ନୂଆଦିଲ୍ଲୀ: ଲୋକସଭା ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ସାମ୍ବାଦିକ ସମ୍ମିଳନୀ ଏବଂ ନିର୍ବାଚନ କମିଶନଙ୍କ ଉପରେ ଆକ୍ରମଣ ପରେ ବିଜେପି ପକ୍ଷରୁ କଡ଼ା ଜବାବ ଦିଆଯାଇଛି। ବିଜେପି ସାଂସଦ ସୁଧାଂଶୁ ତ୍ରିବେଦୀ ଏକ ସାମ୍ବାଦିକ ସମ୍ମିଳନୀରେ ରାହୁଲ ଗାନ୍ଧୀଙ୍କୁ ତୀବ୍ର ସମାଲୋଚନା କରିଛନ୍ତି। ସେ କହିଛନ୍ତି ଯେ, ରାହୁଲ ଗାନ୍ଧୀଙ୍କର ରାଜନୈତିକ ବୁଦ୍ଧିମତା ସମ୍ପୂର୍ଣ୍ଣ ଶୂନ୍ୟ ଏବଂ ସେ ନିଜ ପାରମ୍ପରିକ ଆସନ ମଧ୍ୟ ସମାଜବାଦୀ ପାର୍ଟି (SP) ବଳରେ ଜିତୁଛନ୍ତି।

"ସିଷ୍ଟମ୍ ମଜବୁତ୍ ହେବାରୁ କଂଗ୍ରେସର ଅସୁବିଧା"

ସୁଧାଂଶୁ ତ୍ରିବେଦୀ କହିଛନ୍ତି ଯେ, ଭାରତୀୟ ରାଜନୀତିର 'ପ୍ରପଞ୍ଚ ଶିରୋମଣି' ରାହୁଲ ଗାନ୍ଧୀ ପୁଣିଥରେ ଏକ କୋଉଠୁ ଆସିଥିବା ପିପିଟି (PPT) ଦେଖାଇ ଲୋକଙ୍କୁ ବିଭ୍ରାନ୍ତ କରିବାକୁ ଚେଷ୍ଟା କରିଛନ୍ତି। ସେ କହିଛନ୍ତି, "ରାହୁଲ ଗାନ୍ଧୀ କହୁଛନ୍ତି ଯେ ସେ ୫୦ ବର୍ଷ ହେବ ରାଜନୀତି ଦେଖୁଛନ୍ତି, ଅର୍ଥାତ୍ ୫-୬ ବର୍ଷ ବୟସରୁ ସେ ସବୁ ଜାଣିଛନ୍ତି! ଯେଉଁ ଜମାନାରେ ବୁଥ୍ କ୍ୟାପଚରିଂ ହେଉଥିଲା ଏବଂ ଗୁଳି ଚାଲୁଥିଲା, ସେତେବେଳେ କଂଗ୍ରେସ ବିରୋଧରେ ଆଣ୍ଟି-ଇନକମ୍ବେନ୍ସି (ସରକାର ବିରୋଧୀ ହାୱା) କାମ କରୁନଥିଲା। କିନ୍ତୁ ଯେବେଠାରୁ ସିସିଟିଭି କ୍ୟାମେରା ଲାଗିଲା ଏବଂ ନିର୍ବାଚନ ବ୍ୟବସ୍ଥା ମଜବୁତ୍ ହେଲା, ସେବେଠାରୁ କଂଗ୍ରେସକୁ ଏହାର ପରିଣାମ ଭୋଗିବାକୁ ପଡ଼ୁଛି।"

ଭାରତୀୟ ରାଜନୀତିର ଜ୍ଞାନ ନାହିଁ

ବିଜେପି ପ୍ରବକ୍ତା ଆହୁରି କହିଛନ୍ତି ଯେ, କେବଳ ଦାଢ଼ି ପାଚିଗଲେ କେହି ଅଭିଜ୍ଞ ହୋଇଯାଆନ୍ତି ନାହିଁ। ରାହୁଲ ଗାନ୍ଧୀଙ୍କର ଭାରତୀୟ ରାଜନୀତି ବିଷୟରେ କୌଣସି ଜ୍ଞାନ ନାହିଁ। ୧୯୭୭ ପରଠାରୁ ପଶ୍ଚିମବଙ୍ଗରେ କଂଗ୍ରେସ କ୍ଷମତାକୁ ଫେରିନାହିଁ। ୧୯୯୦ ପରଠାରୁ ବିହାରରେ କଂଗ୍ରେସ ସରକାର ନାହିଁ। ୧୯୮୯ ପରଠାରୁ ନିଜ ପରିବାରର ଗୃହ ରାଜ୍ୟ ଉତ୍ତର ପ୍ରଦେଶରେ କଂଗ୍ରେସ ସରକାର ଗଢ଼ିପାରିନାହିଁ। ୧୯୯୯ ପରଠାରୁ ଓଡ଼ିଶାରେ ମଧ୍ୟ କଂଗ୍ରେସ କ୍ଷମତାକୁ ଆସିପାରିନାହିଁ।

"ସପା ଓ ମୁସଲିମ୍ ଭୋଟ୍ ବିନା ଜିତିପାରିବେନି

ତ୍ରିବେଦୀ ଅଭିଯୋଗ କରିଛନ୍ତି ଯେ, କଂଗ୍ରେସ ଦଳରେ ଆଣ୍ଟି-ଇନକମ୍ବେନ୍ସି ଗାନ୍ଧୀ ପରିବାର ଭିତରେ ହିଁ ରହିଛି। ସେମାନେ ନିଜ ପରିବାରର ଆସନ ମଧ୍ୟ ସହଯୋଗୀ ଦଳଙ୍କ ବିନା ସହାୟତାରେ ଜିତିପାରିବେ ନାହିଁ। ଅମେଠି ଓ ରାୟବରେଲି ଆସନ ସମାଜବାଦୀ ପାର୍ଟିର ସମର୍ଥନ ବିନା ଜିତିବା ସମ୍ଭବ ନଥିଲା। ସେହିପରି ରାହୁଲ ଗାନ୍ଧୀ ଓ ପ୍ରିୟଙ୍କା ଗାନ୍ଧୀ ୱାୟନାଡ୍ ଆସନରୁ କେବଳ ମୁସଲିମ୍ ସମ୍ପ୍ରଦାୟର ସମର୍ଥନ ବଳରେ ଜିତିଛନ୍ତି ବୋଲି ବିଜେପି କହିଛି। ରାହୁଲ ଗାନ୍ଧୀ ଆଣୁଥିବା ଅଭିଯୋଗଗୁଡ଼ିକର କୌଣସି ମୂଳ ଆଧାର ନାହିଁ ବୋଲି ସୁଧାଂଶୁ ତ୍ରିବେଦୀ ସ୍ପଷ୍ଟ କରିଛନ୍ତି।