ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରବିବାର ମନ କି ବାତର ୧୨୫ତମ କାର୍ଯ୍ୟକ୍ରମ ଜରିଆରେ ଦେଶବାସୀଙ୍କୁ ସମ୍ବୋଧିତ କରିଛନ୍ତି । ଏହି କାର୍ଯ୍ୟକ୍ରମରେ ପିଏମ ମୋଦୀ ନିକଟରେ ଘଟିଥିବା ପ୍ରାକୃତିକ ଦୁର୍ଘଟଣା, ଜମ୍ମୁ-କାଶ୍ମୀରର ଉପଲବ୍ଧି, ଶହଡୋଲର ଫୁଟବଲ ଗାଁ, ସୋଲାର ଲାଇଟରେ କୃଷକଙ୍କୁ ଲାଭ ଏବଂ ସ୍ୱଦେଶୀ ଆପଣେଇବା ପ୍ରସଙ୍ଗରେ କଥା କହିଛନ୍ତି । କେବଳ ଏତିକି ନୁହେଁ ପ୍ରଧାନମନ୍ତ୍ରୀ ପାର୍ବଣ ସିଜିନରେ ସ୍ୱଦେଶୀ ଆପଣେଇବା ଉପରେ ଗୁରୁତ୍ୱାରୋପ କରିଛନ୍ତି ।
ସର୍ବପ୍ରଥମେ ମୌସୁମୀ ସମୟରେ ଦେଶର ବିଭିନ୍ନ ରାଜ୍ୟରେ ଆସିଥିବା ପ୍ରାକୃତିକ ବିପର୍ଯ୍ୟୟ ବିଷୟରେ ଉଲ୍ଲେଖ କରିଛନ୍ତି । ଏହା ସହିତ ଉଦ୍ଧାରକର୍ମୀଙ୍କ ଦ୍ୱାରା ଚାଲିଥିବା ସୁରକ୍ଷା ଅଭିଯାନ ବିଷୟରେ ମଧ୍ୟ କହିଛନ୍ତି । ସେ କହିଛନ୍ତି, ମୌସୁମୀ ସିଜିନରେ ଘଟୁୁଥିବା ପ୍ରାକୃତିକ ବିପର୍ଯ୍ୟୟ ଦେଶର ପରୀକ୍ଷା ନେଉଛି । ଗତ କିଛି ସପ୍ତାହରେ ବନ୍ୟା ଓ ଭୂସ୍ଖଳନରେ ବ୍ୟାପକ ବିପର୍ଯ୍ୟୟ ଦେଖିବାକୁ ମିଳିଛି । ଧନଜୀବନ ବହୁତ ହାନୀ ଘଟିଛି । ଅନେକ ପରିବାର ନିସ୍ୱଃ ହୋଇ ଯାଇଛନ୍ତି । ଅନେକ ପୋଲ ଭୁଶୁଡିବା ସହ ବହି ଯାଇଛି । ପ୍ରତ୍ୟେକ ଭାରତୀୟ ଏହି ଘଟଣାରେ ଦୁଃଖିତ ଏବଂ ମର୍ମାହତ । ଯେଉଁ ପରିବାର ନିଜର ପ୍ରିୟଜନଙ୍କୁ ହରାଇଛନ୍ତି, ସେମାନଙ୍କ ଦୁଃଖ, ଯନ୍ତ୍ରଣାକୁ ଆମେ ବୁଝି ପାରୁଛୁ ।
