତିରେ ହୋଇଛି।

ଏହି ପ୍ରଣାଳୀର କ୍ଷମତା ମଧ୍ୟରେ ପ୍ରତିଦ୍ୱନ୍ଦ୍ୱୀ (ଶତ୍ରୁ) GNSS ରିସିଭରର ସାଟେଲାଇଟ୍ ସିଗନାଲ୍ ଗ୍ରହଣ ଏବଂ ଟ୍ରାକିଂ ପ୍ରଦର୍ଶନକୁ ଦୁର୍ବଳ କରିବା ସହ ସିଗନାଲ୍ ସ୍ପୁଫିଂ ଜ୍ୟାମିଂ ସାମିଲ ରହିଛି। ଯାହାଫଳରେ ନୌସେନାର ଜାହାଜଗୁଡ଼ିକ ବହୁମୁଖୀ ବିପଦପୂର୍ଣ୍ଣ ପରିବେଶରେ ମଧ୍ୟ ସୁରକ୍ଷିତ ଭାବେ କାର୍ଯ୍ୟ କରିପାରିବେ।

 ଜ୍ୟାମର୍ କଣ ଏବଂ ଏହା କେମିତି କାମ କରେ?

ଏହା ଏକ ଇଲେକ୍ଟ୍ରୋନିକ୍ ଡିଭାଇସ୍ (ଉପକରଣ), ଯାହା ନିଜ ଆଖପାଖର ୱାୟରଲେସ୍ ରେଞ୍ଜ୍‌ ବା ତରଙ୍ଗରେ ବାଧା ସୃଷ୍ଟି କରିଥାଏ। ସାଧାରଣତଃ ଏହି ଡିଭାଇସ୍ ସେହି ରେଡିଓ ଫ୍ରିକୁଏନ୍ସିରେ ସିଗନାଲ୍ ପଠାଇଥାଏ, ଯେଉଁଥିରେ ମୋବାଇଲ୍ କଲ୍, ୱାଇ-ଫାଇ, ଜିପିଏସ୍ ଏବଂ ଅନ୍ୟାନ୍ୟ ୱାୟରଲେସ୍ ସେବା କାମ କରିଥାଏ। ଅନେକ ସ୍ଥାନରେ ଏହାର ବ୍ୟବହାର ଜରୁରୀ ହୋଇଥାଏ, କିନ୍ତୁ କିଛି ସ୍ଥାନ ଏପରି ମଧ୍ୟ ଅଛି ଯେଉଁଠାରେ ଏହିପରି ସିଷ୍ଟମକୁ ସକ୍ରିୟ (ଏକ୍ଟିଭ୍) କରିବା ନିଷେଧ ବୋଲି ଧରାଯାଏ।

ଯେତେବେଳେ ଜ୍ୟାମରକୁ ସକ୍ରିୟ କରାଯାଏ, ସେତେବେଳେ ପ୍ରକୃତ ନେଟୱର୍କ ସିଗନାଲ୍ ଦୁର୍ବଳ ହୋଇଯାଏ। ଅନେକ ସମୟରେ ଏହିପରି ଅଞ୍ଚଳରେ ଫୋନ୍ କଲ୍ କଟିବାକୁ ଲାଗେ, ଇଣ୍ଟରନେଟ୍ ମଧ୍ୟ ଅତ୍ୟନ୍ତ ମନ୍ଥର ହୋଇଯାଏ ଏବଂ କେତେକ କ୍ଷେତ୍ରରେ ଇଣ୍ଟରନେଟ୍ ସମ୍ପୂର୍ଣ୍ଣ ବନ୍ଦ ହୋଇଯାଏ। କେବଳ ସେତିକି ନୁହେଁ, ଜ୍ୟାମରର ପ୍ରଭାବ ନେଭିଗେସନ୍ (ପଥ ପ୍ରଦର୍ଶନ ପ୍ରଣାଳୀ) ଉପରେ ମଧ୍ୟ ପଡ଼ିଥାଏ। ଏହି କାରଣରୁ ପ୍ରତିରକ୍ଷା ମନ୍ତ୍ରଣାଳୟ ବେଙ୍ଗାଲୁରୁର କମ୍ପାନୀ ASSPL ସହିତ ଚୁକ୍ତି କରିଛି, ଯାହା ଭାରତୀୟ ସାମୁଦ୍ରିକ ଜାହାଜଗୁଡ଼ିକୁ ସୁରକ୍ଷିତ ରଖିବାରେ ପ୍ରଭାବଶାଳୀ ସାବ୍ୟସ୍ତ ହେବ।

 ଜ୍ୟାମର୍ସ କେଉଁଠାରେ ବ୍ୟବହାର କରାଯାଇପାରିବ?

ପ୍ରାୟତଃ ଏହି ସିଷ୍ଟମର ବ୍ୟବହାର ଭିଭିଆଇପି (VVIP) ସୁରକ୍ଷା ସମୟରେ କିମ୍ବା ସମ୍ବେଦନଶୀଳ ସ୍ଥାନଗୁଡ଼ିକରେ କରାଯାଇଥାଏ। ଏହାର ଉଦ୍ଦେଶ୍ୟ ହେଉଛି ଅବାଞ୍ଛିତ କିମ୍ବା ବିପଜ୍ଜନକ ଯୋଗାଯୋଗ (କମ୍ୟୁନିକେସନ) କୁ ଅସ୍ଥାୟୀ ଭାବେ ରୋକିବା। ଅନେକ ସମୟରେ ବିଶ୍ୱବିଦ୍ୟାଳୟଗୁଡ଼ିକରେ ମଧ୍ୟ ଏହାର ବ୍ୟବହାର ଦେଖିବାକୁ ମିଳେ, ଯେପରି ଛାତ୍ରଛାତ୍ରୀମାନେ ଅଧିକ ମୋବାଇଲ୍ କନେକ୍ଟିଭିଟିର ବ୍ୟବହାର ନକରି ନିଜର ଅଧିକାଂଶ ସମୟ ପାଠପଢ଼ାରେ ବିତାଇବେ। ଏହି ଡିଭାଇସ୍ ଗୁଡ଼ିକ ଦ୍ୱାରା ମୋବାଇଲ୍ କନେକ୍ଟିଭିଟି ଏବଂ ୱାୟରଲେସ୍ ସେବା ପ୍ରଭାବିତ ହୋଇଥାଏ।