ବୈଦେଶିକ ମନ୍ତ୍ରଣାଳୟ ଅବୈଧ ବାଂଲାଦେଶୀ ନାଗରିକଙ୍କ ପ୍ରତ୍ୟାର୍ପଣ ଉପରେ କଡ଼ା ଆଭିମୁଖ୍ୟ ଗ୍ରହଣ କରିଛି। ବାଂଲାଦେଶ ପାଖରେ ପଡ଼ି ରହିଥିବା ନାଗରିକତ୍ୱ ଯାଞ୍ଚ ମାମଲାଗୁଡ଼ିକୁ ତ୍ୱରାନ୍ୱିତ କରିବାକୁ ଭାରତ ଅନୁରୋଧ କରିଛି। ମନ୍ତ୍ରଣାଳୟର ମୁଖପାତ୍ର ରଣଧୀର ଜୈସୱାଲ କହିଛନ୍ତି ଯେ, ଭାରତ ଆଇନ ଅନୁଯାୟୀ ଅବୈଧ ଅନୁପ୍ରବେଶକାରୀଙ୍କୁ ନିଜ ଦେଶକୁ ଫେରାଇବ।

ଭାରତୀୟ ବୈଦେଶିକ ମନ୍ତ୍ରଣାଳୟ ଆଜି ସାପ୍ତାହିକ ପ୍ରେସ୍ ବ୍ରିଫିଂରେ ‘ଅପରେସନ୍ ସିନ୍ଦୂର’ ଠାରୁ ଆରମ୍ଭ କରି ଷ୍ଟ୍ରେଟ୍ ଅଫ୍ ହୋର୍ମୁଜ୍, କୈଳାସ ମାନସରୋବର ଯାତ୍ରା ଏବଂ ବାଂଲାଦେଶ ପ୍ରସଙ୍ଗରେ ଅନେକ ଗୁରୁତ୍ୱପୂର୍ଣ୍ଣ ସୂଚନା ଦେଇଛି। ଅବୈଧ ବାଂଲାଦେଶୀ ନାଗରିକଙ୍କୁ ଫେରାଇବା ପ୍ରସଙ୍ଗରେ ମନ୍ତ୍ରଣାଳୟ କହିଛି ଯେ, ଭାରତ କ୍ରମାଗତ ଭାବେ ବାଂଲାଦେଶ ଠାରୁ ସହଯୋଗ ଆଶା କରୁଛି। ରଣଧୀର ଜୈସୱାଲ କହିଛନ୍ତି ଯେ, ବାଂଲାଦେଶ ପାଖରେ ନାଗରିକତ୍ୱ ଯାଞ୍ଚର ୨୮୬୦ ରୁ ଅଧିକ ମାମଲା ପଡ଼ି ରହିଛି, ଯେଉଁଥିରୁ ଅନେକ ମାମଲା ପ୍ରାୟ ୫ ବର୍ଷରୁ ଅଧିକ ସମୟ ଧରି ଅଟକି ରହିଛି।

ସେ କହିଛନ୍ତି ଯେ, ଭାରତର ନୀତି ସ୍ପଷ୍ଟ—ଦେଶରେ ଅବୈଧ ଭାବେ ରହୁଥିବା ବିଦେଶୀ ନାଗରିକଙ୍କୁ ଆଇନ ଏବଂ ଦ୍ୱିପାକ୍ଷିକ ବ୍ୟବସ୍ଥା ଅଧୀନରେ ଫେରାଇ ଦିଆଯିବ। ଭାରତ ଆଶା ପ୍ରକଟ କରିଛି ଯେ ବାଂଲାଦେଶ ଯାଞ୍ଚ ପ୍ରକ୍ରିୟାକୁ ଶୀଘ୍ର ଶେଷ କରିବ, ଯାହାଫଳରେ ଅବୈଧ ଅନୁପ୍ରବେଶକାରୀଙ୍କ ପ୍ରତ୍ୟାର୍ପଣ ସହଜରେ ହୋଇପାରିବ।

