ନୂଆଦିଲ୍ଲୀ: ଦେଶର ପ୍ରତିରକ୍ଷା କ୍ଷେତ୍ରକୁ ଆତ୍ମନିର୍ଭରଶୀଳ କରିବା ପାଇଁ ସରକାର ବିଭିନ୍ନ ପଦକ୍ଷେପ ଗ୍ରହଣ କରୁଥିବାବେଳେ ମିସାଇଲ୍ ବା କ୍ଷେପଣାସ୍ତ୍ର ଉତ୍ପାଦନ କ୍ଷେତ୍ରକୁ ନେଇ ଏକ ବଡ଼ ସତ୍ୟ ସାମ୍ନାକୁ ଆସିଛି। ପ୍ରତିରକ୍ଷା ସଚିବ ରାଜେଶ କୁମାର ସିଂହ ଏକ ସମୀକ୍ଷାରେ ସ୍ୱୀକାର କରିଛନ୍ତି ଯେ, କ୍ଷେପଣାସ୍ତ୍ର ନିର୍ମାଣ କ୍ଷେତ୍ରରେ ଭାରତ ବର୍ତ୍ତମାନ ଏକ ୟୁକ୍ରେନୀୟ କମ୍ପାନୀଠାରୁ ମଧ୍ୟ ପଛରେ ପଡ଼ିଯାଇଛି।

ବିଶ୍ୱସ୍ତରରେ ଚାଲିଥିବା ବିଭିନ୍ନ ଯୁଦ୍ଧ ଏବଂ ଭୂ-ରାଜନୈତିକ ପରିସ୍ଥିତିକୁ ଦୃଷ୍ଟିରେ ରଖି ଭାରତକୁ ଏହାର ପାରମ୍ପରିକ ମିସାଇଲ୍ ରଣନୀତିରେ ପୁନର୍ବିଚାର କରିବାର ଆବଶ୍ୟକତା ରହିଛି ବୋଲି ସେ ମତ ଦେଇଛନ୍ତି। ବିଶେଷ କରି ପାକିସ୍ତାନର ସାମରିକ ପ୍ରସ୍ତୁତି ଏବଂ ପଶ୍ଚିମ ଏସିଆର ଅସ୍ଥିରତାକୁ ଆଖିଆଗରେ ରଖି ଦେଶର ସୁରକ୍ଷା ବ୍ୟବସ୍ଥାକୁ ଅଧିକ ମଜଭୁତ କରିବାକୁ ପଡ଼ିବ।

ପ୍ରତିରକ୍ଷା ସଚିବଙ୍କ କହିବାନୁଯାୟୀ, ଭାରତରେ ଏପର୍ଯ୍ୟନ୍ତ ମୁଖ୍ୟତଃ ଗୋଟିଏ ସରକାରୀ ପ୍ରତିଷ୍ଠାନ ଏବଂ କିଛି ଆଭ୍ୟନ୍ତରୀଣ ସଂସ୍ଥା ଉପରେ ହିଁ ମିସାଇଲ୍ ଉତ୍ପାଦନ ପାଇଁ ଭରସା କରାଯାଇଆସିଛି। ତେବେ ଉତ୍ପାଦନର ଏହି ଗତି ଏବଂ ପରିମାଣକୁ ଆହୁରି ବଢ଼ାଇବାକୁ ପଡ଼ିବ। ଆବଶ୍ୟକତାକୁ ପୂରଣ କରିବା ପାଇଁ ବେସରକାରୀ କ୍ଷେତ୍ରର ସହଯୋଗ ଏବଂ ବ୍ୟାପକ ଶିଳ୍ପଭିତ୍ତିକ ଅଂଶଗ୍ରହଣ ଉପରେ ଗୁରୁତ୍ୱ ଦିଆଯାଉଛି।

ଭାରତ ବର୍ତ୍ତମାନ ସୁରକ୍ଷା କ୍ଷେତ୍ରରେ 'ଆତ୍ମନିର୍ଭର ଭାରତ' ଏବଂ 'ମେକ୍ ଇନ୍ ଇଣ୍ଡିଆ' ମାଧ୍ୟମରେ ସ୍ୱଦେଶୀ ଜ୍ଞାନକୌଶଳକୁ ପ୍ରାଥମିକତା ଦେଉଛି। କିନ୍ତୁ ବାସ୍ତବରେ ମିସାଇଲ୍ ତିଆରି ଏବଂ ଏହାର ଯୋଗାଣ ଶୃଙ୍ଖଳକୁ ଆହୁରି ଦ୍ରୁତ ଓ ଆଧୁନିକ କରିବା ପାଇଁ ଆନ୍ତର୍ଜାତିକ ବଜାର ଏବଂ ପ୍ରତିଯୋଗିତାକୁ ମୁକାବିଲା କରିବାକୁ ପଡ଼ିବ ବୋଲି ବିଶେଷଜ୍ଞମାନେ ମତ ପ୍ରକାଶ କରିଛନ୍ତି।