ନୂଆଦିଲ୍ଲୀ: ଆମ ଆଦମୀ ପାର୍ଟିର ନେତା ତଥା ପୂର୍ବତନ ମନ୍ତ୍ରୀ ସତ୍ୟେନ୍ଦ୍ର ଜୈନଙ୍କୁ ଦିଲ୍ଲୀ ଜଳ ପରିଷଦ ଦୁର୍ନୀତି ମାମଲାରେ ଆଶ୍ୱସ୍ତି ମିଳିଛି । ଗୁରୁବାର ଦିଲ୍ଲୀ ରାଉଜ ଏଭନ୍ୟୁ କୋର୍ଟ ସ୍ୱେଜ୍ ଟ୍ରିଟମେଣ୍ଟ ପ୍ଲାଣ୍ଟ ପ୍ରକଳ୍ପ ସହିଜ ଜଡ଼ିତ ହେରଫେର ମାମଲାରେ ସତ୍ୟେନ୍ଦ୍ର ଜୈନଙ୍କ ଜାମିନ ଆବେଦନକୁ ମଞ୍ଜୁର କରିଛନ୍ତି । ସ୍ୱତନ୍ତ୍ର ବିଚାରପତି ଦିଗବିନୟ ସିଂ ଶୁଣାଣି କରି ୨ ଜଣ ଜାମିନଦାର ଏବଂ ୨ ଲକ୍ଷ ଟଙ୍କା ଜମାନବନ୍ଦୀରେ ତାଙ୍କୁ ଜାମିନ ପ୍ରଦାନ କରିଛନ୍ତି । 

ଗଲା ମାସ ୧୮ ତାରିଖରେ ଏସିବି ଦିଲ୍ଲୀ ଜଳ ବୋର୍ଡର ସ୍ୱେଜ୍ ଟ୍ରିଟମେଣ୍ଟ ପ୍ଲାଣ୍ଟ ପ୍ରକଳ୍ପ ଟେଣ୍ଡର ପ୍ରକ୍ରିୟାରେ ହେରଫେର ମାମଲାରେ ସତ୍ୟେନ୍ଦ୍ର ଜୈନଙ୍କୁ ଗିରଫ କରିଥିଲା । ଏହି ମାମଲାରେ ଏସିବି ମୋଟ ୬ ଜଣଙ୍କୁ ନିଜ ହେପାଜତକୁ ନେଇଥିଲା । ଗିରଫ ବ୍ୟକ୍ତିଙ୍କ ମଧ୍ୟରେ ଜଳ ବୋର୍ଡ ପୂର୍ବତନ ସିଇଓ ଆଇଏସ୍ ଉଦିତ ପ୍ରକାଶ ରାୟ, ପୂର୍ବତନ ପରାମର୍ଶଦାତା ଅଙ୍କିତ ଶ୍ରୀବାସ୍ତବ M/s AN ଏଣ୍ଟରପ୍ରାଇଜେସ୍‌ର ସତ୍ତ୍ୱାଧିକାରୀ ନାଗେନ୍ଦ୍ର ଯାଦବ, M/s ୟୁରୋଟେକ୍ ଏନଭାୟରନ୍‌ମେଣ୍ଟ ପ୍ରାଇଭେଟ୍ ଲିମିଟେଡ୍‌ର ମାଲିକ ରାଜା କୁମାର କୁର୍ରା ଏବଂ M/s ସୃଜନହାର୍‌ର ପ୍ରୋପ୍ରାଇଟର ପଙ୍କଜ ବର୍ମା ଥିଲେ । 

ଭିଜିଲାନ୍ସ ନିର୍ଦ୍ଦେଶାଳୟ ପକ୍ଷରୁ ହୋଇଥିବା ଅଭିଯୋଗ ଅନୁଯାୟୀ, ଦିଲ୍ଲୀ ଜଳ ବୋର୍ଡର ଏସଟିପି (STP) ଆଧୁନିକୀକରଣ ଟେଣ୍ଡରରେ ବ୍ୟାପକ ଅନିୟମିତତା, ସର୍ତ୍ତାବଳୀରେ ହେରଫେର ଏବଂ ଅପରାଧିକ ଷଡ଼ଯନ୍ତ୍ର ରଚାଯାଇଥିଲା । ନିର୍ଦ୍ଦିଷ୍ଟ କମ୍ପାନୀ M/s ୟୁରୋଟେକ୍ ଏନଭାୟରନ୍‌ମେଣ୍ଟ ପ୍ରାଇଭେଟ୍ ଲିମିଟେଡ୍‌କୁ ଅନୁକମ୍ପା ଦେବା ପାଇଁ ଟେଣ୍ଡର ନିୟମରେ କୋହଳ କରାଯାଇଥିଲା। ପ୍ରତିଯୋଗିତାକୁ ଏଡ଼ାଇବା ପାଇଁ ସର୍ତ୍ତାବଳୀକୁ କଡ଼ା କରାଯିବା ସହ ଜଳ ବିଶୋଧନର ପ୍ରମୁଖ ମାନଦଣ୍ଡଗୁଡ଼ିକୁ ହଟାଇ ଦିଆଯାଇଥିଲା।

ଅଭିଯୋଗ ହୋଇଛି ଯେ M/s ସୃଜନହାର୍ ଏବଂ M/s AN ଏଣ୍ଟରପ୍ରାଇଜେସ୍ ଜରିଆରେ କମିଶନ୍ ଓ ଲାଞ୍ଚ ଟଙ୍କାର କାରବାର ହୋଇଥିଲା। ୟୁରୋଟେକ୍ ସହ ଜଡ଼ିତ ସଂସ୍ଥାରୁ ନାଗେନ୍ଦ୍ର ଯାଦବଙ୍କ ଫାର୍ମକୁ ମୋଟା ଅଙ୍କର ଟଙ୍କା ଆସିଥିଲା। ପୂର୍ବତନ ସିଇଓ ଉଦିତ ପ୍ରକାଶ ରାୟ ଓ ତାଙ୍କ ସମ୍ପର୍କୀୟଙ୍କ ବ୍ୟାଙ୍କ ଆକାଉଣ୍ଟକୁ AN ଏଣ୍ଟରପ୍ରାଇଜେସ୍ ଜରିଆରେ ପ୍ରାୟ ୧.୫୨ କୋଟି ଟଙ୍କାର ଲାଞ୍ଚ ପଠାଯାଇଥିଲା, ଯେଉଁଥିରେ ସମ୍ପତ୍ତି କିଣାଯାଇଥିବା ଅଭିଯୋଗ ହୋଇଛି।