ପଶ୍ଚିମବଙ୍ଗ ନିର୍ବାଚନରେ ବିଜେପିର ବିଜୟ ପରେ ବାଂଲାଦେଶର ବୈଦେଶିକ ବ୍ୟାପାର ପରାମର୍ଶଦାତା ଖଲିଲୁର ରହମାନଙ୍କ ମନ୍ତବ୍ୟ ଉପରେ ମଧ୍ୟ ବୈଦେଶିକ ମନ୍ତ୍ରଣାଳୟ ପ୍ରତିକ୍ରିୟା ଦେଇଛି। MEA କହିଛି ଯେ ନିକଟ ଅତୀତରେ ଏଭଳି ମନ୍ତବ୍ୟ ବାରମ୍ବାର ସାମ୍ନାକୁ ଆସୁଛି ଏବଂ ଏହାକୁ ଅବୈଧ ବାଂଲାଦେଶୀଙ୍କ ପ୍ରତ୍ୟାର୍ପଣ ପ୍ରସଙ୍ଗରେ ଦେଖାଯିବା ଉଚିତ୍।

ବିଜେପିର ବିଜୟ ଉପରେ କ’ଣ କହିଲେ ଖଲିଲୁର ରହମାନ?

ବଙ୍ଗଳା ନିର୍ବାଚନରେ ବିଜେପିର ଐତିହାସିକ ବିଜୟ ପରେ ବାଂଲାଦେଶ ବୈଦେଶିକ ମନ୍ତ୍ରୀ ଖଲିଲୁର ରହମାନ ତୀସ୍ତା ଜଳ ବଣ୍ଟନ ଚୁକ୍ତି ଉପରେ ତୁରନ୍ତ ବିଚାର କରିବାକୁ ନିବେଦନ କରିଛନ୍ତି। ମମତା ବାନାର୍ଜୀ କ୍ଷମତାରୁ ବାହାରିବା ପ୍ରସଙ୍ଗରେ ତାଙ୍କୁ ପ୍ରଶ୍ନ କରାଯିବାରୁ ସେ କହିଲେ, “ଦେଖନ୍ତୁ, ପଶ୍ଚିମବଙ୍ଗରେ ଏପର୍ଯ୍ୟନ୍ତ ନୂଆ ସରକାର ଗଠନ ହୋଇନାହିଁ। ସେମାନେ କ’ଣ ଚିନ୍ତା କରୁଛନ୍ତି ବା କ’ଣ କରିବେ, ତାହା ସେମାନେ ହିଁ କହିପାରିବେ। ତାଙ୍କ ମନ ପଢ଼ିବା ମୋ କାମ ନୁହେଁ। କିନ୍ତୁ ତୀସ୍ତା ଉପରେ ନିଶ୍ଚିତ ଭାବେ ଆଲୋଚନା ହେବ। ସେହି ଅଞ୍ଚଳର ଲୋକଙ୍କ ପାଇଁ ଏହା ଜୀବନ-ମରଣର ପ୍ରଶ୍ନ।”

ଅବୈଧ ବାଂଲାଦେଶୀଙ୍କ ଉପରେ ଢାକାର ଆଭିମୁଖ୍ୟ

ବାଂଲାଦେଶର ଆଧିକାରିକ ସ୍ଥିତି ହେଉଛି ଯେ, ସେ କେବଳ ସେହି ବ୍ୟକ୍ତିମାନଙ୍କୁ ଗ୍ରହଣ କରିବ ଯେଉଁମାନେ ବାଂଲାଦେଶୀ ନାଗରିକ ଭାବେ ପ୍ରମାଣିତ ହେବେ ଏବଂ ଉପଯୁକ୍ତ ଆଇନଗତ ପ୍ରକ୍ରିୟା (proper repatriation procedures) ମାଧ୍ୟମରେ ସେମାନଙ୍କୁ ପଠାଯିବ। ଏହା ବ୍ୟତୀତ ଅନ୍ୟ କେତେକ ପ୍ରସଙ୍ଗକୁ ନେଇ ମଧ୍ୟ ଭାରତ ଓ ବାଂଲାଦେଶ ସରକାରଙ୍କ ମଧ୍ୟରେ ମତଭେଦ ଜାରି ରହିଛି।