ନୂଆଦିଲ୍ଲୀ:  ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସଂପ୍ରତି ଚୀନର ତିଆନଜିନରେ ଅଛନ୍ତି । ଏଠାରେ ସେ ସାଂଘାଇ ସହଯୋଗ ସଂଗଠନ(ଏସସିଓ) ଶିଖର ସମ୍ମିଳନୀରେ ଯୋଗ ଦେବେ । ଶିଖର ସମ୍ମିଳନୀ ପୂର୍ବରୁ ପିଏମ ମୋଦୀ ଚୀନ ରାଷ୍ଟ୍ରପତି ସି ଜିନପିଙ୍ଗଙ୍କ ସାକ୍ଷାତ କରିଛନ୍ତି । ଦୁଇ ନେତାଙ୍କ ମଧ୍ୟରେ ପ୍ରାୟ ୫୫ ମିନିଟ୍ ଧରି ଆଲୋଚନା ହୋଇଛି । ଏହି ସମୟରେ ପିଏମ ମୋଦୀ ସିଧାସଳଖ ବିମାନ ଯାତ୍ରାଠୁ ନେଇ ମାନସରୋବର ପର୍ଯ୍ୟନ୍ତ ପ୍ରସଙ୍ଗରେ ଆଲୋଚନା କରିଛନ୍ତି । ଏହା ପୂର୍ବରୁ ୨୦୨୪ରେ ରୁଷର କଜାନରେ ବ୍ରିକ୍ସ ସମ୍ମିଳନୀ ସମୟରେ ଦୁଇ ନେତା ପରସ୍ପରକୁ ଭେଟିଥିଲେ । ଉଲ୍ଲେଖନୀୟ ଏସସିଓ ସମ୍ମିଳନୀ ଅଗଷ୍ଟ ୩୧ରୁ ସେପ୍ଟେମ୍ବର ୧ ପର୍ଯ୍ୟନ୍ତ ଚାଲିବ ।

ଋାଷ୍ଟ୍ରପତି ସି ଜିନପିଙ୍ଗଙ୍କ ସହ ବୈଠକରେ ପିଏମ ମୋଦୀ କହିଛନ୍ତି ଗତ ବର୍ଷ କଜାନରେ ଆମ ମଧ୍ୟରେ ହୋଇଥିବା ଉପଯୋଗୀ ଆଲୋଚନା ଦୁଇ ଦେଶରେ ସମ୍ବନ୍ଧରେ ସୁଧାର ଆସିଛି । ସୀମାରୁ ସୈନିକ ପ୍ରତ୍ୟାହାର ପରେ ଶାନ୍ତି ଓ ସ୍ଥିରତାର ମାହୋଲ ସୃଷ୍ଟି ହୋଇଛି । ସୀମା ପ୍ରବନ୍ଧନ ସ୍ୱତନ୍ତ୍ର ପ୍ରତିନିଧିଙ୍କ ମଧ୍ୟରେ ବୁଝାମଣା ହେଲା ଏବଂ କୈଳାସ ମାନସରୋବର ଯାତ୍ରା ପୁଣି ଥରେ ଆରମ୍ଭ ହୋଇଛି । ଦୁଇ ଦେଶ ମଧ୍ୟରେ ସିଧାସଳଖ ବିମାନ ଉଡାଣ ଆରମ୍ଭ ହୋଇଛି । 

ଏହି ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି ଆମ ଦୁହିଁଙ୍କ ସହଯୋଗରେ ଦୁଇ ଦେଶର ୨.୮ ବିଲିୟନ ଲୋକଙ୍କ ହିତ ଜଡିତ ରହିଛି । ଏହା ପୂରା ମାନବତାର କଲ୍ୟାଣର ମାର୍ଗ ପ୍ରଶସ୍ତ କରିବ । ପରସ୍ପର ବିଶ୍ୱାସ, ସମ୍ମାନ ଓ ସମ୍ବେଦନଶୀଳତା ଆଧାରରେ ସମ୍ବନ୍ଧକୁ ଆଗକୁ ବଢାଇବାକୁ ଆମେ ପ୍ରତିବଦ୍ଧ । ପିଏମ ମୋଦୀଙ୍କ ପରେ ଚୀନ ରାଷ୍ଟ୍ରପତି ଜିନପିଙ୍ଗ କହିଛନ୍ତି ଦୁଇ ଦେଶ ପରସ୍ପର ସହଯୋଗ ପାଇଁ ପ୍ରସ୍ତୁତ ।

ପିଏମ ମୋଦୀ ଏସସିଓର ସଫଳ ଅଧ୍ୟକ୍ଷତା ପାଇଁ ସି ଜିନପିଙ୍ଗଙ୍କୁ ଅଭିନନ୍ଦନ ଜଣାଇଛନ୍ତି ଏବଂ ଚୀନ ଆସିବାକୁ ନିମନ୍ତ୍ରଣ ପାଇଁ ମଧ୍ୟ ଧନ୍ୟବାଦ ଜଣାଇଛନ୍ତି । ଜିନପିଙ୍ଗ କହିଛନ୍ତି ପିଏମ ମୋଦୀଙ୍କ ସହ ଭେଟି ଖୁସି ଲାଗିଲା । ସଂପ୍ରତି ସ୍ଥିତିରେ ଦୁଇ ଦେଶ ଏକାଠି ଆସିବା ଜରୁରୀ । ଦୁଇ ଦେଶ ପରସ୍ପର ସହଯୋଗ ପାଇଁ ପ୍ରସ୍ତୁତ ଏବଂ ଆଗକୁ ମିଶି  କାମ କରିବୁ । 

ସି ଜିନପିଙ୍ଗ କହିଛନ୍ତି ଦୁନିଆ ପରିବର୍ତ୍ତନ ଦିଗକୁ ବଢୁଛି । ଚୀନ ଓ ଭାରତ ଦୁନିଆର ସବୁଠୁ ଜନବହୁଳ ଦେଶ । ବନ୍ଧୁ ହୋଇ ରହିବା, ଭଲ ପଡୋଶୀ ହେବା ପାଇଁ ଡ୍ରାଗନ ଓ ହାତୀ ଏକାଠି ଆସିବା  ଜରୁରୀ ।