ପିଏମ ମୋଦୀ ବନ୍ୟା ଓ ବର୍ଷା କାରଣରୁ ହୋଇଥିବା କ୍ଷୟକ୍ଷତି ମଧ୍ୟରେ ଜମ୍ମୁ-କାଶ୍ମୀରରେ ଆୟୋଜିତ କ୍ରୀଡା କାର୍ଯ୍ୟକ୍ରମ ବିଷୟରେ ମଧ୍ୟ ଉଲ୍ଲେଖ କରିଛନ୍ତି । ସେ କହିଛନ୍ତି, ଜମ୍ମୁ-କାଶ୍ମୀର ଦୁଇଟି ସ୍ୱତନ୍ତ୍ର ଉପଲବ୍ଧି ହାସଲ କରିଛି । ବହୁତ ଲୋକ ଜାଣି ପାରି ନାହାନ୍ତି ଯେ, ପୁଲୱାମାର ଏକ ଷ୍ଟାଡିୟମରେ ହଜାର ହଜାର ଲୋକଙ୍କ ଉପସ୍ଥିତିରେ ଏକ ଦିବାରାତ୍ର ମ୍ୟାଚ୍ ଆୟୋଜିତ ହୋଇଛି । ଏହା ବ୍ୟତୀତ ଡାଲ ହ୍ରଦରେ ୱାଟର ସ୍ପୋର୍ଟ୍ସର ମଧ୍ୟ ଆୟୋଜନ ହୋଇଛି । ପ୍ରଥମେ ଏହା ସବୁ ଅସମ୍ଭବ ଲାଗୁଥିଲା, ମାତ୍ର ଏବେ ମୋ ଦେଶ ବଦଳୁଛି ।
ଏହା ସହିତ ପ୍ରଧାନମନ୍ତ୍ରୀ ମୋଦୀ ପ୍ରତିଭା ସେତୁ ପ୍ଲାଟଫର୍ମର ଉଲ୍ଲେଖ କରିଛନ୍ତି । ସେ କହିଛନ୍ତି ୟୁପିଏସସି ପରୀକ୍ଷାରେ ଅନେକ ଲୋକ ସଫଳ ହୁଅନ୍ତି । ମାତ୍ର ଏହା ମଧ୍ୟ ସତ ଯେ ହଜାର ହଜାର ପରୀକ୍ଷାର୍ଥୀ ବହୁତ ଅଳ୍ପ ବ୍ୟବଧାନରେ ୟୁପିଏସସିରେ ଉତ୍ତୀର୍ଣ୍ଣ ହେବାରେ ବିଫଳ ହୋଇଛନ୍ତି । ଏଥିପାଇଁ ଏମିତି ପ୍ରତିଭାବାନ ପିଲାଙ୍କ ପାଇଁ ଏକ ଡିଜିଟାଲ ପ୍ଲାଟଫର୍ମ ପ୍ରସ୍ତୁତ କରାଯାଇଛି । ଏଥିରେ ସେହି ଲୋକଙ୍କ ନାଁ ରଖାଯାଇଛି, ଯେଉଁମାନେ ୟୁପିଏସସିର ସବୁ ପର୍ଯ୍ୟାୟରେ ପାସ୍ କରିବା ପରେ ବି ଅନ୍ତିମ ତାଲିକାରେ ଆସି ପାରି ନାହାନ୍ତି । ଏ ପର୍ଯ୍ୟନ୍ତ ଏହି ତାଲିକାରେ ହଜାର ହଜାର ଯୁବକଙ୍କ ନାଁ ରହିଛି । ଏହି ଯୁବକଙ୍କୁ ପ୍ରାଇଭେଟ୍ କମ୍ପାନି ଚାକିରି ଦେଇ ପାରିବେ । ଏହାର ପରିଣାମ ମଧ୍ୟ ମିଳିବା ଆରମ୍ଭ ହୋଇ ଯାଇଛି । ଅନେକ ଲୋକଙ୍କୁ ଏହା ଜରିଆରେ ଚାକିରି ମିଳିଛି ।
Also read: ମୋଦୀ-ଜିନପିଙ୍ଗଙ୍କ ମଧ୍ୟରେ ୫୫ ଧରି ଚାଲିଲା ବୈଠକ, ଚୀନ ରାଷ୍ଟ୍ରପତି କହିଲେ ଡ୍ରାଗନ-ହାତୀ ଏକାଠି ଆସିବା ଜରୁରୀ