ନୂଆଦିଲ୍ଲୀ: ମହିଳାଙ୍କ ପାଇଁ ବର୍ତ୍ତମାନ ସମୟରେ କର୍କଟ ଏକ ବଡ଼ ସମସ୍ୟା ହୋଇ ଛିଡ଼ା ହୋଇଛି । ଏହାରି ମଧ୍ୟରେ ଭାରତରେ ସ୍ତନ କର୍କଟର ଉଦବେଗ ଜନକ ଚିତ୍ର ସାମ୍ନାକୁ ଆସିଛି । ବିଗତ ୪ ବର୍ଷ ମଧ୍ୟରେ ଦେଶର ୧୩ ପ୍ରତିଶତ ସ୍ତନ କର୍କଟ ରୋଗୀ ବୃଦ୍ଧି ପାଇଛନ୍ତି । ସ୍ୱାସ୍ଥ୍ୟ ରାଷ୍ଟ୍ରମନ୍ତ୍ରୀ ପ୍ରତାପରାଓ ଜାଧବଙ୍କ ଦ୍ୱାରା ରାଜ୍ୟସଭାରେ ଉପସ୍ଥାପିତ ସାମ୍ପ୍ରତିକ ତଥ୍ୟ ଏହାର ଗମ୍ଭୀରତାକୁ ଦର୍ଶାଉଛି।

କେନ୍ଦ୍ର ସରକାରଙ୍କ ତଥ୍ୟ ଅନୁଯାୟୀ, ୨୦୨୧ ରୁ ୨୦୨୫ ମଧ୍ୟରେ ନୂତନ ସ୍ତନ କର୍କଟ ମାମଲା ଏବଂ ମୃତ୍ୟୁରେ ପ୍ରାୟ ୧୩% ଚିନ୍ତାଜନକ ବୃଦ୍ଧି ରେକର୍ଡ କରାଯାଇଛି । ୨୦୨୫ରେ ନୂତନ ସ୍ତନ କର୍କଟ ମାମଲା ସଂଖ୍ୟା ୨ ଲକ୍ଷ ୪୦ ହଜାରରୁ ଅଧିକ ହେବ ବୋଲି ଆକଳନ କରାଯାଇଛି, ଯାହା ଦେଶର ସ୍ୱାସ୍ଥ୍ୟସେବା ବ୍ୟବସ୍ଥା ପାଇଁ ଏକ ବଡ଼ ଚ୍ୟାଲେଞ୍ଜ ସୃଷ୍ଟି କରିବ। ସେହିପରି ସବୁଠାରୁ ପ୍ରାଣ ଘାତକ ହେଉଛି ଓଭାରିଆନ୍ କ୍ୟାନସର୍ ବା ଡିମ୍ବାଶୟ କର୍କଟ । ମନ୍ତ୍ରୀଙ୍କ ତଥ୍ୟ ଅନୁସାରେ ଓଭାରିଆନ୍ କ୍ୟାନସର୍ ମୃତ୍ୟୁହାର ସବୁଠାରୁ ଅଧିକ ରହିଛି । ଓଭାରିଆନ୍ କ୍ୟାନସରରେ ମୃତ୍ୟୁ ସଂଖ୍ୟା ୬୧ ପ୍ରତିଶତ ରହିଛି । ଏହା ପରେ ସର୍ଭାଇକାଲ୍ କ୍ୟାନସର ବା ଗର୍ଭାଶୟ କର୍କଟରେ ମୃତ୍ୟୁ ସଂଖ୍ୟା ୫୪ ପ୍ରତିଶତ  ଏବଂ ସ୍ତନ କର୍କଟରେ ୪୩ ପ୍ରତିଶତ ରହିଛି ।

ବିହାର ଏବଂ ଛତିଶଗଡ଼ରେ କର୍କଟ ରୋଗ ଦ୍ରୁତ ଗତିରେ ବ୍ୟାପିବାରେ ଲାଗିଛି। ଉତ୍ତର ପ୍ରଦେଶ, ମହାରାଷ୍ଟ୍ର, ମଧ୍ୟ ପ୍ରଦେଶ, ପଶ୍ଚିମବଙ୍ଗ ଏବଂ ରାଜସ୍ଥାନରେ ସର୍ବାଧିକ କର୍କଟ ମାମଲା ରହିଛି । କିନ୍ତୁ ବିହାର ଏବଂ ଛତିଶଗଡ଼ରେ କର୍କଟ ହାର ଦ୍ରୁତ ଗତିରେ ବୃଦ୍ଧି ପାଇଛି । ଏହି ଦୁଇଟି ରାଜ୍ୟରେ ନୂତନ ମାମଲା ପ୍ରାୟ ୨୧-୨୨% ଏବଂ ମୃତ୍ୟୁ ସଂଖ୍ୟା ପ୍ରାୟ ୨୦% ବୃଦ୍ଧି ପାଇଛି, ଯାହା ଏକ ବଡ଼ ଚିନ୍ତାର ବିଷୟ।

ତେବେ କେନ୍ଦ୍ର ସରକାର ମହିଳାଙ୍କ କ୍ଷେତ୍ରରେ କର୍କଟ ରୋଗକୁ ହ୍ରାସ ଏବଂ ଏହି ସଙ୍କଟର ସମାଧାନ ପାଇଁ ଅନେକ ପଦକ୍ଷେପ ଗ୍ରହଣ କରୁଛନ୍ତି ବୋଲି କେନ୍ଦ୍ର ମନ୍ତ୍ରୀ ଉତ୍ତରରେ କହିଛନ୍ତି । ସରକାର ୩୦ ବର୍ଷରୁ ଅଧିକ ମହିଳାଙ୍କ ପାଇଁ ବାଧ୍ୟତାମୂଳକ ସ୍କ୍ରିନିଂ ଉପରେ ବିଶେଷ ଗୁରୁତ୍ୱ ଦେଉଛନ୍ତି ଯାହା ଦ୍ୱାରା ପ୍ରାରମ୍ଭିକ ପର‌୍ୟ୍ୟାୟରେ ରୋଗ ଚିହ୍ନଟ ହୋଇପାରିବ, ଯାହା ଦ୍ଵାରା ସମୟ ସୀମାରେ ଚିକିତ୍ସା ଆରମ୍ଭ ହୋଇପାରିବ ଏବଂ ଜୀବନ ରକ୍ଷା କରାଯାଇପାରିବ। ବିଶ୍ୱ ସ୍ତରରେ, ସ୍ତନ କର୍କଟ ହେଉଛି ମହିଳାମାନଙ୍କ ମଧ୍ୟରେ ସବୁଠାରୁ ସାଧାରଣ କର୍କଟ। ସବୁଠାରୁ ବଡ଼ ଆଶ୍ୱସ୍ତି ହେଉଛି ସମୟସୀମାରେ ସ୍କ୍ରିନିଂ ଏବଂ ଚିକିତ୍ସା ସହିତ, ଜୀବନକୁ ରୋକିବା କିମ୍ବା ବଞ୍ଚାଇବା ସମ୍ଭବ ବୋଲି ମନ୍ତ୍ରୀ କହିଛନ୍ତି ।