ନୂଆଦିଲ୍ଲୀ: ଦୀପାବଳି ପୂର୍ବରୁ ନରେନ୍ଦ୍ର ମୋଦୀ କେନ୍ଦ୍ର ସରକାରୀ କର୍ମଚାରୀ ଏବଂ ପେନସନଭୋଗୀଙ୍କୁ ଏକ ବଡ଼ ଉପହାର ଦେଇଛନ୍ତି। କେନ୍ଦ୍ର ସରକାର ମହଙ୍ଗା ଭତ୍ତାରେ ୩ ପ୍ରତିଶତ ବୃଦ୍ଧି କରିଛନ୍ତି । ଏହି ବର୍ଦ୍ଧିତ ମହଙ୍ଗା ଭତ୍ତା ୧ ଜୁଲାଇ ଠାରୁ ପିଛିଲା ଭାବେ ଲାଗୁ ହେବ। ଏହି ନିଷ୍ପତ୍ତି ଦ୍ୱାରା ଦେଶର ୧ କୋଟି ୧୬ ଲକ୍ଷ କେନ୍ଦ୍ର ସରକାରୀ କର୍ମଚାରୀ ଲାଭାନ୍ୱିତ ହେବେ । 

ମହଙ୍ଗା ଭତ୍ତା ହେଉଛି ସରକାରଙ୍କ ଦ୍ୱାରା ନିଜ କର୍ମଚାରୀମାନଙ୍କୁ ପ୍ରଦାନ କରାଯାଉଥିବା ଏକ ଅତିରିକ୍ତ ରାଶି, ଯାହା ବଢୁଥିବା ମୁଦ୍ରାସ୍ଫୀତି ଏବଂ ଜୀବନଯାପନର ବର୍ଦ୍ଧିତ ଖର୍ଚ୍ଚ ସହ ମୁକାବିଲା କରିବାରେ ସାହାଯ୍ୟ କରେ। ଏହି ରାଶି କର୍ମଚାରୀଙ୍କ ମୂଳ ଦରମା (Basic Salary) ର ଏକ ନିର୍ଦ୍ଦିଷ୍ଟ ପ୍ରତିଶତ ଅଟେ।

ସରଳ ଭାଷାରେ କହିଲେ, ମହଙ୍ଗା ଭତ୍ତାରେ ହୋଇଥିବା ଏହି ୩% ବୃଦ୍ଧିର ଅର୍ଥ ହେଉଛି, କର୍ମଚାରୀମାନେ ବର୍ତ୍ତମାନ ସେମାନଙ୍କ ମୂଳ ଦରମା ଉପରେ ପୂର୍ବ ଅପେକ୍ଷା ୩% ଅଧିକ ମହଙ୍ଗା ଭତ୍ତା ପାଇବେ। ଏହା ଫଳରେ ସେମାନଙ୍କ ମାସିକ ଦରମା ଏବଂ ପେନସନରେ ସିଧାସଳଖ ବୃଦ୍ଧି ଘଟିବ।

ବର୍ତ୍ତମାନ ବଜାର ଦର ବୃଦ୍ଧି ପାଇଥିବାବେଳେ ଉଚ୍ଚ ମୁଦ୍ରାସ୍ଫୀତି ଆଉ ଏକ ଚିନ୍ତାର କାରଣ ପାଲଟିଛି । ସରକାରଙ୍କ ଏହି ନିଷ୍ପତ୍ତି ସରକାରୀ କର୍ମଚାରୀଙ୍କୁ ଆଶ୍ୱସ୍ତି ପ୍ରଦାନ କରିବ ବୋଲି ଆଶା କରାଯାଉଛି ।