ଆମେଥି: ମୋବାଇଲରେ ରିଲ୍ସ ଦେଖିବାରେ ସମୟ ନଷ୍ଟ ନକରି ମହିଳା ଓ ଯୁବତୀମାନେ ସରକାରୀ ଯୋଜନା ବିଷୟରେ ଜାଣିବା ଉଚିତ। ଏହାଦ୍ୱାରା ସେମାନେ ନିଜ ପାଇଁ ଉପଲବ୍ଧ ସୁବିଧାର ଲାଭ ଉଠାଇପାରିବେ। ଉତ୍ତରପ୍ରଦେଶ ରାଜ୍ୟ ମହିଳା ଆୟୋଗର ଉପାଧ୍ୟକ୍ଷା ତଥା ବିଜେପି ନେତ୍ରୀ ଅପର୍ଣ୍ଣା ଯାଦବ ଏଭଳି ପରାମର୍ଶ ଦେଇଛନ୍ତି। ଆମେଥିର ଐତିହାସିକ ରାମଲୀଳା ପଡ଼ିଆରେ ଆୟୋଜିତ ରାମଲୀଳା ମହୋତ୍ସବରେ ଯୋଗଦେଇ ସେ ମହିଳା ସଶକ୍ତୀକରଣ ସହ ସାମାଜିକ ଦାୟିତ୍ୱ ଉପରେ ଗୁରୁତ୍ୱ ଦେଇଥିଲେ।

ମଙ୍ଗଳବାର ଏହି ୧୦ ଦିନିଆ କାର୍ଯ୍ୟକ୍ରମରେ ଅପର୍ଣ୍ଣା ମୁଖ୍ୟ ଅତିଥି ଭାବେ ଯୋଗ ଦେଇ ଭଗବାନ ଶ୍ରୀରାମ, ମାତା ସୀତା, ଲକ୍ଷ୍ମଣ ଓ ହନୁମାନଙ୍କ ଆରତି କରିଥିଲେ। ବିଜେପି ନେତା ତଥା ଜିଲ୍ଲା ପଞ୍ଚାୟତ ଅଧ୍ୟକ୍ଷ ରାଜେଶ ଅଗ୍ରହରିଙ୍କ ପକ୍ଷରୁ ଏହି ମହୋତ୍ସବ ଆୟୋଜନ କରାଯାଇଥିଲା।

୯ ଅନାଥ ଝିଅଙ୍କ ବିବାହ ପାଇଁ ଦେଲେ ସହାୟତା

ଧାର୍ମିକ ଆୟୋଜନ ମଧ୍ୟରେ ଅପର୍ଣ୍ଣା ଯାଦବ ୯ ଜଣ ଅନାଥ ଝିଅଙ୍କ ବିବାହ ପାଇଁ ୧.୫୧ ଲକ୍ଷ ଟଙ୍କାର ଚେକ୍ ପ୍ରଦାନ କରିଥିଲେ। ଏଥିସହ ଆସନ୍ତା ବର୍ଷ ଆଉ ୫ ଜଣ ଝିଅଙ୍କ ବିବାହରେ ସହାୟତା କରିବେ ବୋଲି ଘୋଷଣା କରିଥିଲେ।

ଅପର୍ଣ୍ଣା କହିଥିଲେ ଯେ, ମାତାପିତାଙ୍କୁ ହରାଇଥିବା ଝିଅଙ୍କ ବିବାହରେ ସହଯୋଗ କରିବା କେବଳ ଆର୍ଥିକ ସାହାଯ୍ୟ ନୁହେଁ, ବରଂ ସେମାନଙ୍କ ଜୀବନକୁ ସୁନ୍ଦର କରିବାର ଏକ ପ୍ରୟାସ। ଏଥିପାଇଁ ସମାଜର ପ୍ରତ୍ୟେକ ବର୍ଗର ଲୋକ ଆଗେଇ ଆସିବା ଆବଶ୍ୟକ।

ରାମଲୀଳା କମିଟି ଅଧ୍ୟକ୍ଷ ରାଜେଶ ଅଗ୍ରହରି କହିଥିଲେ ଯେ, ଗତ ତିନି ବର୍ଷରେ କମିଟି ପକ୍ଷରୁ ୧୨୮ ଜଣ ଗରିବ ଝିଅଙ୍କ ବିବାହ କରାଯାଇଛି। ଚଳିତ ବର୍ଷ ମାତାପିତାଙ୍କୁ ହରାଇଥିବା ୯ ଜଣ ଝିଅଙ୍କୁ ଦେଢ଼ ଲକ୍ଷ ଟଙ୍କା ଲେଖାଏଁ ସହାୟତା ଦିଆଯାଇଛି।

ମହିଳାଙ୍କ ପ୍ରତି ମନୋଭାବ ବଦଳାଇବାକୁ ଆହ୍ୱାନ

ଯୁବତୀମାନଙ୍କୁ ସରକାରୀ ଯୋଜନା ବିଷୟରେ ସଚେତନ ହେବାକୁ କହିବା ସହ ଅପର୍ଣ୍ଣା ମହିଳାଙ୍କ ପ୍ରତି ଭୁଲ ମନୋଭାବ ରଖୁଥିବା ଲୋକଙ୍କୁ ନିଜର ଚିନ୍ତାଧାରା ବଦଳାଇବାକୁ କହିଥିଲେ। ଭଗବାନ ଶ୍ରୀରାମଙ୍କ ଆଦର୍ଶ ଅନୁସରଣ କରି ସମାଜରେ ମହିଳାଙ୍କୁ ସମ୍ମାନ ଦେବା ଉଚିତ ବୋଲି ସେ ମତ ଦେଇଥିଲେ।